Read Mizo Lushai Amosa 1 Bible Online

Amosa 1 - Mizo Lushai bible

Amosa 1

¹Juda lal Uzia te, Israel lal Joasa fapa Jeroboama te lal lai, lîrnghîn hma kum hnihah khân, Tekoa berâm vêngtu Amosa chuan Israel-te chungchâng inlârna hetiang hian a hmu:

²‘Zion tlâng aṭangin LALPA chu ring takin a au va, Jerusalem khua aṭangin a lo ri hum hum a, Berâm tlatna hmuna hnimhringte chu a ro zo va, Karmel tlângchhîpa hnimte pawh a ro zo ta,’ a ti a.

³ LALPA chuan heti hian a ti: “Damaska mite chu chin tâwk nei lovin an sual a, Ka hrem ngei ngei dâwn a ni. Gilead mite chu buhvuakna thîrkut zumin An hai hrep avângin.

⁴An lal Hazaela inah mei ka chhuah ang a, Ben-hadada in chu a kâng chhe vek ang.

⁵Damaska khaw kulh kawngkhâr chu ka tichhia ang a, Aven ruama chêngte chu ka tiboral ang a, Beth-edena lalte pawh an boral bawk ang, Suria mite chu Kir ramah salah an hruai ang,” LALPA chuan a ti.

⁶ LALPA chuan heti hian a ti: “Gaza mite chu chin tâwk nei lovin an sual a, Ka hrem ngei ngei dâwn a ni. An mi mante Edom hnênah salah an hralh ṭhîn a.

⁷Tichuan, Gaza khaw kulh bang chungah mei ka chhuah ang a, An lal inte chu a kâng ral ang.

⁸Asdod mite chu ka tiboral ang, Askelon rorêltute nên, Ekron mite chungah kut ka thlâk ang a, Filistia mi la awm chhunte chu an boral ang,” Lalpa PATHIAN chuan a ti.

⁹ LALPA chuan heti hian a ti: “Tura mite chu chin tâwk nei lovin an sual a, Ka hrem ngei ngei dâwn a ni. An mi mante Edom hnênah salah an hralh a, Unau thuthlung an bawhchhia a ni.

¹⁰Chuvângin, Tura khaw kulh bang chungah mei ka chhuah ang a, An lal inte a kâng ral vek ang.”

¹¹ LALPA chuan heti hian a ti: “Edom mite chu chin tâwk nei lovin an sual a, Ka hrem ngei ngei dâwn a ni. A unaupa khandaih nên a ûm a, Lainatna rêng nei lovin a sawisa a. A thin a ur êm a, a thinrim rêng a reh thei lo.

¹²Chuvângin, Teman khuaah mei ka chhuah ang a, Bozra khuaa lal inte chu a kâng ral ang.”

¹³ LALPA chuan heti hian a ti: “Amon mite chu chin tâwk nei lovin an sual a, Ka hrem ngei ngei dâwn a ni. An ram zauh duhin Gilead hmeichhe nau pai pumte lam an taithlêrsak a,

¹⁴Chuvângin, Raba khaw kulh chu ka hâl ang a, An lal inte chu a kâng ral ang. A kâng ri chu indo nia au thâwm leh Thlipui tleh vut vut ang hi a ni ang.

¹⁵An lal chu, an miliante nên, salah an hruai ang,” LALPA chuan a ti.