Read Mizo Lushai Joela 2 Bible Online

Joela 2 - Mizo Lushai bible

Joela 2

¹Zion-ah tawtawrâwt hâm ula, Ka tlâng thianghlimah inrâlrin nân hâm rawh u. Ram chhûnga awm zawng zawng khûr sela, LALPA ni a lo hnai ta, a thleng ṭêp a ni.

²Chumi ni chu a dul ruih ang a, Chhûm a zîng ang a, khua a dur khup ang. Zîng khawvâra tlâng a lang ṭhut ang hian, Sipai rual lian tak, thiltithei tak an lo thawk ang. Chutiang thil chu tûn hmain a thleng ngai lo va, Tûn hnuah pawh a thleng tawh ngai lo vang.

³Ram kâng angin an hma zâwn an ei zêl a, An kal pelh hnu chu mei kan fai ang a ni, An kal hma chuan ram chu Eden huan ang a ni a, An pelh hnu chuan thlalêr ram ro ang a ni ta, Eng mah zuah an nei lo.

⁴Sakawr rual ang mai an ni, Chak takin indo sakawr angin an tlân.

⁵Indo tawlailîr tlân ri sung sung angin Tlângchhîpahte an kat sup sup. Meiin buhpâwl a kâng hluah hluah ang leh Indo tûra sipai intlar pût ang hi an ni.

⁶An hmabâka awmte chu an mangang a, An hmêl a ngui ruai mai.

⁷Mi huaisen angin hma an rawn sâwn a, Sipai angin bangah an lâwn sup sup a. Mahni hma zâwnah dîng takin an kal a, Tu mah an pêng buai lo.

⁸Innêk buai lovin mahni zâwnah zêl an kal a, Eng mahin an kawng a dâl zo lo.

⁹Khawpui chhûngah an thlâwk lût a, Kulh bangah an vâk sup sup a, Inah an lâwn a, rûkru angin tukverhahte an lût.

¹⁰An kalna lam apiangah lei a nghîng a, vân pawh a khûr, Ni leh thla a thim a, arsi a êng tawh lo.

¹¹ LALPA chuan a sipai rual thu a pe a, A hote chu chhiar sên rual an ni lo. A thu zâwmtute chu thiltithei tak an ni, LALPA ni chu a ropui a, hlauhawm tak a ni, Tu nge dâwl zo vang?

¹²“Tûnah pawh,” tih hi LALPA thuchhuak a ni, Simin ka lam lo hawi rawh u, Chaw ngheiin ṭap ula, chiau vawng vawng rawh u.

¹³In puan pawtthlêr lovin tihtakzetin inchhîr ula, LALPA, in Pathian hnênah kîr leh rawh u; Ani chu khawngaihna ngah, lainatnaa khat, Thinnel tak leh hmangaihnaa khat a ni a; Thil ṭha lo thlentîr a hreh êm êm a ni.

¹⁴ LALPA, in Pathian chuan a khawngaih leh ang che u a, In lam a lo hawi ang a, A hnêna hlan tûr buh leh uain in neih theih nân mal a sâwm lo vang che u tih tu nge hria?

¹⁵Zion-ah tawtawrâwt hâm ula, Chaw nghei nân awmni kham rawh u, Khâwmpui lian buatsaih bawk ang che u.

¹⁶Mipui ko khâwm ula, pungkhâwmho chu thian thianghlim rawh u, Upate ko khâwm ula, Naupangte, hnute hne laite hruai khâwm rawh u. Moneitu chuan a pindan chhuahsan sela, Mo pawh a pindan ata lo chhuak rawh se.

¹⁷ LALPA chhiahhlawh puithiamte chu; Tempul hulhliap leh maichâm inkârah ṭap sela, “Aw LALPA, i mite hi khawngaih la, I rochante hi hnam dang nuihzatbûr leh sawi nawmnaha an awm phal suh ang che; Engah nge chûng mite chuan, ‘Khawiah nge an Pathian chu?’ an tih ang le,” ti rawh se.

¹⁸Tichuan, LALPA chuan a ram chu a rawn ngaihsak a, A mite pawh a khawngaih ta a.

¹⁹ LALPA chuan a mite chu heti hian a chhâng a: “Buh te, uain te, hriak te in kham khawpin ka pe ang che u, Hnam dangte ka hmuhsittîr tawh lo vang che u.

²⁰Hmâr lam aṭanga rawn dotu che u chu Hla takah ka hnawh bosak ang che u a, Ram ruak, eng mah awm lohnaah ka kaltîr ang a, A hmasa pâwl chu khawchhak tuipuiah; A hnuhnûng pawl khawthlang tuifinriatah. An thi rim chu a nam vung vung ang. Nasa taka thil an tihchhiat avângin Anni pawh ka tichhe ve ang,” tiin.

²¹Aw leilung, hlau suh la, hlimin lâwm rawh, LALPA chuan thil ropui tak a ti ta si a.

²²Ramsate u, zâm suh u, ram rote chu hnimin a khat leh ta, Thingte pawh a rah tuar a, Theipui te, grep te a rah leh ta.

²³Zion-a awmte u, hlim rawh u, LALPA, in Pathianah chuan lâwm rawh u, Ruah hmasa chu a tâwk têin a pe che u a; Tûn hma ang khân in tân ruah hnuhnûng a sûrtîr kha.

²⁴Hruihzâwlahte buh a khat ang a, Sâwrkhurte pawh uain leh hriakin a liam zawih zawih ang.

²⁵Khau rualin a eichhiat vek kumte aiah Kum ṭhat kumte ka awmtîr leh ang. Khau puang, a rual ruala lo kal dûl dûlte kha Ka sipai rual, in hnêna ka rawn tirh an ni.

²⁶Ei tûr in ngah ang a, in hnianghnâr ang, Tichuan, in zînga thil mak titu In Pathian, LALPA hming chu in chawimawi ang. Ka mite chu an mualpho leh tawh ngai lo vang.

²⁷“Israel-te zîngah ka chêng a, LALPA, in Pathian chu ka ni, Pathian dang rêng an awm lo tih in hria ang, Ka mite chu an mualpho leh tawh ngai lo vang.”

²⁸“Chumi hnuah chuan, Mi zawng zawng chungah ka thlarau ka leih ang a, In fanu in fapaten ka thu an hril ang. In upaten mumangah an mang ang a, In tlangvâlten inlârnate an hmu ang.

²⁹Chûng ni-ah chuan ka chhiahhlawh a hmei a pa chungah Ka thlarau ka leih ang.

³⁰Lei leh vânah chhinchhiahna mak tak tak ka lantîr ang a, Thisen te, mei te, meikhu ngun ngunte nên.

³¹Ni a thim ang a, thla pawh a sen khuih ang, LALPA ni ropui leh râpthlâk tak a lo thlen hma chuan.

³²Tu pawh LALPA hming lam apiang chhandam an ni ang a, Zion tlâng leh Jerusalem-a mi ṭhenkhat chuan an pumpelh ang a, Ka mi thlante chu an him ang,” LALPAN a tih ang khân.