Read Mizo Lushai Hosea 4 Bible Online

Hosea 4 - Mizo Lushai bible

Hosea 4

¹Israel fate u, LALPA thu hi hre rawh u. He ramah hian rinawmna te, khawngaihna te, Pathian hriatna te a awm loh avângin LALPA chuan a chhûnga chêngte a thiam lo a ni.

²Thu an tiam a, an zâwm lo va, Tual an that a, rûk an ru a, An uire a, serh leh sâng rêng an nei lo, Inzawm zatin tual an that.

³Ram chuan a tuar ang a, A chhûnga awm zawng zawng an chau vang, Tuipui sangha chenin an boral ang.

⁴Tu mah inhêkin tu mah lo indem suh u, Nangni puithiamte hi a ni ka demte chu.

⁵A chhûn a zânin in tlu in tlu a, Zâwlneite pawh nangmah ang chauh an ni, I nu, Israel chu, ka tiboral ang.

⁶Ka miten min hriat duh loh avângin an boral a, Nang pawhin min hriat duh loh avângin Ka puithiam ata ka bân che hi, I Pathian dânte i thlahthlam a, Kei pawhin i fate ka thlahthlam ve ang.

⁷An tam poh leh ka laka sual an tam a, An ropuina chu an mualphonaah ka chantîr ang.

⁸Ka mite sualna chu chênin an inei thau va, Sual zêl se an ti êm êm.

⁹An awm dân leh an thiltih avângin ka hrem ang, Mipui leh puithiamten angkhatin an tuar ang.

¹⁰Inthawina sa an ei ṭeuh ṭeuh va, An kham si lo, Chi ṭhatna pathian an pan a, fa an ngah chuang lo, LALPA chu an hawisan avângin.

¹¹Hurna te, uain te, zu te hian Thinlung a hruai bo ṭhîn.

¹²Ka miten an thing serh an râwn a, An tiangin inlârna an zawng a, Milem biak an châkna chuan a hruai bo va, An Pathian chu uiresanin an hawisan ta.

¹³Tlâng chhîpahte an inthawi a, Tlâng pangahte rimtui an hâl, Sasua te, beraw te, hriang thingbuk hnuaiah te, In fanute an inphalrai a, In mote pawh an uire ṭhîn.

¹⁴An sualna leh uirena avângin In fanute leh in mote chu ka hrem lo vang. Nangni ngei hi nawhchizuar tawmpuitu, Milem hnêna inthawina eitu in ni a, Chinchâng hre lote chu tluchhe âwm rêng an ni.

¹⁵Aw Israel, nang chu uire mah la, Juda zawng uire ve lul suh se, Gilgal-ah te, Beth-aven-ah te inthawi tûrin chho suh u, Tah chuan LALPA hming chhâlin chhia chham hek suh u.

¹⁶Israel zawng, bâwngla anga luhlul a ni, Phûla berâm tla angin Engtin nge LALPAN a vên theih ang?

¹⁷Efraim chuan milem a be ta a, An duh ang ang chuan awm teh se.

¹⁸Zu hmunah nuam an chên a, suahsual an bâwl zui a, Ngaihsân nih aiin mualpho an thlang.

¹⁹Thlipuiin a la bo vang a, An inthawinate avângin an la zak ang.