Read Mizo Lushai Daniela 2 Bible Online

Daniela 2 - Mizo Lushai bible

Daniela 2

¹A lal kum hnih kumin Nebukadnezara chuan mumang a nei a, a rilru a tibuai hle a, mut pawh a mu thei lo.

²A mumang chu sawi tûrin lal chuan arsi chhui mi te, bo hre thei te, aienthiam te leh Kaldai mi thiam te a ko va. An lo kal a, lal hmaah chuan an ding a.

³Lal chuan an hnênah, “Mumang ka nei a, min timangang hle a ni; engtihna nge tih hriat ka duh a ni,” a ti a.

⁴Kaldai-ho chuan Aramaik ṭawngin an chhâng a, “Lal chu dam reng rawh se, i mumang chu i chhiahhlawhte hi han hrilh la, kan hrilh fiah mai ang,” an ti a.

⁵Lal chuan, “Ka mumang hi a awmzia min hrilh ngei tûr a ni. Min hrilh theih loh chuan in kut leh ke ka pawhthlâksak ang che u a, in inte ka tiram vek ang.

⁶Ka mumang leh a awmzia min hrilh theih erawh chuan lâwmman tam tak ka pe ang che u a, ka chawimawi bawk ang che u. Ka mumang leh a awmzia mi han hrilh teh u le,” a ti a.

⁷“Lalpa chuan a mumang chu a chhiahhlawhte hi hrilh mai sela, keinin kan hrilh fiah ang,” tiin an chhâng leh a.

⁸Chutah lal chu a ṭêk ta a, “Ka thu ka hlen dâwn tih in hriat avângin tihkhawtlai dân in zawng tih ka hre chiang a ni.

⁹In hrilh fiah theih loh chuan thuhmun ṭheuhvin ka hrem ngei dâwn che u a ni. Nakin deuhvah thil a danglam mai ang tih beiseiin dâwt min hrilha, thil tihkhawtlai in tum a nih hi. Ka mumang chu min han hrilh mai ula; tichuan, in hrilh fiah theih leh theih loh pawh ka hre mai ang,” a ti a.

¹⁰Kaldai mi thiamte chuan lal chu an chhâng a, “Khawvêlah hian i hriat duh chu tu mah sawi thei an awm lo vang. Lal ropui ber te leh thiltithei ber te, tu mahin an arsi chhui mi te, bo hre thei te leh aien thiam te hnênah hetiang thil hi an zâwt ngai lo.

¹¹Lalin i hriat duh hi a khirh êm a, pathiante chauh lo chuan tu man an hre lo vang, pathiante lah kan zîngah an awm si lo,” an ti a.

¹²Chuvâng chuan lal chu a thinur ta êm êm a, Babulon mi thiam rualte chu tihhlum tûrin thu a pe ta a.

¹³Mi thiamte thah thu pêk a nih tâk avângin Daniela leh a ṭhiante pawh chu thah tûr an ni ve ta a.

¹⁴Mi thiam rual that tûra tirh, lal vêngtute hotupa Arioka chu Daniela chuan fîmkhur tak leh hawihhâwm takin a bia a,

¹⁵“Engtizia nge heti taka khauhva lalin thu a pêk le?” a ti a. Arioka chuan thil awm dân chu Daniela a hrilh a.

¹⁶Daniela chu lal hnênah a kal a, mumang chu a hrilh fiah theih nân hun a dîl belh a.

¹⁷Tichuan, Daniela chu a hâwng a, a ṭhian Hanania te, Misaela te, Azaria te chu thil awm dân a hrilh a.

¹⁸Babulon mi thiam dangte ruala thah an nih loh nân vân Pathian khawngaihna ngêna, chu thu khirh chu hrilh fiah theihna dîl tûrin a hrilh a.

¹⁹Chumi zân la la chuan a mumangah chu thu khirh chu a hnêna hrilh fiah a ni ta a.

²⁰Daniela chuan vân Pathian chu lâwmthu a hrilh a: “Pathian chu a fing a, thil a ti thei a, Amah chu fak kumkhua tûr a ni.

²¹Hun te, khua te, a thuin an awm a, Lal te a bân a, a siam bawk a, Finna leh hriatna petu a ni.

²²Thu khirh leh thûk tak takte chu a puang a, Thim zînga thil thuhrûkte pawh a hmu a, Êngin a vêl a hual a ni.

²³Min thlahtute Pathian, Ka fakin ka chawimawi a che, Finna leh chakna min pe a, Ka ṭawngṭai i lo ngaithla a, Lal hnêna sawi tûr min hrilh tâk hi,” a ti a.

²⁴Lalin mi thiam rual that tûra a tirh Arioka hnênah Daniela chu a kal a, a hnênah, “Mi thiam rual hi that mai teh suh, lal hnênah min hruai la, a mumang chu ka hrilh fiahsak ang e,” a ti a.

²⁵Arioka chuan Daniela chu lal hnênah chuan a hruai ta nghâl a, lal hnênah chuan, “Judai ram aṭanga sal zîngah lal mumang hrilh fiah thei tûr mi ka hmu ta,” a ti a.

²⁶Lal chuan Daniela hnênah (a hming dang chu Beltesazara a ni), “Ka mumang leh a awmzia mi hrilh thei ang maw?” a ti a.

