Read Mizo Lushai Hosea 7 Bible Online

Hosea 7 - Mizo Lushai bible

Hosea 7

¹Israel-te tihdam ka tum apiangin Efraim bawhchhiatna ka hmu chiang a, Samaria sualnate nên, An inbum a, mi an rawk a, Kawtthlêrah mi an suam.

²An sualnate ka hre reng tih an ngaihtuah lo, An thil sual tihin an inhaivûr a, ka hmu reng si.

³Lal tihlâwm nân thil sual an ti a, Rorêltute tihlâwm nân dâwt an sawi.

⁴Chhang urtuin a chhang ur nân tuah belh ngai lo khawpa A thuk a tihsat ang hian, thil sual tih an châk ut ut a ni.

⁵Lal an chawimawi ni chuan miliante an rui buai a, Lal pawh a rui mualpho hle.

⁶Mi an phiar a, an thin chu thuk angin a sa a, Meivâpin meiling zâna a khuh, Zînga a lo alh ta hluah ang hi an ni.

⁷An thinur chu thuk ang an ni, An hruaitute pawh an that a, An lalte pawh an râwt a, Tu man mi lam duh lo.

⁸Efraim chu hnam dangte nên an inpawlh ta, Chhang lehlam chauh ur hmin ang hi an ni.

⁹Hnam dang an rinchhan a, an chak loh phah a, Chu chu an hrethiam si lo. An lu ṭuak tawh hle pawh chu an hre lo.

¹⁰Israel-te chu an chaponain a tihmêlhem a, An Pathian, LALPA hnênah an kîr duh lo va, A lam hawi duh tu mah an awm hek lo.

¹¹Efraim chu ngaihtuahna nei lo ṭhûro ang hi a ni, A chângin Aigupta a au va, a chângin Asuria a pan.

¹²A kalna apiangah lênin ka khuh ang a, Chunglêng sava angin ka man khâwm ang. An thiltih sual avângin ka hrem dâwn a ni.

¹³Min hawisantute chu an chung a pik e, Ka laka an hel avângin chhiatnain tlâkbuak rawh se. Anni chu chhandam ka duh a, a derin min be si.

¹⁴An thinlung chhûngril takin min au lo va. Milem biate angin khum laizâwlah an chiau an chiau va, Zu leh chaw dîlin an inzai thi zawih zawih a, Ka lakah an va hel nasa teh rêng êm!

¹⁵Keimah ngeiin anni chu ka zirtîr a, ka thuam a, Anni erawh chuan min phiar a, min do lêt ta.

¹⁶Chung lam an hawi duh lo, Thalngul rul tawh, hman tlâk loh ang an ni. An hruaitute an ṭawng chaltlai êm avângin khandaiha thah an ni. Aigupta miten an va nuihzat dâwn êm!