Read Mizo Lushai Joela 1 Bible Online

Joela 1 - Mizo Lushai bible

Joela 1

¹Pethuela fapa Joela hnêna LALPA thu lo thleng chu:

²Nangni upate u, hei hi ngaithla ula, Ram chhûnga mi zawng zawngte u, ngaihtuah rawh u: In hun lai leh in thlahtute hun lai khân Hetiang thil hi a lo thleng tawh rêng em?

³Hei hi in fate hrilh ula, annin an fate hrilh sela, An fa lehte pawhin chhuan dang hrilh zêl rawh se.

⁴Khau puangin thlai a rawn bawh a, Rual khatin an ei bâng chu rual dangin an rawn ei a, An ei bâng chu rual dangin an rawn ei fai.

⁵Zu hehho, harh ula, ṭap vak vak rawh u, Uain hehho, chiau vawng vawng rawh u. Uain in tûr in nei dâwn tawh lo.

⁶Khau rualin kan ram an tuam, chak tak an ni, Chhiar sên rual an ni lo; An ha chu sakeibaknei ha ang a ni a, An ngho pawh keipui ngho ang mai a ni.

⁷Ka grep hrui an tichhia a, Ka theipui kûng an ei kawlh, A pil an khel fai a, an ṭînsan a, A zârte chu a ro zo ta.

⁸Nulain a pasal hual thi a sûn angin Saiip puan sinin ṭap rawh u.

⁹ LALPA ina hlan tûr uain te, thlai te a awm ta lo, LALPA rawngbâwltu puithiamte pawh an lungngai zo ta.

¹⁰Lo a chhe zo va, lei a ro vek a, Buh a kawlh zo ta. Uain a hâw ta lo va, hriak pawh a thar ta hek lo.

¹¹Lo nei mite u, lungngai ula, grep enkawltute u, ṭap rawh u, In lovah huit leh barli seng tûr a awm ta lo.

¹²Grep hrui a vuai a, theipui kûng a ro zo va, Theibuhfai te, tûm te, apple te, Lova thing tinrêng a ro zo ta, A ni, mite lâwmna pawh a chuai zo ta.

¹³Kan Pathian rawngbâwltute u, ṭap vak vak rawh u, Lo kal ula, saiip puan sinin Zankhuain mu rawh u, In Pathian inah buh leh uain hlan tûr a awm ta lo.

¹⁴Chaw nghei nân awm ni kham ula, Khâwmpui lian buatsaih rawh u. Upate leh ram chhûnga awm zawng zawng chu In Pathian, LALPA inah ko khâwm ula, LALPA chu au chiam rawh u.

¹⁵A va pawi êm! LALPA ni chu a lo hnai ta, Engkimtitheian chhiatna a rawn thlen dâwn.

¹⁶Kan mit hmuh ngeiah ei tûr a awm ta lo, Kan Pathian ina hlim leh lâwmna chu a reh zo ta.

¹⁷Lei rovah thlai chu a chhe zo ta, Buh a ro avângin buh ina dah tûr a awm lo va, Chhêk inte pawh a ram.

¹⁸Ramsate an mangang a, ranrual an chiai a, Hnim peh tûr rêng an nei ta lo, Berâm rual pawhin an tuar hle.

¹⁹Aw LALPA, ka au va che. Meiin phûla hnimte a kâng zo va, Lova thingte pawh a kâng ral ta si a.

²⁰Ramsate pawhin tuihâlin an au che, Luikawrte a châr vek a, Phûl hnimte meiin a kâng zo ta si a.