Read Mizo Lushai Amosa 5 Bible Online

Amosa 5 - Mizo Lushai bible

Amosa 5

¹“Israel mite u, in tâna ka ṭah hla hi ngaithla teh u:

²Nula Israel chu a tlu a, A tho leh tawh rua lo, A ram ngeiah a tlu, tu khaw ngaihsak lohvin, Tu man an kaitho lo vang.”

³Lalpa PATHIAN chuan heti hian a ti: “Indo tûra Israel khawpui aṭanga Mi sângkhat thawk chhuak zîngah za chauh an dam ang a, Mi za thawk chhuak thei zîngah sâwm chauh an dam ang.”

⁴Israel mite hnênah LALPA chuan heti hian a ti: “Min zawng ula; tichuan, in nung ang.

⁵Bethel-ah mi zawng suh u, Gilgal-ah kal hek suh u, Beer-seba pawh pan suh u. Gilgal mite chu salah an tâng dâwn a, Bethel pawhin hlutna a nei tawh lo vang.”

⁶ LALPA zawng ula; tichuan, in nung ang, Chutilo zawng, Josefa chhûngte chungah Mei angin a lo thawk dah ang e, Bethel mite a kâng ral vek ang a, Tu man an ṭhelh thei lo vang.

⁷Nangni hleih nei taka rorêla, Thu dik hnâwl ṭhînte u, In châk lo vang!

⁸Siruk leh chhohreivûng siama, Thim chu zîng ênga chantîra, Chhûn êng chu zân thima chantîra, Tuifinriat tuite kova, Lei chunga sûrtîrtu hi A hming chu LALPA a ni.

⁹Ani chuan mi chakte a titlâwm thut thut a, An kulhte a tichhe mai ṭhîn.

¹⁰Rorêlna hmuna dik taka rêltu chu an hua a, Thu dik sawi ṭhîn chu an ngei.

¹¹Chuvângin, mi retheite in rapbet a, An buhte in lâksak a, Lungchherin in lian pui pui in sa a, Mahse, in luah lo vang. Grep huan ṭha tak tak in siam a, Mahse, a tui, uain chu in in lo vang.

¹²In bawhchhiat nasatzia te, In sualzia te ka hria, Mi dik in tiduhdah a, Thamna in la a, Pachhiate ro dik takin in rêlsak duh lo.

¹³Mi fing tân ngawih mai hun a ni e, Hun ṭha lo tak a nih hi!

¹⁴Thil sual ti lovin thilṭha tih tum ula, Tichuan, in nung ang, ‘LALPA, Engkim Pathian chu kan hnênah a awm,’ In tih ṭhin ang hian in hnênah a awm tak tak ang.

¹⁵Sual chu hua ula, thil ṭha chu ngaina rawh u, Dik takin ro rêl ṭhîn ula, Tichuan, LALPA, Engkim Pathian chuan, Josefa thlah la damte chu a khawngaih mial mahna.

¹⁶ LALPA, Engkim Pathian, LALPA chuan heti hian a ti: “Kawtthlêr tinah an ṭap chuah chuah ang a, Mualzâwlahte an chiau vak vak ang. Loneitute ṭap tûrin an pun ang a, Ṭah thiamte an ruai ang.

¹⁷Grep huan tinah an ṭap tlawk tlawk ang a, Anni chu ka hrem dâwn a ni,” LALPA chuan a ti.

¹⁸“Nangni, LALPA nî lo thlen nghâkhlelte u, In tân a va râpthlâk dâwn êm! LALPA ni chu engah nge in nghahhlelh le? Êng ni lovin thim a ni dâwn asin!

¹⁹Sakeibaknei laka tlân chhuaka, Savawm tâwk ta emaw, Mahni ina hawa, bang han khawiha, Rûlin a lo chuk tâk ang hi a ni ang.

²⁰ LALPA ni chu êng ni lovin thim a ni zâwk dâwn, Hlimna nî ni lovin lungngaihna nî a ni zâwk ang.

²¹In kûtte hian mi ngei a, ka ning ta e, In khâwmpui urhsûnte ka lâwm hek lo.

²²Hâlral thilhlan leh thlai tharte rawn hlân mah ula, Ka pawm lo vang. Remna thil hlan atâna in ran châwm thau in hlante pawh Ka ngaisâng lo vang.

²³In zai a bengchheng êm e, titâwp rawh u, In ṭingṭang ri pawh ka ngaithla peih lo.

²⁴Rorêlna dik chu lui angin luang zâwk sela, Dikna pawh luipui kang lo angin luang rawh se.

²⁵Israel chhûngte u, kum sawmli chhûng Thlalêrah khân inthawina leh thilhlan; Ka hnêna in rawn hlan a ngai em ni?

²⁶In kutchhuak, in lal Sakut lim in bia a, In arsi pathian milem Kaiuan chu in biak tâk hi.

²⁷Chuvângin, Damaska piah lamah Salah ka hruai ang che u,” Engkim Pathian, a hming LALPA chuan a ti.