Read Mizo Lushai Daniela 8 Bible Online

Daniela 8 - Mizo Lushai bible

Daniela 8

¹Belsazara lal kum thum kum chuan kei Daniela hian inlârna, a ṭum hnihna chu ka hmu leh a.

²Inlârnaah chuan Elam biala awm Susan khawpui chhûngah ka lo awm a. Ulai lui kamah ka lo ding a.

³Ka han en chuan ki sei tak pahnih nei berâmchal ka hmu a, pakhat chu a sei zâwk a, a ṭo hnuhnûng zâwk a ni bawk.

⁴Chu berâm chuan khawthlang lam te, hmâr lam te, chhim lamte a phîn ruai a, sa pakhat mah lo cho ngam an awm lo va, a laka invêng him thei rêng an awm hek lo. A duh ang angin a che a, a inhrosa ta vak vak a.

⁵Engtihna nge ni ang tih ka ngaihtuah lai chuan khawthlang lam aṭangin kêlchal, lei pawh rap hman lo khawpa chakin a lo tlân a, a mit inkârah ki pakhat sei zet hi a awm a.

⁶Lui kama berâm ding ka hmuh kha a rawn pan a, a theihtâwpa chakin a rawn phîn a.

⁷Berâm chu a rawn hnaih a, a si ta vak a, a ki pahnih chu a sîk tliahsak a, eng mah a ti thei ta lo va. Berâm chu leiah a si thlu a, a chîl ta nek a. Berâm chu a lak aṭanga chhan chhuak thei tu mah an awm lo.

⁸Kêlchal chu a thâwm a na ta hle a; mahse, a ropui vânglai tak chuan a ki chu a tliak ta a; a aiah ki pali, kâwlkil li kâwk far, sei tak a lo ṭo ta a.

⁹ki pali zînga pakhat aṭang chuan ki tê tak tê hi a lo chawr chhuak a, chhim leh khawchhak lamah a ṭhang uak uak a, ram ropui lamah chuan a ṭhang a.

¹⁰Vâna mipuite tluk a tum a, chûng zînga mi leh arsi ṭhenkhat chu leiah a paih a, a chîl nek a.

¹¹Vân mipuite hotupa tlukin a intiropui a, hâlral thilhlan, eng lai pawha an hlan ṭhin chu a tihtâwpsak a, Hmun Thianghlim pawh chu a tichhe bawk a.

¹²An bawhchhiatna avângin mite chuan thilhlan an hlan reng ṭhin chu an bânsan a, thutak chu leiah an paih thal dêr a, ki chuan a duh duhin thil a ti ta a.

¹³Vântirhkoh pakhat ṭawng ka hria a, vântirhkoh dangin a hnênah, “Inlârnaa thil hmuh hi eng chen daih tûr nge, thilhlan an hlan ziah ṭhin chu eng chen nge bawhchhiatna râpthlâk tak chuan a lan ang? Eng chen nge Hmun Thianghlim leh ram ropui ber chu duh duha an sawisak ang?” a ti a.

¹⁴Pakhat zâwk chuan a chhâng a, “Zîng leh tlai tina thilhlan an hlan ṭhin chu ṭum sânghnih leh zathum an hlân lo vang. Chumi hnuah Hmun Thianghlim chuan ngai a awh leh ang,” a ti a.

¹⁵Kei, Daniela hian chûng ka thil hmuh awmzia chu hriat ka duh a. Mihring ni âwm tak ka hmaah a lo ding a.

¹⁶Ulai lui kam lehlam aṭang chuan mi pakhat aw ka hria a, “Gabriel, a thil hmuh kha hrilh fiahsak rawh,” a ti a.

¹⁷Ka dinna bulah a lo kal a, ka hlau êm a, ka tlu bawkkhup ta a. “Mihring fapa, i thil hmuh kha khawvêl tâwp hun tûr entîrna a ni tih hre rawh,” mi ti a.

¹⁸Thu a sawi lai chuan eng mah hre lovin leiah ka tlu bawkkhup a; mahse, mi rawn chelh a, mi dintîr a.

¹⁹“Thinurna a lo thlen hun tûr ka hrilh dâwn che a ni, i thil hmuh hi khawvêl tâwp hun tûr thil a ni.

²⁰Ki pahnih nei berâmchal i hmuh kha Media leh Persia lal entîrna a ni.

²¹Kêlchal hmul thum kha Grik lal entîrna a ni, a mit inkâra ki sei tak kha an lal hmasa ber entîrna a ni.

²²Ki tliak ta aiawh tûra ki pali lo chawr khân Grik ram hmun li-a inṭhen tûr a entîr a; amaherawhchu, lal hmasa ber ang khân an chak lo vang.

²³“Chûng ram lalte an tlâwm dâwn hunah, An sual vâwrtâwp thlen dâwnin Râl rêl thiam tak a lo kal ang.

²⁴Thil a tithei hle dâwn a, Engkim a tichhe rem rum ang. A tih apiangah a hlawhtling ang a, Hnam tam tak a tichhia ang a, Hmun Thianghlim chungah pawh a che ang.

²⁵A fin a kherek êm êm a, vervêk taka a thiltihte a hlawhtling zêl a, A inngairopui hle ang a, Inring hman lote a bei ang a, a tichhia ang, Hotute hotu meuh pawh a cho vang.

²⁶“Zîng leh tlai tin thilhlan an hlan ṭhin chungchâng inlârna i hmuh kha a lo thleng ngei ang a; amaherawhchu, i thil hmuh hi i zêp tlat tûr a ni, rei tak hnua lo thleng chauh tûr a ni si a,” a ti a.

²⁷Kei, Daniela hi ka chau dêr a, ni eng emaw zât chu ka dam lo va. Ka thawh peih hnu chuan lal hna chu ka thawk zui leh ta zêl a; mahse, ka thil hmuh avâng chuan ka bo map a, a ngaihna rêng ka hre lo.