Read Mizo Lushai Daniela 4 Bible Online

Daniela 4 - Mizo Lushai bible

Daniela 4

¹Hnam tin, chi tin, ṭawng tin hmang, khawvêla awmte hnênah lal Nebukadnezaran hetiang hian thu a thawn a: “Remna in hnênah awm rawh se.

²Pathian Chungnungberan chhinchhiahna leh thil mak mi entîr hi lo hre ve teh u:

³A chhinchhiahnate chu a va ropui êm! A thil tih makte chu a va nasa êm! A ram chu chatuan ram a ni a, Kumkhuain ro a rêl ang.

⁴“Kei, Nebukadnezara hi, ka in ropui takah thlamuang takin ka awm a, engkimah ka hmuingîl a.

⁵Mumang hlauhawm tak ka nei a, mumanga ka thil hmuhte chuan ka rilru a timangang hle a.

⁶Ka mumang chu hrilh fiah tûrin Babulon mi thiamte ka hruai khâwmtîr a,

⁷bo hre thei te, aien thiam te, Kaldai mi thiam te leh arsi chhui mi te chu an lo kal a, ka mumang chu ka hrilh a; mahse, an hrilh fiah thei lo.

⁸A tâwpah Daniela, a hming dang chu Beltesazara, ka Pathian hming chawia sak chu a lo kal a, amahah chuan Pathian thianghlim thlarau a chêng a; tichuan, ka mang chu ka hrilh ve ta a. A hnênah chuan,

⁹‘Nang Beltesazar, mi thiam rual hotu, Pathian thianghlim thlarau chu i hnênah a chêng tih ka hria; chuvângin, thu rilte pawh i hre vek a, ka mang chu hei hi a ni, hrilh fiah rawh le:

¹⁰‘Khum laizâwla mua ka thil hmuh chu, khawvêl laili lai takah thing sâng deuh mai hi a lo awm a.

¹¹Thing chu a ṭhang lian zêl a, a zîk chuan vân a tawng ta a; lei ram hmun tin aṭangin a lang thei a ni.

¹²A hnahte chu a mawi hle a, a rah tep tup a, tu tân pawh kham khawpa ei tham a rah a. Ramsate chuan a hlim an bêl a, chunglêng savate chu a zârah an chêng a, thil nung tinrêngin a rah chu an tlân a.

¹³‘Mua ka thil hmuh chu ka ngaihtuah laiin vân aṭangin vântirhkoh, inring reng a lo chhuk a,

¹⁴hetiang hian ring takin a au va; ‘Thing kha kit ula, a ṭangte hlawi rawh u, a hnahte vaw ṭîl ula, a rahte paih vek rawh u, a hlim ata ramsate chu tlân darh sela, a zâr ata savate pawh thlâwk bo rawh se.

¹⁵A bul bâwr chu a awm ngaiin awm sela, thîr leh dâr khaidiatin thlung ula, hnimin bawh rawh se. Vân daiin tlâk huh sela, ramsate nên hnim zîngah awm za rawh se.

¹⁶A mihring rilru chu ramsa rilruah chang sela, a chungah kum sarih ral bawk rawh se.

¹⁷Hei hi Vântirhkoh inring rengho thurêl a ni; mihring ramte hi Chungnungbera thuhnuaia awm a ni a, mi nêp ber pawh a duh chuan a pe thei tih tu pawhin an hre dâwn nia,’ a ti a.

¹⁸“Kei lal Nebukadnezara hian chu chu ka manga ka thil hmuh chu a ni; Beltesazar, nangin han hrilh fiah teh, ka ram mi thiamten an hrilh fiah thiam lo va, nang erawh chuan Pathian thianghlim thlarau i hnênah a chêng a, i hrilh fiah thei ngei ang,” ka ti a.

¹⁹Daniela, Beltesazara an tih bawk chuan, a hlau êm êm a, eng emaw chen chu eng mah a sawi thei lo va. Lal chuan, “Beltesazar, mumang leh a awmzia avângin thlaphâng suh,” a ti a. Beltesazara chuan, “Ka pu, he mumang hi nangmah hawtu tân ni sela, a kawh pawh i hmêlma tân ni teh se.

