Read Mizo Lushai Amosa 4 Bible Online

Amosa 4 - Mizo Lushai bible

Amosa 4

¹Nangni Samari nuho Basan bâwng anga thau, Retheite nêkchêpa, pachhiate rapbeta, ‘In tûr han la rawh,’ pasalte hnêna ti ṭhînte u, He thu hi ngaithla teh u.

²Lalpa PATHIAN Thianghlima chuan heti hian a ti: “Ngai teh u, nite a lo thleng mêk a ni, Thil kawmin an hnûk ang che u a, Nghakuaiin an kai ang che u.

³Kulh bang pawp hnai berah An hruai chhuak ang che u, Hermon-ah an khalh khâwm ang che u,” LALPA thuchhuak chuan a ti.

⁴“Bethel-ah lo kal ula, bawhchhe leh ta che u le! Gilgal-ah phei chuan bawhchhe zual sauh ula, Tûk tin inthawi ziah ula, Ni thum danah sâwma pakhat pe ula,

⁵Lâwmthu sawi nân chhang hlân ula, Mahni tâna in thilpêkte pawh uanpui ta che u! Aw Israel-te u, chûng chu in tih châk zâwng tak a ni si a!” Tih hi Lalpa PATHIAN thuchhuak a ni.

⁶“In khawpuiahte ei tûr in tlachham a, Hmun tinah ṭâm ka tlâktîr a, Mahse, ka lam in lo hawi duh chuang si lo,” LALPA thuchhuak chuan a ti.

⁷“Buh seng hun thla thum vêlah ruahtui ka tikang a, Khaw khatah ruah ka sûrtîr a, Khaw dangah ka sûrtîr lo va, Hmun khata ruah a sûr laiin Hmun dang a ro va.

⁸Tui in tûr zawngin khaw hrang hrang an pan ṭâwk ṭâwk a, Mahse, duh tâwk an hmu si lo. Chutichung pawhin ka lam an lo hawi duh chuang lo,” LALPA thuchhuak chuan a ti.

⁹“In thlaite thli lum ka chhêmtîr a, Ka tiṭâm zo va, in huan te, in grep te ka tiram a, In theipui te, in oliv-te khauvin a ei zo va, Chuti chung pawhin ka lam in lo hawi duh chuang si lo,” Tih hi LALPA thuchhuak a ni.

¹⁰“Aigupta rama hripui ang kha in zîngah ka lêntîr a, In tlangvâlte khandaihin ka that a, In sakawrte ka mansak che u a, In bûkah, tuar har khawpa rimchhia Mi ruang ka awmtîr ṭeuh va. Chuti chung pawhin ka lam in lo hawi duh chuang si lo,” Tih hi LALPA thuchhuak a ni.

¹¹“Sodom leh Gomora khua ka hrem ang khân, In zînga mi ṭhenkhat ka hrem a, Meipui ata thingthu pawh chhuah ang in ni, Chuti chung pawhin ka lam in lo hawi duh chuang si lo,” Tih hi LALPA thuchhuak a ni.

¹²“Chuvângin, aw Israel, i chungah thil ṭha lo ka ti dâwn, Ka tih ngei dâwn avângin Aw Israel, I Pathian tâwk tûrin inpeih rawh.”

¹³Pathian chuan tlângte a din a, Thlîte a siam a, A duhzâwng chu mihring a hriattîr a, Chhûn leh zân a siam a, Lei pum chungah ro a rêl a ni, A hming chu LALPA, Engkim Pathian a ni.