Read Mizo Lushai Hosea 12 Bible Online

Hosea 12 - Mizo Lushai bible

Hosea 12

¹Efraim chuan thil sâwt lo a ûm a, Nilêng lêngin khawchhak lam lalte tlawnin a buai; Dâwt sawi a hrât a, tharum thawh a uar, Asuria nên thu an thlung a, Aigupta-ah hriak a thawn.

² LALPA chuan Juda-ho chungah vuina a nei. Jakoba chu a awm dân sual avângin a hrem ang a, A thil tih ang zêlin a thungrûl ang.

³Chhûla a awm laiin a unau keartuiah a man a, A vânglaiin Pathian a buan a,

⁴Vântirhkoh chu a bei a, a hneh ta a, Malsâwmna dîlin a ṭap a, Bethel-ah Pathian a hmu a, Ani chuan thu a lo hrilh a.

⁵A ni, LALPA, Engkim Pathian chu a hming LALPA a ni.

⁶Chuvângin, i Pathian hnênah kîr leh la, Khawngaihna leh dikna ngaina la, I Pathianah chuan innghat rawh.

⁷Sumdâwngten bûkna dik lo an hmang a, Bum an chîng êm êm.

⁸Efraim chuan chapo takin, ‘Ka hausa a, sum leh pai ka ngah a, Eng mah tihsual ka nei lo,’ a ti.

⁹Kei hi LALPA, i Pathian, Aigupta ram aṭanga hruai chhuaktu che ka ni. Thlalêra in hnêna ka lo kal lai ang khân, Puan inahte ka chêntîr leh ang che u.

¹⁰Zâwlnei hmangin thu ka sawi a, Inlârna tam tak ka hmuhtîr a, Tehkhin thuin anni chu ka zirtîr ṭhîn.

¹¹Gilead chu a bawhchhiatna avângin Eng mah a ni ta lo, Gilgal-ah pawh bâwng lem an bia a, An maichâmte chu leilet zâwla Lung paih khâwm ang mai a la ni ang.

¹²Jakoba chu Aram bialah a tlânchhia a, Israelan nupui man a tuak a, Berâm vênah nupui a hlawh.

¹³ LALPA chuan Aigupta aṭanga a mi Israel chu zâwlnei hmangin a hruai chhuak a, Anni chu zâwlnei hmangin a enkawl ṭhîn.

¹⁴Mahse, Efraim chuan a tithinur nasa êm êm a, Chuvângin, an thisen chhuah mawh chu an phur ang, LALPA an timualpho va, an mualpho ve ngei ang.