²⁰I thing hmuh, sâng zeta ṭhang, vân tawng ta, khawvêl hmun tin aṭanga hmuh theih,

²¹a hnah mawi tak, rah tep tup, mi tin ei tham, a hlim ramsaten an belh, a zâra savate chênna thing chu,

²²aw lalber, nangmah hi i ni. I ṭhang lian a, i chak êm êm a, i ropuina chuan vân a tawng a, i ram chuan kâwlkil a thleng a.

²³Vân aṭanga vântirhkoh inring reng, lo chhuk i hmu a, ‘Thing kha kit ula, tiboral rawh u, a bul bâwr erawh chu a awmna ngaiah awm sela, thîr leh dâr khaidiatin thlung ula, hnimin bawh rawh se; vân daiin tlâk huh sela, kum sarih a ral hma chu ramsate nên awm za rawh se,’ a rawn ti a.

²⁴Aw lalber, hei hi a hrilhfiahna chu a ni: ka pu tâna Chungnungbera thupêk chu hei hi a ni.

²⁵Mihring zîng ata hnawh chhuah i ni ang a, ramsate nên in awm za ang. Bâwngpa angin hnim i pet ang a, vân daiin a tlâk huh ang che. Kum sarih ral hunah, Chungnungbera chuan mihring ram chungah thu a nei a, a duh duh a pe mai ṭhîn tih i hria ang.

²⁶Thing bul bâwr a awm ngaia a awm tûr a ni tih ang khân Chungnungberan thu a nei tih i hriat hunah i la lal leh ang.

²⁷“Tichuan, aw lalber, ka thurâwn che hi pawm hrâm teh; i sual sim la, thil dik ti rawh. I bawhchhiatnate pawh sim la, tihduhdahte khawngaih la; tichuan, thlamuang taka i awm chhûng hi pawh sei a ni mahna,” a ti a.

²⁸Chûng thil chu Nebukadnezara chungah a thleng ta thuai a.

²⁹Kum khat a vei hnu chuan Babulon lal in chung zâwla a lên laiin heti hian a ti a:

³⁰“Babulon khua hi a ropui teh e! Lal chên nân ka thiltihtheihzia leh ka ropuizia tilang tûrin ka sak a nih hi,” tiin.

³¹Lalin chutia thu a la sawi lai mêk chuan vân aṭangin aw a lo chhuak a, “Lal Nebukadnezar, ka sawi hi ngaithla rawh; i ram chu i chân ta,

³²nang pawh mihring zîng ata hnawh chhuah i ni ang a, ramsa zîngah i awm ang; bâwng angin hnim i pet ang a, Chungnungbera chuan mihringte ramah thu a nei a, a duh duh a pe mai ṭhîn tih i la hria ang,” a ti a.

³³Chûng thil chu Nebukadnezara chungah a thleng nghâl ta mai a. Khua ata an hnawt chhuak a, bâwng angin hnim a pet a, vân daiin amah chu a tihuh a, a samte chu mupui thla chen chenin a ṭhang sei a, a tinte pawh sava tin ang mai a ni ta a.

³⁴“Chûng ni a tâwp hnu chuan kei, Nebukadnezara hian vân lam ka thlîr a, ka rilru ngai ka pu leh ta a. Chungnungbera, kumkhuaa awma chu ka fak a, ka chawimawi ta chiam a, ‘Kumkhuaa lal tûr a ni e, A ram chu a awm hlen dâwn a ni.

³⁵Khawvêla chêngte chu eng tham mah an ni lo va, Vâna thil awmte pawh a thu thuin a dah a, Leia awm tu mahin an dang thei lo; Engtiziaa ti nge i nih? ti thei an awm hek lo.’

³⁶“Rilru pângngai ka put leh rual chuan ka ram ropuina pawh a lo vul leh a, kei pawh ka ropuiin ka lal leh ta hle a. Thu min râwntute leh ram hotute chuan mi rawn bêl a, ka ram chu a ding nghet leh ta a, a ropui zâwk mah a ni.

³⁷Kei Nebukadnezara hian Vân Lalber chu ka fak a, ka chawimawi a, ka zah ta êm êm a ni; a thil tih apiang a dik a, a awm dânte pawh a âwm thlap a ni; chapote pawh a titlâwm ṭhîn.”