Read Mizo Lushai Hosea 14 Bible Online

Hosea 14 - Mizo Lushai bible

Hosea 14

¹Aw Israel, i Pathian, LALPA hnênah kîr leh rawh, I bawhchhiatna avângin i tlûk tâk hi.

² LALPA hnênah kîr leh ula, Hetiang hian thupha chawi rawh u: “Kan bawhchhiatna zawng zawng la bo la, Kan tihṭhatte lo lâwm ang che. Tichuan, fakna inthawina kan hlân ang che.

³Asuria chuan min chhan thei lo va, Indona sakawr chuan min hum thei bawk hek lo. Kan kutchhuakte hnênah, ‘Kan Pathian in ni,’ Kan ti tawh ngai lo vang. I hnên aṭang hian a ni fahrahten khawngaihna an dawn ṭhîn ni,” tiin.

⁴An rinawm lohna chu ka tihdamsak ang a, Anni chu ka hmangaih hrim hrim dâwn a ni, An chunga ka thinurna pawh a reh tawh si a.

⁵Israel tân daifîm ang ka ni ang a, Lili angin a lo pâr vul ang. Lebanon tlâng thing angin nghet takin zung a kai ang.

⁶A zârte chu a ṭawi luai ang a, Oliv thing anga mawi a ni ang, Lebanon angin a rim a tui bawk ang.

⁷Ka hlimah an lo chêng leh ang a, Thlai angin an duah hluah hluah ang. Grep angin an rah tuar ang a, Lebanon uain angin an hming a thang ang.

⁸Efraim chuan milem nên inzawmna rêng a nei tawh lo vang a, Keiin ka lo ngaihsak ang a, Ka kaihruai ang. Kei hi fâr thing anga zâr hliahtu chu ka ni, Kei hi malsâwm tinrêng hnâr chu ka ni.

⁹Tu nge finga hêng hi hrethiam ang le? Tu nge hrethiama ngaihtuah chhuak thei le? LALPA kawngte chu a ngîl a, Mi dikte chuan an zawh ṭhîn. Mi sualte erawh chuan an zawh lo va, An tlu thîn.