Read Mizo Lushai Daniela 6 Bible Online

Daniela 6 - Mizo Lushai bible

Daniela 6

¹Daria chuan ram pum pui rorêl tûrin ramawptu za leh sawmhnih dah darh ṭha a ti a.

²Chûngte hna enzuia lal tâna ṭha tûr thlîr zui tûrin Daniela leh mi dang pahnih a ruat bawk a.

³Ram awptute leh chûng hotute zîngah chuan Daniela chu a fel lawr lak a; chutia a fel bîk êm avâng chuan lal chuan ram pum hotua dah a rilrûk a.

⁴Ramawptute leh hotu dangte chuan ram enkawl thu-ah, Daniela thil tihsual an châng ta rân a; mahse, hêkna tûr eng mah an hmu thei lo; Daniela chuan engkim dik tak leh rinawm takin a ti dim diam ṭhîn a, thil sual emaw, thil dik lo emaw a ti ngai si lo va.

⁵Chûng mite chuan, “A Pathian biak chungchâng thu-ah chauh lo chuan Daniela hi hêk chhiatna tûr kan hmu zo dâwn lo,” an ti a.

⁶Tichuan, lal hnênah an kal a, “Lal Daria, dam reng ang che.

⁷I ram enkawltu, hotute, ramawptute, upahote leh sawrkâr miliante chuan, ‘lal hian thupêk siam sela, chu a thupêk chu khauh taka lekkawh ni rawh se;’ kan ti tlâng a ni. ‘Ni sawmthum chhûng chu, nang, lal hnênah chauh lo chuan tu man, an pathian hnênah emaw, mi dang hnênah emaw eng mah an dîl tûr a ni lo,’ tih thu pe la, ‘a awih lo chu sakeibaknei pûkah paih tûr a ni,’ ti ang che.

⁸Tichuan, lalber, he thupêk hi chhuah la, i hming ziak hnan la, lekkawh tûr a ni; Media leh Persia dân, tihdanglam theih loh chu a lo ni dâwn nia,” an ti a.

⁹Lal Daria chuan thupêkah chuan hming a ziak ta a.

¹⁰Lal chuan thupêkah hming a ziak ta tih Danielan a hriat veleh a hâwng a. A in chhâwngah chuan Jerusalem lam hawia tukverh inhawng a awm hlawm a. Ni tin, ṭhingṭhiin, tukverh inhawng hawi chuan a ṭawngṭai ṭhîn a, chutiang bawk chuan a Pathian hnênah lâwmthu a sawi leh ta tho va.

¹¹Daniela ertute chuan an enthla a, Pathian hnêna a ṭawngṭai chu an va hmu a.

¹²Daniela hêk tûrin an za chuan lal hnênah an kal ta a. “Aw lalber, ‘ni sawmthum chhûng chu tu pawh, lal hnênah tih loh, an Pathian hnênah emaw, mi dang hnênah emaw thil an dîl chuan sakeibaknei pûkah paih tûr a ni’ tiin thu i pêkah hming i ziak lâwm ni kha?” an ti a. Lal chuan a chhâng a, “Ziak e, chu thupêk chu thupêk ding lai alâwm, Media leh Persia dân sût theih loh tûr a nih kha,” a ti a.

¹³Lal chu an chhâng a, “Judai rama mi, sal pakhat, Daniela chuan, aw lalber, i thupêk chu a zah lo va, a pawisa hauh lo, ni tin vawi thum a la ṭawngṭai tho mai,” an ti a.

¹⁴Chu thu chu lalin a han hriat chuan pawi a ti hle a, Daniela chu chhan dân tûr a ngaihtuah a. Ni tlâk thlengin a ngaihtuah a.

¹⁵Chûng mite chu lal hnênah an lo kal leh a, “Nang, lalberin Media leh Persia dân ang thlapa thupêk, hming i ziak hnan tawh chu, sût leh theih a ni lo tih i hria e,” an ti a.

¹⁶Tichuan, Daniela chu lal chuan a mantîr a, sakeibaknei dahkhâwmna pûkah chuan a thlâktîr ta a. Daniela hnênah chuan, “Rinawm taka a rawng i bâwl ṭhîn i Pathian chuan chhan che rawh se,” a ti a.

¹⁷Pûk chu lungin an chhîn a, tu man Daniela chu an lâk chhuah theih loh nân lal leh hotute chhinchhiahna nem meuhvin lung chu an châr a.

¹⁸Lal chu a haw a, chumi zân chuan chaw a nghei a, intihhlimna eng mah a ngaithla duh lo va, a muhîl thei hek lo.

¹⁹Vârṭianah lal chu a tho va, hmanhmawh takin sakeibaknei pûkah chuan a va kal a.

²⁰Daniela an thlâkna pûk chu a va thleng a, ṭah-awin Daniela chu a au va, “Daniel, Pathian nung rawngbâwltu, rinawm taka a rawng i bâwl ṭhin i Pathian chuan sakeibaknei kâ aṭangin a chhan ta che em?” a ti a.

²¹Daniela chuan, “Aw lalber, dam reng ang che,

²²eng mah min tih lo tûrin Pathianin vântirhkoh a rawn tîr a, sakeibaknei kâ a rawn tichihsak a ni; eng mah tihsual ka nei lo va, lal chungah thil dik lo eng mah ka ti hek lo tih lan nân a rawn tîr a ni,” tiin a lo chhâng a.

²³Lal chu a lâwm êm êm a. “Daniela chu pûk ata khai chhuah tûr,” a ti a. Daniela chu pûk ata an khai chhuak a, Pathian a rin tlat avângin hliam pakhat mah a tuar lo.

²⁴Lal chuan Daniela hêktute chu man tûr a ti a, an nupui fanaute nên lam sakeibaknei awmna pûkah chuan an thlâk ta a. Pûk mawng an thlen hma hmain sakeibakneite chuan an lo seh a, an ruhte lamin an seh tliak vek a.

²⁵Lal Daria chuan khawvêla hnam tin, chi tin, ṭawng tin hmangte hnênah lehkha a ziak a; “Remna in hnênah awm rawh se.

²⁶Thu ka pe e, ka ram chhûnga mi zawng zawngin Daniela Pathian hi an ṭihin an zah tûr a ni. Pathian nung a ni a, Chatuanin ro a rêl ang. A ram chu a chhe ngai lo vang a, A lalna chu a tâwp ngai lo vang.

²⁷A chhandam a, a chhan chhuak ta, Leiah leh vânah chhinchhiahna te, Thil mak tak takte a ti a, Sakeibaknei lakah Daniela pawh a chhan chhuak,” tiin.

²⁸Daria lal lai leh Persia lal Kura lal laite chuan Daniela chu kawng engkimah a hmuingîl hle a.