Read Mizo Lushai Hosea 8 Bible Online

Hosea 8 - Mizo Lushai bible

Hosea 8

¹Ka miten ka thuthlung an bawhchhia a, Ka dân an zawm loh avângin Mupui bir angin hmêlmate an lo thawk e, Râlkhêl tawtawrâwt hâm rawh u.

²‘Aw Pathian, keini Israel chuan kan hria che asin,’ Tiin min au ṭhîn nâ a,

³Israel-te chuan thil ṭha an hnâwl a, Hmêlmate chuan an ûm dâwn a ni.

⁴Ka rem tih lohvin lalte an thlang a, Ka hriatpui lohvin hruaitute an ruat bawk a, An tangkarua leh rangkachaka siam milemte chu An chhiat phah dâwn a ni.

⁵Samari mite u, in bâwngno lim biak chuan Min va ngei tak êm! In chungah ka thinur êm êm a ni, Engtikah tak milem biak hi bânsan ang maw!

⁶Israel themthiamte siam milim chu Pathian a ni lo ve. A ni, Samari khuaa an biak bâwngno lem pawh Tihkehsawm vek a ni ang.

⁷Thlifîm a tleh a, thlipuiin a nuai dâwn a ni, An thlai chîn chu a vui lo vang a, a rah hek lo vang, Rah mah se, hnam dangte ei tûr mai a ni.

⁸Israel chu hnam dangin an chîm ral ta, Bungbêl hman tlâk loh ang mai an nih tâk hi.

⁹Ram sabengtung luhlul ang maiin, Asuria bêl tûrin a chhoh tâk saw. Efraim chu a ngaihzâwngte hnênah a inhralh ta.

¹⁰Hnam dang zîngah inhralh mah se, Anni chu ka vai khâwm ang a, An belh lal ropui tihduhdah tuarin An kun tlawk tlawk ang.

¹¹Efraim chuan bawhchhiatna hmun atân Maichâm a din belh zêl a, Chûng maichâm chu suahsual an bâwlna hmun a ni si a.

¹²Ka dânte ziaksak ṭeuh mah ila, Mi dang tân leka ngaiin an hnâwl a.

¹³Inthawina hlan te, a sa eite an lâwm a, Mahse, LALPA lâwmzâwng a ni si lo, An bawhchhiatnate a hre reng a, an sual avângin a hrem ang a, Aigupta ramah a kîrtîr ang.

¹⁴Israel chuan anmahni siamtu an theihnghilh a, Lal in ropui tak an sa a, Juda chuan khawpui kulh nei a din belh zêl a, Mahse, chûng khawpuite chu ka hâl ang a, An in ropuite chu a kâng fai vek ang.