Read Mizo Lushai Joela 3 Bible Online

Joela 3 - Mizo Lushai bible

Joela 3

¹“Ngai teh, a hun leh a ni ruatah chuan, Judai ram leh Jerusalem chan chu ka tiṭha leh ang a,

²Hnam zawng zawng ka ko khâwm ang a, Jehosafat ruamah ka hruai khâwm ang. Tah chuan an chungthu ka rêl ang a, Ka rochan, ka mi Israel-te chu Hnam dang zîngah an hnawt darh a, Ka ram chu an insem darh avângin.

³Ṭhum an vâwr a, ka mite an insem a, Mipa naupang nawhchizuar lei nân an hmang a, Hmeichhe naupang uain man atân an pe. An rui ta a.

⁴“Nangni, Tura leh Sidon khuaa awmte leh Filistia ram chhûnga awm zawng zawngte u, engtia mi tih nge in tum? Ka chungah phuba lâk in tum elo? In tum a nih zawngin na takin in chungah phuba ka la nghâl ang.

⁵Ka tangkarua leh rangkachak in la a, ka ro ṭha ṭha nên in tempulah in thiar lût a.

⁶An ram ata hla taka an awm theih nân Judai rama mite leh Jerusalem-a awmte chu Grik mite hnênah in hralh ta si a.

⁷Ngai teh u, anni chu in hralh chhuahna ram ata ka hruai chhuak ang a, an chunga in tih angin ka thungrûl ang che u.

⁸In fanu leh in fapate chu Judai rama mite hnênah ka hralh ang a, annin ram hla taka awm Seba mite hnênah an hralh ang,” LALPAN a ti.

⁹Hnamte zîngah hei hi puang rawh u, Indo tûrin inbuatsaih sela, Mi huaisente chu lo thawk rawh se, Indo mi zawng zawng lo hnai sela, rawn bei rawh se.

¹⁰In leilehna hmâwr zum chu khandaihah chher ula, In thei kûng hlawina chem kawm chu feiah siam rawh u, Mi chak lote pawhin, ‘Ka chak a ni,’ ti rawh se.

¹¹Nangni ram chhehvêl hnam dang zawng zawngte u, Hmanhmawh takin lo kal ula, Pung khâwm rawh u. Tah chuan, aw LALPA, i mi huaite rawn tîr ang che.

¹²Hnamte chu inrâlring sela, Jehosafat ruamah lo kal rawh se, Chutah chuan an vêla hnam dang zawng zawngte chu Ro ka rêlsak ang.

¹³An sual êm avângin favah ruai ula, Ât chhum vek rawh u, Sâwrkhur liam zawih zawiha uain an rap angin, Lo kal ula, rap hrep rawh u.

¹⁴Rorêlna ruamah mipui an tam mang e, Chutah chuan LALPA ni a lo thleng thuai dâwn.

¹⁵Ni leh thla a thim ang a, Arsite pawh an êng tawh lo vang.

¹⁶ LALPA thâwm chu Zion aṭangin a lo ri hum hum ang a, Jerusalem aṭangin a aw a chhuah ang, Lei leh vân a nghîng ang a, Mahse, LALPA chuan a mite a hum ang a, Israel-te tân kulhbîng a ni ang.

¹⁷Kei, LALPA hi i Pathian ka ni a, Ka tlâng thianghlim Zion-ah ka chêng tih i hria ang, Jerusalem chu hmun thianghlim a ni tawh ang. Hnam dangten an hneh tawh ngai lo vang.

¹⁸Chutih hunah chuan tlângah grep a khat ang a, Mualahte pawh hnutetui a luang ang. Judai ram kawr zawng zawngah tui a luang ang a, LALPA in aṭangin tuihna a lo chhuak ang a, Sitim ruam a châwm ang.

¹⁹Judai ram mite chungah râwng takin an che a, Pawi khawih lo thisente an chhuah avângin Aigupta ram chu a chhe vek ang a, Edom ram pawh thlalêr ram ro a ni ang.

²⁰Judai ram erawh chu an luah kumkhua ang a, Jerusalem pawh an luah reng ang.

²¹An thisen phuba ka la ang a, Thil tisual chu ka zuah lo vang, LALPA chu Zion-ah a awm si a.