Read Mizo Lushai Hosea 10 Bible Online

Hosea 10 - Mizo Lushai bible

Hosea 10

¹Israel chu grep duah tak Rah tiar tuar ang hi a ni ṭhîn a, A rah tam poh leh maichâm a siam tam a, A hausak poh leh an biak lungphun a cheimawi mai.

²An thinlung chu bumnain a khat a, An sual man chu an hmu ngei ang. An maichâm ka tichim ang a, An biak lungphunte pawh ka tichhe vek ang.

³‘LALPA kan ṭih lo va, lal kan nei ta lo va ni, Nei pawh ni ila, Kan tân eng nge sâwt ang?’ an la ti ang.

⁴An ṭawng mai mai a, Dâwtin chhia an chham a, thute an thlung a, Lei rih thlûra hlo har a khat tlat ang hian Dikna an dîp raltîr.

⁵Samari khawpuia chêngte chu, Beth-aven bâwngno lim avâng chuan Hlauvin an khûr ang a, A ropuina tihchhiat a nih avângin Mite chu an ṭap ang a, A puithiamte chu an chiau vawng vawng ang.

⁶Asuria lal ropui tak pêk tûrin Berâmno lim chu an kalpui ang a, Efraim chu a mualpho let dêr ang; A remruat avângin Israel chu a zak hle ang.

⁷Tuiin hnâwl a lên ang hian, Samari lal pawh an hruai ang.

⁸Israel-te suahsual bâwlna Aven hmunsângte chu tihchim a ni ang. A maichâmah hlîng leh hnimhlîngnei a ṭo chûk ang a, Mite chuan tlâng hnênah, ‘Min khuh rawh,’ an ti ang a, Mual hnênah, ‘Min delh rawh,’ an ti ang.

⁹Aw Israel, Gibea khuaa thil sual in tih ang kha, In la ti zui ta zêl a, Gibea khuaah indonain a nangchîng ang che u.

¹⁰Hêng mi sualte hi ka bei ang a, Ka hrem ang. Anmahni bei tûrin hnam dang an ṭangrual ang a, An sualna avângin hrem an ni ang.

¹¹Efraim chu buh chîl peih tak bâwngla hmin tawh angin, A nghâwng mawiah nghâwngkawl ka bât ang a, Efraim chuan lei a rît ang a, Juda chuan lei a let ang a, Jakoba chuan leitlang a tidip ang.

¹²In leiletah dikna theh ula, Khawngaihna in seng dâwn nia; In ram khêk chu let ula, LALPA chu zawn hun a ni, A lo kal ang a, mal a sâwm ang che u.

¹³Sualna in theh a, in khawloh zawh tâk hi. Mahni inbum in ni. Mahni chaknaah in innghat a, In sipai ngah in chhuang vei si.

¹⁴Chuvângin, indopuiin in mite a nang ang a, In kulh zawng zawng a chhe vek ang. An inbeiha Beth-arbel khua Lal Salmanan a sawisa ang khân, Nunau lamin thah in ni ve ngei ang.

¹⁵Nangni Bethel-a awmte u, in sual êm avângin Chûng thilte chu in chungah a lo thleng dâwn, Zînga inbeihna an ṭan veleh Israel lal chu a thi nghâl ang.