Read Mizo Lushai Hosea 5 Bible Online

Hosea 5 - Mizo Lushai bible

Hosea 5

¹Puithiamte u, hei hi hre rawh u, Israel mite u, ngaihtuah teh u, Dik taka rorêl tûr in ni a, Mahse, Mizpa-ah thang in kam a, Tabor tlâng thlengin lên in zâr hi.

²Hel hmangho chu tualthahnaah an inrawlh thûk êm a, Ka hrem vek dâwn a ni.

³Efraim chu ka hre chiang a, Israel chu ka lakah thuhrûk a ni lo. Tûnah hian Efraim chu a uire tâk avângin Israel chu a bawlhhlawh zo ta a ni.

⁴An thiltihte chuan Pathian hnêna an kîr lehna a dâl tlat a. Uire rilru an put hlawm avângin LALPA chu an hre thei lo va ni.

⁵A chapo avângin Israel chu a mualpho va, A sual avângin Efraim pawh a tlu ang a, An zîngah Juda pawh a tlu ve ang.

⁶An berâm leh bâwng rualte hlânin LALPA zawngin inthawi mah se, An hmu lo vang, Anni chu a hawisan tawh si a.

⁷ LALPA lakah vervêk takin thil an ti a, An fate pawh falak an ni, An ram nên lam an chhe thuai ang.

⁸Gibe-ah berâmpa ki hâm ula, Rama khuaah tawtawrâwt hâm rawh u, Beth-aven-ah râlkhêl dâr vua ula, ‘Benjamin, an ûm pha dâwn che,’ ti rawh u.

⁹Efraim chu zilh a nih hunah a chhe vek ang, Israel-te chunga chhiatna thleng ngei tûr chu ka puang e.

¹⁰Juda hruaitute chu ramri lung sawntu ang an ni, Ka thinur chu tui angin an chungah ka leihbua ang.

¹¹Efraim chu rahbehin a awm ta, Milem a be lui tlat si a. A chungthu chhe taka rêlsak a ni.

¹²Chuvângin, kei hi Efraim tingêttu ka ni a, Juda chhûngte tiṭawihtu pawh ka ni.

¹³Efraim chuan a natzia a inhria a, Juda pawhin a hliam natzia a hria, Ṭanpui dîlin Efraim a kal Asuria hnênah, An na leh hliam tidam thei lo lal ropui chu an bêl.

¹⁴Efraim tân sakeibaknei ang ka ni ang, Juda chhûngte tân pawh sakeibaknei vânglai ang ka ni. Keimah ngeiin ka pawt sawm ang a, ka pu bo vang, Ka hnûk chhuak ang a, tu man an chhan thei lo vang.

¹⁵An sual sima ka lam an hawi hma chu Ka awm bosan daih ang a, An hrehawm tuar avâng chuan Ṭhahnemngai takin min la zawng dâwn a ni.