Read Mizo Lushai Amosa 6 Bible Online

Amosa 6 - Mizo Lushai bible

Amosa 6

¹Zion tlânga nuamti taka awm der dera, Samari tlânga thawveng taka awm veng vengte, Hnam azawnga hnam ropui Israel, An milian, mipuiin an pan ṭhinte chan tûr chu A va râpthlâk dâwn êm!

²Kalne khuaah kal ula, hawi vêl rawh u, Hamat khaw ropuiah kal leh ula, Filistia khua Gath-ah chhuk thla teh u, Judai leh Israel ram aiin an ram chu a ṭha zâwk em ni? Zauh pawh a zau zâwk em ni?

³Hun ṭha lo, lo thleng mai tûr lakah hian I inchhungêng vei a, I awm dân hian i chhiatna tûr a tihnai sauh a ni.

⁴Saingho khuma mua, Ṭhutna dûpa ṭhu zâla, Berâm rual zînga a no thlan chhuah sa leh Bâwngno chum sa ei ṭhînte u,

⁵Perhkhuang nêna hla lênglâwng saa, Davida anga phuah belh zêlte u,

⁶Zu no lian pui pui dawma, Hriak rimtui inchulha, Jakoba thlahte vânduaina pawi tihpui hauh si lote u, In chan tûr chu a va râpthlâk êm!

⁷Chuvângin, sala hruai hmasak ber in ni ang a, Nuam tâwla in ri bûng bûng chu a tâwp ang.

⁸Engkim LALPA chuan a hming chhâlin heti hian a ti: “Jakob-ho chapona ka ten a, An in ṭha pui puite ka ngaimawh a ni. An khawpui chu a chhûnga awm nên ka mantîr vek ang,” Tih hi LALPA, Engkim Pathian thuchhuak a ni.

⁹Thi bâng in pakhatah mi sâwm tawm khâwm mah se, An thi tho vang.

¹⁰Laina ruang hlâwmtuin ruang a rawn lâk dâwnin in chhûngrila awm hnênah, ‘Awm a la awm em?’ a ti ang a. Ani chuan, ‘Awm tawh lo,’ a lo ti ang. ‘Ngawi hlauh rawh, LALPA hming kan lam palh ang e,’ a ti ang.

¹¹Ngai teh, LALPA chuan thu a pe a, “In ropuite chu a chhe rem rum ang a, In tête pawh a sawm vek ang.

¹²Lungpui hmunah sakawr a tlân ngai em ni? Chutah chuan bâwngin lei a let ngai em ni? Nangni zawng, in rorêl chu tûr ang a ni a, Dikna ṭhatna chu thil khaah in chantîr a,

¹³Lo-debar khaw tê tak tê chu in la a, in chhuang hle a, ‘Karnaim khua pawh la thei khawpin kan chak,’ in ti a;

¹⁴Ngai teh u, Israel chhûngte u, nangmahni bei tûrin, Hnam dang ka rawn tîr dâwn, Hmâr lam Hamat aṭanga Araba phai Thlengin an tiduhdah ang che u,” LALPA, Engkim Pathian thuchhuak chuan a ti.