Read Mizo Lushai Hosea 2 Bible Online

Hosea 2 - Mizo Lushai bible

Hosea 2

¹In unaupate chu, ‘Pathian mi in ni,’ ti ula, in farnute pawh ‘Pathian lainat in ni,’ ti ang che u.

²“Ṭan suh u, in nu hi ṭan tawh suh u, Ka nupui a ni tawh lo va, A pasal ka ni tawh hek lo. A uire mit men hi bânsan sela, A inpho îtawm hi sim rawh se.

³A duh loh chuan a silhfên ka hlihsak vek ang a, A pian ni ang maia saruakin ka awmtîr ang. Thlalêr ram ro tak angin ka siam ang a, Tuihâl dang chârin a thi ang.

⁴A fate pawh ka lainat lo vang, Uire fa an ni si a.

⁵Anmahni paitu, an nu chu a zahpuiawm hle mai, Ngaihzâwng a nei a, ‘Chaw te, tui te, sahmul te, puan te, hriak te, In tûr te min petu, ka ngaihzâwng ka pan dâwn,’ a ti a.

⁶Chuvângin, a kawng hlîngin ka hnawh ang a, Amah dâl nân bang ka siam ang. Tichuan, a kawng a hloh tawh ang.

⁷A ngaihzâwngte a ûm ang a, a ûm pha chuang lo vang, Anni chu a zawng ang a, a hmu hek lo vang. ‘Ka pasal hnênah ka kîr leh teh ang. Tûn ai hian ka chan a ṭha zâwk si a,’ a ti a.

⁸Chaw te, uain te, oliv hriak te petu Ka nih a hre si lo. Baal hnêna a hlan rangkachak leh tangkarua pawh ka pêk a ni.

⁹A seng hunah ka buh leh uain ka lâksak ang a, A saruak khuhna tûra ka pêk sahmul leh la ka lâksak bawk ang.

¹⁰A ngaihzâwngte hmaah saruakin ka awmtîr ang a, Ka kut ata tu man an chhan chhuak lo vang.

¹¹An hlimna hun, an kum tin kûtpui te, Thla thar kût te, sabat ni te, khâwmpui tinrêng te nên ka titâwp ang.

¹²Grep leh theipui kûng, a ngaihzâwng hnêna a hlawh, ‘Min pêk,’ a tih ṭhin chu ka tichhe vek ang, Ramhnuaiah ka chantîr ang a, ramsaten an tlân ang.

¹³Bengbeh leh ṭhite awrhin a inchei mawi a, A ngaihzâwngte a chhai ṭhîn. Baal hnênah inthawina a hlân fo, Kei mi theihnghilh avângin ka hrem a ni,” LALPA thuchhuak chuan a ti.

¹⁴“Mahse, ani chu zaidam takin ka thlêm ang a, Thlalêrah ka hruai ang a, Tah chuan biahthu ka lo hlân ang.

¹⁵A grep huante ka pe kîr leh ang a, Akor ruam chu beiseina kawngkaah ka siamsak ang, Aigupta ram ata a lo chhuah lai, A tleirâwl lai nite ang khân, Lâwm takin min lo chhâwn ang.”

¹⁶ LALPA thuchhuak chuan heti hian a ti: “ ‘Baal’ min ti tawh lo vang a, ‘Kan pa’ min ti zâwk ang.

¹⁷Baal hming a lam ṭhin chu ka titâwp ang a, chu hming chu a lam leh tawh ngai lo vang.

¹⁸Chumi ni chuan ramsa te, chunglêng sava te, Leia bawkvâka kalte chu thu ka thlunpui ang a, Ram ata thal te, khandaih te, indona te ka tibo vang a, Thlamuang takin an awm tawh ang.

¹⁹Kumkhua atân nupuiah ka nei ang che a, Ka ta ni tûrin ka hual che a ni. Dik tak leh rinawm taka awmin, Hmangaihin ka lainat ang che.

²⁰Ka pawm kumkhua ang che, Ka tân ka hual tlat tawh che hi, Tichuan, Lalpa ka nih i hre chiang ang.”

²¹ LALPA thuchhuak chuan heti hian a ti: “Chumi ni chuan vân ata ruah ka sûrtîr ang a, Leiin a ṭhatpui ang.

²²Lei aṭangin buh te, grep te, Oliv te, A ṭo vang a, a duah hluah hluah ang. Jezreel ruam pawh a vul leh ang.

²³He ramah hian ka pual atân ka din nghet ang a, Lainatlohvi chu ka lainat ang a, Kaminilova chu ‘ka mi i ni,’ ka ti ang a, Annin, ‘Ka Pathian i ni,’ min ti ang.”