Read Mizo Lushai Hosea 13 Bible Online

Hosea 13 - Mizo Lushai bible

Hosea 13

¹Efraim a han ṭawng chuan Israel hnam dangte an khûr a, An zîngah ngaihsân a ni ṭhîn. Baal biaa a sual tâk avângin a chhe ta a ni.

²Tûnah pawh hian an sual zual deuh deuh va, Tangkaraw milimte an chhûng a, Chûng milimte chu an duh dân ang taka Kut themthiamte siam a ni. Mihringa inthawite chuan Bâwngno limte lam pawh ‘Fawh tûr,’ an ti ṭhîn.

³Chuvângin, zîng ṭiauchhûm ang te, Dai tla ral leh thuai ṭhîn ang te, Hruihzâwla buhsi thli len bo ang te, Tukverha meikhu chhuak ang te an ni ang.

⁴Kei hi LALPA in Pathian, Aigupta ram ata hruaichhuaktu che u ka ni, Keimah lo chu Pathian dang in hre lo va, Chhandamtu dang in neih hek loh kha.

⁵Thlalêr ram rovahte khân ka kaihruai che u a.

⁶Anni chu tlai takin ka hrai a, An puar hnu chuan an chapo va, Min theihnghilh ta a ni.

⁷An tân sakeibaknei ang ka ni ang a, Keite angin anni chu kawngah ka lo châng ru ang.

⁸A note lâksak savawm thinur angin An lung tuamtu ka haithlêr ang a, Sakeibaknei angin an sa ka ei ang a, Ram sakawlhte angin ka pawt sawm ang.

⁹Israel, nangmah ṭanpuitu mi do hi I chhiat phah dâwn a nih hi.

¹⁰Lal leh hotu in dîlte kha In khawpuite chhan tûrin khawnge an awm tâk?

¹¹Thinur chungin lal ka pe che u a, Ka thin a rim vângin anni chu ka la bo leh ta.

¹²Efraim khawlohna chu ziak vek a ni a, An suahsualnate pawh chhinchhiah vek a ni.

¹³Nau vei angin a na thut ang a, Mahse, pian huna chhuah nachâng hre lo nau ang hi a ni.

¹⁴Seol thiltihtheihna ata chhanchhuakin, Thihna lak ata ka tlan dâwn em ni? Aw thihna, khawnge i hri chhia chu? Aw Seol, khawnge i tihchhiat theihna chu? Khawngaihna mitin ka en dâwn tawh lo.

¹⁵A unaute zîngah lo hmuingîl mahse, LALPA thlî, khawchhak lam aṭangin a lo tleh ang a, Thlalêr aṭangin a rawn nuai ang. Luikawrte pawh a châr vek ang. A ro khâwl khâwm zawng zawng pawh an lâksak ang.

¹⁶Pathian laka a hel avângin Samaria chuan a sual man a têl ang, Khandaiha thah an ni ang a, Nausênte chu lei vuak nân an hmansak ang a, Nau pai laite pum chu an taithlêr ang.