Read Mizo Lushai Hosea 9 Bible Online

Hosea 9 - Mizo Lushai bible

Hosea 9

¹Aw Israel-te u, hnam dangte kût hmangin Hlim ve bûng bûng suh u, Chu chu in Pathian laka uirena a ni. Hruihzâwl tina i nawhchizawrh hlawh chu i thlahlel a,

²Hruihah leh grep khurah chuan Kham khawp i hmu lo vang, Uain thar tûr a awm hek lo vang.

³ LALPA ramah an chêng reng lo vang, Efraim chu Aigupta ramah a chhuktîr ang a, Ṭhenkhat chuan Asuria ramah ei thiang lo an ei ang.

⁴ LALPA hnênah uain an hlân lo vang a, An inthawinate chuan a tilâwm hek lo vang. Lusûnte ei ṭhin ang chaw an ei ang a, a ei apiang an bawlhhlawh ang. An chaw chu anmahni pumpuarna mai a ni ang a, LALPA hnên a thleng lo vang.

⁵ LALPA puala khâwmpui urhsûn a lo thlen ni chuan, Eng nge in tih tâk ang le?

⁶Chhiatna lo thleng tlânsantute chu, Aigupta-ah an tlân khâwm ang a, Memfis hmunah phûm an ni ang. An tangka ro hlûte kangṭhaiin a bâwm ang a, An chênna inahte pawh hnimhlîngnei a khat ang.

⁷Hremna ni chu a lo thleng ta, Sual man hmuhna ni chu. Israel-te u, hre teh u, In sual êm avâng leh in luhlul êm avâng zâwkin Zâwlnei chu, ‘mi â’ in ti a, Thlarau mi chu, ‘Mi â bawraw,’ in ti ṭhîn.

⁸Zâwlnei chu, ka Pathian mi, Efraim-ho vêngtu a ni a, A kalna apiangah thang an lo kam a, A Pathian inah pawh an dodâl a ni.

⁹Gibea khuaa suahsualna ang khân an sualna chu a râpthlâk a, Pathianin an bawhchhiatnate a hre reng si a, An sualna avâng chuan a hrem ngei dâwn a ni.

¹⁰Israel chu thlalêrah khân grep angin ka hmu a, In pate pawh theipui hmin hmasa angin. Nimahsela, Peor tlânga Baal chu an pan a, An ngaihzâwng pathian tenawm tak ang chuan Zahpuiawm takin an awm ta a.

¹¹Efraim ropuina chu sava angin a thlâwk bo ta, Nau hring te, nau pai te an awm tawh lo vang.

¹²An fate awmtlei mah se, An vaiin an sûn vek ang a. Anni chu ka kalsan hun chuan, An chan a va chau dâwn tak êm!

¹³Efraim chu Tura angin ram ṭha taka a awm ka hmu a, Mahse, Efraim chuan thah atân mai fa a ngah a ni.

¹⁴Aw LALPA, an tân eng nge i tihsak ang? Nau chhiattîr la, an hnutetui tikang ang che.

¹⁵Gilgal-ah an sualna a hluar ṭan a, Tah chuan a ni ka huat tâk ni. An thil sual tihte avângin ka hmangaih tawh lo vang. An hruaitu zawng zawngin min helsan ta si a.

¹⁶Efraim chuan chhiat a tâwk ta, A zung chenin a ro zo va, Rah a chhuah thei ta lo. Nau pawh hring se, an duh lai, An rîla rah chu ka tihlum ang.

¹⁷A thu an awih loh avângin Ka Pathian chuan anni chu a hnawt darh ang a, Hnam dang zîngah an vâkvai ang.