²⁷Daniela chuan lal hnênah, “Bo hre thei emaw, aien thiam emaw, arsi chhui mi emaw, mi fing, chu thu khirh hrilh fiah thei tûr tu mah an awm lo vang.

²⁸Amaherawhchu, vânah Pathian a awm a, ani chuan mite hnênah thu rilte a puang ṭhîn; lal Nebukadnezara hnênah pawh nakin lawka thil lo thleng tûr a rawn puang a nih hi. I mumanga i thil hmuh chu ka han hrilh ang che.

²⁹“Khuma i mut laiin lal chuan thil lo thleng tûrte i ngaihtuah a. Thu ril tifiah tûrin Pathian chuan thil lo thleng tûr chu a entîr che a ni.

³⁰Ka fin bîk vâng ni lovin lal hian i mumang awmzia i hriata, i rilrua thu lo lût chu i hriatthiam theih nân he thu ril awmzia hi ka hnênah tihlan a ni.

³¹Ani, ka pu, i mangah chuan milim lian pui mai, tle vur hi i lo hmu a, en ngam loh khawpa hlauhawm a ni.

³²A lu chu rangkachak ṭha ber chia siam a ni, a âwm leh a bân chu tangkarua, a dul leh a kâwngbâwr chu dâr;

³³a ke chu thîr, a ke bâwr chu thîr leh hlum inchawhpawlha siam a ni.

³⁴I en reng a, chutih lai chuan khâm aṭangin tu ma tihbal ni lo lung lian tak a lo lum a, thîr leh hluma siam milim kephah chu a rawn delh a, a sawm ta vek a.

³⁵Thîr te, hlum te, dâr te, tangkarua te leh rangkachak te pawh chu a keh sawm a, nipui laia hruiha buhsi ang mai an lo ni ta a; thliin a lên bo va, a hnuhma pakhat mah hmuh tûr a awm ta lo va. Lung erawh kha chu a lian tual tual a, tlâng tiat ngawt a ni a, leiah a khat ta mup a.

³⁶“Chutiang chu a ni lal mumang chu, ka han hrilh fiah ang e:

³⁷Lal azawngah lal ropui ber i ni a.

³⁸Vân Pathian chuan ram te, thiltihtheihna te, chakna te leh ropuina te a pe che a. Leia mihring chêngte chungah rorêltuah a siam che a, sava leh rannung chungah pawh thu a neihtîr che hi. Rangkachaka siam lu ang chu i ni.

³⁹I hnuah i ram aia nêp lalram dang a lo ding ang a, dâr ang lek lalram dang pawh a lo la ding leh zêl ang, chu chuan khawvêl ro a rêl ang.

⁴⁰Nangmah anga chak lal dang, a palina tûr, thil tichhiaa tidarh thei, thîr ang an lo lal leh ang. Thîrin thil dang a tichhia ang hian lei lalram lo awm hmasate chu a rawn tichhiain a rawn tidarh vek ang.

⁴¹Milim ke leh kezungpui chu, thîr leh hlum inchawhpawlh a nih i hmu a; chu chuan, chu ram chu lungrual lo a nih tûr a entîr a; thîr leh hlum a ni a, thîr anga chakna lai a nei ang.

⁴²A kezungpui chu thîr leh hlum inchawhpawlh bawk a ni a, ram chu a ṭhen lai a chak ang a, a ṭhen lai erawh chu a chak lo hle ang.

⁴³Thîr leh hlum inchawhpawlh i hmu a, chutiangin chu ram rorêltute chuan chhûngkaw inzawm khâwm tumin an inneih pawlh ang a, mahse thîr leh hlum a inchawhpawlh thei lo ang bawk hian an inzawm khâwm tak tak thei lo vang.

⁴⁴Chûng rorêltute hun lai chuan Vân Pathian chuan, ram hlun tûr, ramthar, a rawn din ang a, chu chu tu man an hneh thei lo vang; lal ram dangte chu a tichhe vek ang a, ani erawh chu a awm reng ang.

⁴⁵Tu ma tihbal ni lo, khâm aṭanga lung lo tla kha i hmu bawk a; hlum te, thîr te, dâr te, tangkarua te leh rangkachak tea siam milim chu a delh tâk kha i hmu bawk a. Pathian ropui tak chuan lal hnênah thil lo thleng tûr a hrilh che a ni. I mumang chu ka hrilh ta che a, a awmzia pawh ka hrilh tâk che hi,” a ti a.

⁴⁶Lal Nebukadnezara chu a bawkkhup a, Daniela chu chibai a bûk a, rimtui leh thilpêk Daniela hnêna hlan tûr thu a pe a.

⁴⁷Lal chuan Daniela hnênah, “He thu ril hi i sawi fiah theih avângin i Pathian chu Pathian ropui ber a lo nih hi; lalte Lal a ni a, thu ril puangtu i nih ka hre ta,” a ti a.

⁴⁸Daniela chu a siam lian a, thilpêk ṭha tak tak a pe a, Babulon bial a enkawltîr a, Babulon mi thiam rual hotu-ah a siam ta a.

⁴⁹Daniela dîl angin Sadraka te, Mesaka te, Abednegoa te chu Babulon ram ṭhen hmun dangah hotu-ah a dah a, Daniela erawh chu lal bulah a awm ve ta zêl a.