Read Mizo Lushai Amosa 2 Bible Online

Amosa 2 - Mizo Lushai bible

Amosa 2

¹ LALPA chuan heti hian a ti: “Moab mite chu chin tâwknei lovin an sual a, Ka hrem ngei ngei dâwn a ni, Edom lal ruh ro chu vâp vek khawpa an hâl avângin.

²Chuvângin, Moab ramah mei ka chhuah ang a, Keriot khuaa lal inte a kâng ral ang a, Indona tawtawrâwt ri leh sipai au tuar tuar zîngah Moab mite chu an thi ang.

³An rorêltu chu ka tiboral ang a, An milian zawng zawng pawh ka that vek ang,” LALPA chuan a ti.

⁴ LALPA chuan heti hian a ti: “Juda-te chu chin tâwk nei lovin an sual a, Ka hrem ngei ngei dâwn a ni. LALPA Dân an ngainêp a, A thupêkte an zâwm hek lo, An pate biak ṭhin milem pathian khân a hruai bo ta a.

⁵Chuvângin, Judai ramah mei ka chhuah ang a, Jerusalem-a lal inte chu a kâng ral ang.”

⁶ LALPA chuan heti hian a ti: “Israel-te chu chin tâwk nei lovin an sual a, Ka hrem ngei ngei dâwn a ni. Thamna lain mi dikte an tuartîr a, Pheikhawk bun khat lek avângin mi retheite an hralh a.

⁷Lei vaivutah retheite lu an rapbet a, An kawng ata pachhiate an nam kiang a, Pafain an chhiahhlawh nula an zen ṭâwm a, Ka hming thianghlim an tibawrhbâng a ni.

⁸Maichâm awmna apiangah, puan dahkham chungahte an mu a, An pathian ina lei an chawitîr chuan zu an lei a, an in a.

⁹Sidar thing anga sâng, sasua anga khauh, Amor-ho chu an hmaah chung lama an rah leh hnuai lama an zung lamin Tihchhiatsak a nih kha le!

¹⁰Amor-ho ram luah tûrin Aigupta ram aṭangin ka hruai chhuak che u a, Thlalêrah kum sawmli chhûng ka kaihruai che u a,

¹¹Zâwlnei atân in fate zînga mi leh Nazarit mi atân in tlangvâlte zînga mi ka ruat a, Chutiang chuan ka enkawl che u a ni lâwm ni?” LALPA thuchhuak chuan a ti.

¹²“Mahse, Nazarit mite chu zu in pe a, Zâwlneite pawh thu hril in khap a.

¹³Chuvângin, buhphal phur vûm thûr tawlailîr chîk ṭuah ṭuah angin Ka tihrehawm ang che u.

¹⁴Tlân chak pawh a him lo vang a, âwmkhauh pawhin a chakna a chhawr thei lo vang. Mi huaisen pawh a inhum thei lo vang.

¹⁵Thalkâp mi pawh an ṭang zo lo vang a, Mi ṭuanṭha pawh a tlân hman lo vang, Sakawr chuang mi pawh a inhum thei lo vang.

¹⁶Chumi ni chuan râlhrât zînga huai berte pawh Ruakin an tlânchhia ang,” Tih hi LALPA thuchhuak a ni.