Read Mizo Lushai Daniela 9 Bible Online

Daniela 9 - Mizo Lushai bible

Daniela 9

¹Media mi Daria, Ahasuera fapa chu, Babulon ram lal a ni a.

²A lal kum khatnaah chuan, kei Daniela hian, lehkhabu chu ngun takin ka chhiar a; kum sawmsarih chhûng Jerusalem khua a ram tûr thu LALPA zâwlnei Jeremian a hrilh lâwk chungchâng kha ka ngaihtuah a.

³Chaw ngheia saiip puan sin chungin vaivutah ka ṭhu a, LALPA Pathian hnênah ṭhahnemngai takin ka ṭawngṭai a.

⁴ LALPA, ka Pathian hnênah chuan ka ṭawngṭai a; ka mite thil sual tih avângin thupha ka chawi a. “LALPA Pathian, i ropui a, kan chawimawi a che. I thuthlungah i rinawm a, nangmah ngainaa i thupêk zâwmtute chu i lainat reng a.

⁵Kan sual a, kan ṭha lo va, thil dik lo kan ti a, i thupêk leh i dânte kan hawisan a.

⁶Kan lal te, kan hotu te, kan pa te leh hnam pum hnêna i chhiahhlawh i zâwlneiten i hminga thu an sawi chu kan ngaithla duh lo va.

⁷LALPA, nang chuan dik takin thil i ti ṭhîn a, keini zawngin mahni kan intimualpho ta a nih hi; Judai rama la awm te, Jerusalema awm te, an sual vânga ram tin ram tanga i tihdarh Israel-te nên angkhat vek kan ni.

⁸Kan lalte, kan hotute leh kan pate chu zahpuiawm takin an khawsa a; LALPA i chungah thil sual an ti a.

⁹LALPA ka Pathian, nang chuan ngil i nei a, i lakah hel ṭhîn mah ila min ngaidam ṭhîn.

¹⁰Kan Pathian, LALPA aw chu kan hre duh lo va, a chhiahhlawh, a zâwlneite hmanga kan tân Dân a siam chu kan zâwm duh hek lo.

¹¹I aw hre duh lovin Israel mi zawng zawngin i Dân an bawhchhia a, an pênsan ta che. Kan sual avângin i chhiahhlawh Mosia Dân bu-a ziak ânchhiate, hming chhâl meuhva thil ṭha lo thlentîr i tiamte kha kan chungah i rawn thlentîr ta a ni.

¹²Keini leh kan rorêltute chungah, ‘thil ṭha lo ka ti ang,’ i tih chu i rawn ti ta a, Jerusalem phei chu a tluka nâa i sawisak vân hnuaiah a awm lo.

¹³Mosia Dân bu-a ziak thil ṭha lo zawng zawng kan chungah a tla nâ a, kan sualte simin kan Pathian, LALPA lam kan hawi duh lo va, thu dik pawisain a khawngaihna kan dîl duh hek lo.

¹⁴“Chuvâng alâwm, hremna i lo buatsaih diam tawh chu kan chungah a lo thlen tâk ni. Kan Pathian, LALPA chuan engkim dik takin a ti ṭhîn a, keini erawh chuan a thu kan awih ngai lo va ni.

¹⁵“Aw LALPA ka Pathian, i thiltihtheihzia tihlan nân i mite chu Aigupta ram aṭangin i hruai chhuak a, tûn thlengin hming i chher a. Keinin thil sual kan ti a, kan tidik lo a ni e.

¹⁶Aw LALPA dik taka thil i tih ṭhin avângin khawngaih takin Jerusalem chunga i thinurna leh i thinrimna chu la kiang tawh ta che; i khawpui, i tlâng thianghlim Jerusalem chu, kan sual leh kan pate bawhchhiatna avângin kan vêla awmte chuan kamchhe tleuh nân tak an hmang ta si a.

¹⁷Chuvângin, aw kan Pathian, i chhiahhlawh ṭawngṭaina leh dîlna hi lo ngaithla la, i hming ropui nân i hmun thianghlim chim chhe tawh chungah hian i duhsakna hmêl han tilang teh.

¹⁸Aw Pathian, i beng lo chhi la, ngaithla teh; kan chauh tâkzia leh i hming chawi khawpui chhiat hnehzia hi en teh mah; kan dik vânga chutia ngên che kan ni lo, ngil i neih êm avânga ngên che kan ni.

¹⁹Aw Lalpa, ngaithla teh, Aw Lalpa, min ngaidam rawh; Aw Lalpa, ngaihven la, lo che vat teh. I hming ropui nân, aw ka Pathian, i hming chawi khawpui leh i mite avângin muangchâng lul suh,” a ti a.

²⁰Ka sual leh ka mi Israel-te sual thupha chawiin ka ṭawngṭai zêl a, ka Pathian, LALPA hnênah a tlâng thianghlim din thar leh tûrin ka ngên a.

²¹Chutia ka ṭawngṭai lai mêk chuan inlârna hmasaa ka hmuh tawh, Gabriela kha, tlai lam thilhlan hun vêlah chak zetin a lo thlâwk a.

²²A lo thlen chuan, “Daniel, i thinlung mit tivâr tûra lo kal ka ni.

²³Pathian hnêna i ṭawngṭai tirh aṭang khân, ani chuan a hmangaih êm êm che a, a chhâng nghâl che a ni; a chhânna chu ka rawn hrilh dâwn che a ni. Chuvângin, a chhânna hi ngaithla ngun la, i thil hmuh chu ka han hrilh fiah ang e.

²⁴“Sual leh bawhchhiatna ata i mite leh in khawpui thianghlim chhan chhuah nân hapta sawmsarih ruat a ni; sual ngaihdam a ni ang a, kumkhuain dik taka thil tih a ni tawh ang. Inlârna leh hrilhlâwkna chu a lo thleng kim tawh ang a, Hmun Thianghlim chu then fai a ni ang.

²⁵Hei hi chhinchhiah la, hre chiang rawh: Jerusalem din leh tûra thupêk a nih aṭangin Pathian Hriakthiha a lo lan hma chu hapta sarih a ral ang a, Jerusalem chu din thar leh a ni ang a, kawtthlêrte leh kulh bang nghet takte an siam ang. Chu chu hapta sawmruk leh pahnih a ding ang; mahse, an buai hle ang.

²⁶Chumi hnu chuan Pathian Hriakthiha chu eng khaw lawilovah an that ang. Tin, lal thunei tak sipaite lo lian chuan Jerusalem leh Hmun Thianghlim chu an rawn tichhia ang. Tâwpna chu tui lian ang a ni ang, Pathianin a buatsaih indona leh chhiatna chu a lo thleng dâwn a ni.

²⁷Chu lal chuan mite nên hapta khat chhûng tân thu a thlung ang a, hapta chanve a ral hnu chuan inthawina leh thilhlan an hlan ṭhin chu a titâwp ang. Tenawm râpthlâk chu Tempul hmun sâng berah a dah ang; a dahtu chu Pathianin a chhiatna tûr a ruatsak ang a, a chhiat hma chu tah chuan a awm ang.”