Read Mizo Lushai Hosea 11 Bible Online

Hosea 11 - Mizo Lushai bible

Hosea 11

¹Israela chu a naupan lai aṭangin ka hmangaih a, Ka fa atân Aigupta ata ka ko chhuak a.

²Ka koh zin poh leh min hlat sauh zêl a, Baal hnênah an inthawi a, Milem hnênah rimtui an hlân hlauh ṭhîn.

³Efraim chu keimah ngeiin kal ka zirtîr a, A bânah ka kai ṭhîn. Nimahsela, ka awmtlei an ni tih an hre lo.

⁴Khawngaih leh lainat takin Anni chu ka hruai dial dial a, An phurritte ka chhâwk a, Duat takin ka châwm ṭhîn.

⁵Chuti chung pawhin mi bêl duh lo va, Aigupta-ah an kîr leh ang a, Asuria-in a awp bawk ang, Anmahni remruat chauh an zawm avângin.

⁶An khawpuiah khandaih a lêng ang a, An kulh kawngkhârte chu a chhe vek ang.

⁷Ka mite chuan min hawisan tlat a, An nghâwngkawl rih avângin. Chungnungbera an au vang a, Mahse, tu man an hlihsak lo vang.

⁸Efraim, engtin nge ka bânsan theih ang che? Adma angin engtin nge ka tihchhiat theih ang che? Zeboim angin engtin nge ka sawisak theih ang che, Ka lungrilah i châm tlat a, Ka hmangaih zual deuh deuh che a ni.

⁹Ka thinrim nasa tak chu ka hrithla lo vang a, Efraim chu ka tichhe leh tawh lo vang. Pathian ka nih hi, mihring ka ni lo ve, In zînga chêng, Mi Thianghlima chu thinrimin ka lo kal tawh lo vang.

¹⁰ LALPA chu sakeibaknei angin a rûm ang a, Tichuan, anni chuan an zui ang, Ring takin a au vang a, Khawthlang lam aṭangin a fate an lo haw hlawk hlawk ang.

¹¹Aigupta ram aṭangin sava thlâwk anga chakin an lo chho vang a, Asuria ram ata ṭhuro angin an lo chhuk bawk ang. Tichuan, an ramah ngei ka chêntîr leh ang, LALPA thuchhuak chuan a ti.

¹²Efraim chuan dâwt min hrilh kual min hrilh kual a, Israel-te chuan bum an hrât êm êm a, Juda pawhin Pathian, Mi Thianghlima leh Rinawma chu A dodâl reng a ni.