Read Mizo Lushai Daniela 5 Bible Online

Daniela 5 - Mizo Lushai bible

Daniela 5

¹Lal Belsazaran a milian sâng tân ruai ropui tak a ṭheh a, an hmaah chuan zu a in a,

²Belsazaran zu a han tem chuan a pa Nebukadnezaran Jerusalem Tempul aṭanga a lâk rangkachak leh tangkaraw note kha lâk chhuah thu a pe a, lal leh a miliante, a nupui leh a hmeite zu in nân a ti a ni.

³Jerusalem khuaa Pathian in, Tempul aṭanga an lâk note chu an la chhuak a, lal leh a miliante, a nupui leh a hmeite chuan zu in nân an hmang ta a.

⁴Zû chu an in a, rangkachak te, tangkarua te, dâr te, thîr te, thing te leh lung tea siam pathiante chu an fak ta chûl a.

⁵Chutih lai tak chuan khâwnvâr dahna ep lal in bang zût mâm, a êng lai takah chuan mihring kut a lo lang a, thu a rawn ziak ta a; lal chuan kut che vêl chu a en reng a.

⁶Lal chu a dâng sâwp sâwp a, a hlauh êm avângin a tha a zâwi a, a khûpte chu a sai hlawk hlawk a.

⁷“Aien thiam te, Kaldai mi thiam te, arsi chhui mi te han ko vat teh u,” tiin lal chu a au ta chûl a.

⁸Lal chuan Babulon mi fingte hnênah chuan, “Tu pawh, he thu ziak hi chhiara, a awmzia sawi thei chu puan senduk ka sintîr ang a, rangkachak khaidiat ka awrhtîr bawk ang a, ka rama lal ber pathumnaah ka siam bawk ang,” a ti a. Lal mi fingte chu an lo kal a, thu ziak chu an chhiar thiam lo va, lal hriat atân an hrilh fiah thei hek lo.

⁹Lal Belsazara chu a mangang hle a, a dâng sâwp sâwp a, a miliante lah chuan tihngaihna an hre bawk si lo.

¹⁰Lalnu chuan lal leh a miliante thâwm chu a hriatin rang takin ruai ṭhehna pindanah chuan a lo tlân lût a, “Lalber chu dam reng rawh se. I rilru mangang suh sela, i hmêl pawh danglam hek suh se.

¹¹I ram chhûngah mi pakhat, Pathian thianghlim thlarau chênna a awm alâwm.

¹²I pa hun lai pawh khân hriatthiamna leh finna fiah tak, pathiante neih ang hi, a nei asin.

¹³I pa Nebukadnezara khân bo hrethei te, aien thiam te, Kaldai mi thiam te leh arsi chhui mi te hotu-ah a dah a ni.

¹⁴Mumang hrilh fiah te, thu khirh hriat theih te, thu ril sawi fiah te a thiam bîk a, mi fing tak a ni. A hming chu Daniela a ni, lalin a hmingah Beltesazara a sa a; ko la, hêng hi a rawn hrilh fiah mai ang,” a ti a.

¹⁵Lal hmaah Daniela chu an rawn hruai a. Lal chuan, “Juda mi, sal, ka pain Judai ram aṭanga a rawn hruai Daniela kha i ni em? Pathian thianghlim thlarau i hnênah a chêng a, finvârna te, hriatthiamna te leh finna te i ngah hle tih ka lo hria asin.

¹⁶“Mi fing te, aien thiam te he thu ziak hi chhiar a, a awmzia min hrilh tûrin an rawn hruai a; mahse, tu man an hrilh fiah thei lo. Nangin he thu ziak hi i chhiar theiha, a awmzia i sawi theih bawk chuan puan senduk ka sintîr ang che a, rangkachak khaidiat ka awrhtîr bawk ang che. He ram chhûngah lal ber pathumnaah ka siam bawk ang che,” a ti a.

¹⁷Daniela chuan a chhâng a, “I thil min pêk tumte chu nangman nei la, a nih loh leh mi dang pe zâwk ang che. He thu ziak hi ka chhiar tho vang a, a awmzia pawh ka hrilh ang che.

¹⁸Aw lalber, i pa Nebukadnezara chu Pathian Chungnungbera chuan a laltîr a, a tilianin a tiropui nasa êm êm a:

¹⁹a len êm avâng chuan mi tu pawh, hnam tin, chi tin leh ṭawng tin hmanghote chuan amah an hlau va, a hmaah an khûr ṭhîn; a duh a that a, a duh a zuah a, a duh a chawisâng a, a duh leh a tihniam a.

²⁰A lo inngaihlu ta hle a, a rilru chu a sakin chapo takin thil a ti ṭhîn a. Chuvângin, paih a ni a, a ropuina chhuhsak a ni ta a.

²¹Mihring zîng ata hnawh chhuah a ni a, a rilru chu ramsa rilru ang chauh a ni ta a; ram sabengtungte nên an tla za a, bâwng angin hnim a pet a; mihringte ram hi Chungnungbera thu thuin a awm a, a duh apiang a laltîr mai a ni tih a hriat fiah hma chu vân daiin a taksa chu a tlâk huh ṭhîn.

²²Nang, a fapa, Belsazar, chu thil chu i hre reng nâ a, i inngaitlâwm lo va,

²³Vân Lalpa kalhin i inchawisâng a, a ina note chu i lâktîr a, nang leh i miliante, i nupuite leh i hmeite chuan zu in nân an hmang a. Rangkachak te, tangkarua te, dâr te, thîr te, thing te leh lung tea siam milim, eng mah hmu thei lo, ngaithla thei lo leh hre thei lote in chawimawi ta zâwk a. A kuta kawltu che, i khawsak dân tinrêng entu Pathian chu i zah lo vei a.

²⁴“Hei vâng hian he kut hi he thu ziak tûrin a rawn tîr a ni.

²⁵A thu ziak chu hei hi a ni: MENE, MENE, TEKEL tih leh PARSIN tih a ni.

²⁶Mene tih chu i lal hun tûr chin a chhinchhiah a, a titâwp dâwn tihna a ni;

²⁷Tekel tih chu bûk i ni a, i tling lo tihna a ni.

²⁸Parsin tih chu i ram hi sem darh a ni a, Media leh Persia hnêna pêk a ni tihna a ni,” a ti a.

²⁹Lal thupêk angin Daniela chu puan senduk an sintîr a, rangkachak khaidiat ṭhi an awrhtîr bawk a, rama lal ber pathumnaah dah a nih tâk thu an puang a.

³⁰Chumi zân ngei chuan Kaldai lal Belsazara chu an that a,

³¹Media mi Daria chuan ram chu a chang ta a, kum sawmruk leh pahniha upa a ni.