Read Mizo Lushai Daniela 7 Bible Online

Daniela 7 - Mizo Lushai bible

Daniela 7

¹Babulon lal, Belsazara lal kum khat kum khân mang ka nei a, zâna ka mangah hmuh ka nei a, ka ziak chhuak a, hei hi chumi zâna ka thil hmuh ziakna chu a ni:

²Kil tin aṭangin thli a lo tleh a, tuifinriat chu a chhêm vak a.

³Tuifinriat aṭang chuan sakawlh lian pui pui pali, inang lo ṭheuh hi an lo chhuak a.

⁴Pakhatna chu sakeibaknei ang hi a ni a, mupui angin thla a nei a. Ka en reng lai chuan a thla chu an pawt kawlh a, lei ata an kaitho va, mihring angin ke pahnihin an dintîr a, mihring rilru ang an puttîr a.

⁵Sakawlh pahnihna chu savawm ang hi a ni a, a ke hnung lamin a ding a, nâkruh pathum hi a seh a, aw lo chhuak chuan, “Ei rawh, i duhtâwkin sa ei rawh,” a rawn ti a.

⁶Ka en reng lai chuan sakawlh dang a lo lang leh a, keite ṭial ang hi a ni nâ a, a hnungzângah chuan sava thla ang hi thla pali a awm a, lu pali a nei bawk a, thuneihna an pe a.

⁷Ka en reng lai chuan sakawlh palina pawh chu a lo lang a, hlauhawm tak leh râpthlâk tak, awmkhauh tak a ni. Thîr ha lian pui pui a nei ṭeuh mai a, a seh tawh chu a seh sawm a, a chîl nek ṭhîn. Sakawlh dang ang lovin ki sâwm a nei a.

⁸A kite chu ka en reng lai chuan ki tê tak tê pakhat, ki dang zîngah chuan a lo chawr chhuak a, ki pathum lo awm sa chu a tâwn phawng a. Chu ki chuan mihring angin mit a nei a, a uangthuang thei zat zat hle a.

⁹Ka en reng lai chuan: Lalṭhutthlêng an lo hûng a, Tah chuan Hmakhawsânga chu a ṭhu a; A silhfên chu vûr anga vâr a ni a, A sam pawh sahmul vâr ang a ni. A lalṭhutthlêng chu meialh a ni a, A ke tawlailîr pawh mei kâng a ni.

¹⁰Chuta ta chu mei a lo alh chhuak a, A rawngbâwl tûr mi sâng tam an awm a, A vêlah a sînga sîng têl an ding a, Rorêl chu an ṭan a, Lehkhabute chu an keu ta a.

¹¹Ka en reng lai chuan ki tê tak tê kha inchhuang taka a uang ta pâng pâng thâwm chu ka hre zui a. Ka hmuh lai chuan sakawlh palina chu an that a, a ruang chu meiah chuan an vawm lût a, a kâng ral ta.

¹²Sakawlh dangte thuneihna pawh an lâksak a; amaherawhchu, hun eng emaw chên an nun zêl an phalsak a ni.

¹³Zâna ka thil hmuhah chuan hei hi ka hmu bawk: Vân chhûma inthuam hringfa ang tak A lo kal a, Hmakhawsânga lam a pan a, A hnênah chuan an hruai a.

¹⁴A hnênah chuan lalna te, Ropuina te, ramte an pe a. Tichuan, hnam tin, chi tin, ṭawng tin hmangte chuan Chibai an bûk a, kumkhuain thu a nei ang a, A lalna chu a tâwp ngai lo vang.

¹⁵Kei, Daniela hi zâna ka thil hmuh chuan min tithlaphâng a, ka buai rilru hle a.

¹⁶Chûng thil te chu engtihna nge tih min hrilh fiah tûrin chuta ding zînga pakhat chu ka pan a.

¹⁷Ani chuan, “Hêng sakawlh palite hi leia lalram lo awm tûr palite an ni;

¹⁸mahse, Chungnungbera mi thianghlimte chuan ram chu an nei ang a, kumkhuain an nei dâwn a ni,” a ti a.

¹⁹Sakawlh palina chungchâng hriat chian lehzual ka duh a, sakawlh dang a ang ve lo, thîr hâ leh dâr tin nei kha a hlauhawm êm êm a. A mante chu a seh sawm a, a chîl nek a, a tiboral ṭhîn.

²⁰A lu-a ki sâwm awm chungchâng te, ki dang pakhat lo chawr, ki dang aia hlauhawm tak, mit nei, kâ pawh nei, chapo taka uang thâwng thâwng ṭhîn ki dang pathum rawn tâwn phawngtu chungchângte chu ka hre châk hle a ni.

²¹Ka en reng lai chuan ki chuan mi thianghlimte chu a bei a, a hneh ta mai a.

²²Hmakhawsânga chu a lo kal a, Chungnungbera mi thianghlimte chu thiam a rawn chantîr a, mi thianghlimte lal hun chu a lo thleng ta a ni.

²³Sakawlh palina chungchâng hetiang hian min hrilh: “Leiah lalram palina a lo awm ang, A dangte aia danglam a ni, Lei pum pui a hneh ang a, A tichhia ang a, a chîl nek ang.

²⁴Ki sâwmte kha chu ram lal tûrte an ni, Lal dang a lo lal ang a, A hmasate ai chuan dang tak a ni ang, Lal pathum chu a hneh ang.

²⁵Chungnungbera kalhin thu a sawi ang a, Chungnungbera mi thianghlimte chu a ching chau vang a, An dânte leh kût nite tihdanglamsak a tum ang a, Kum thum leh a chanve chu a thuhnuaiah an awm ang.

²⁶Mahse, rorêlna chu ṭan a ni ang a, A lalna chu lâksak a ni ang a, Tihchhiat hlauh a ni ang.

²⁷Ram te, lalna te, vân hnuaia a ram ropui takte chu, Chungnungbera mi thianghlimte an pe ang a, Kumkhuain an lal ang a, Leia rorêltu zawng zawngin an rawngbâwlin an thu an awih ang.

²⁸Chu chanchin chu heti zawng hi a ni.” Kei Daniela hian ka hlau êm a, ka dâng ta sâwp sâwp a, rilruin ka pai ru ta reng a.