Read Mizo Lushai Amosa 3 Bible Online

Amosa 3 - Mizo Lushai bible

Amosa 3

¹“Nangni, Aigupta ram ata ka koh chhuah, Israel chhûngte u, LALPA sawisêlna che u hi ngaithla teh u.

²Khawvêla chhûngkua zawng zawng zîngah Nangni chauh hi ka hriat in ni asin, Chuvângin, in suahsualna zawng zawngah Ka hrem ngei ngei ang che u,” a ti a.

³An thurual zet loh chuan Mi pahnih an zin dûn ngai em ni?

⁴Sa hauh nei lovin ngawah Sakeibaknei a rûm ngai em ni? Sa seh nei lovin pûkah Sakeibaknei vânglai a rûm dâwn em ni?

⁵Leia thang kam tawktarh awm lovah Sava a âwk ngai em ni? Eng mah âwk lovin lei ata Thang chu a per dâwn em ni?

⁶Râlkhêl tawtawrâwt khawpuia a rîk chuan Mi tinin an hlau dâwn lâwm ni? LALPA thu lovin khawpuiah thil ṭha lo a thleng ngai em ni?

⁷A rawngbâwltu zâwlneite hnêna a thiltum hrilh lovin Lalpa PATHIAN chuan eng mah a ti ngai lo.

⁸Sakeibaknei a rûm a, tu nge hlau lo vang? Lalpa PATHIAN chuan thu a sawi a, Tu nge puang lo ngam ang?

⁹“Asdod khaw lal inahte puang ula, Aigupta lal inahte pawh hril rawh u, Samari tlângah pung khâwm ula, Chuta an buai nuai nuaizia leh An intihduhdah nasatzia chu en teh u!

¹⁰Thil tih âwm leh âwm lo dâwn nachâng an hre tawh lo,” LALPA thuchhuak chuan a ti. Mi thil an chhuhsak leh an lâksakte chu, An in ṭha pui puiah an chhêk khâwm thêr thûr mai.

¹¹Chuvângin, Lalpa PATHIAN chuan heti hian a ti: “Ram chu hmêlmain an rawn hual ang a, Kulhte chu an rawn tichim ang a, In lal inte pawh an rawk ang.”

¹² LALPA chuan heti hian a ti: “Berâmpuin sakeibaknei ei lai A beng them leh a keṭhiah pahnih tal A chhuhsak hrâm angin, Samari rama Israel-te chu An khum them leh a ke bung them chauh nên Chhan chhuah an ni ang.

¹³Ngaithla ula, LALPA chhûngte hrilh rawh u,” Lalpa PATHIAN, Engkim Pathian thuchhuak chuan a ti.

¹⁴“An bawhchhiatna avânga Israel-te ka hrem ni chuan Bethel-a maichâmte chu ka tichim ang a, Maichâm kite pawh ka titliak ang a, Leiah a tla rem rum ang.

¹⁵An thlasik in leh nipui inte ka tichhia ang a, Sainghova chei inte chu a chhe rem rum ang a, In lian pui puite pawh a chim vek ang,” LALPA thuchhuak chuan a ti.