Read Mizo Lushai Amosa 7 Bible Online

Amosa 7 - Mizo Lushai bible

Amosa 7

¹ LALPA PATHIAN chuan hei hi mi hmuhtîr a: Ngai teh, hnim ṭo hmasa, lal chanpual an ah zawha Hnim a chawr ṭan leh laiin khau rual a tihpun chu ka hmu a.

²Ram chhûnga hnim an ei zawh hnu chuan, “Aw Lalpa PATHIAN, ngaidam teh, Jakoba chu engtin nge a din chhuah zawh ang, Amah lah a nêp hle si a?” tiin ka ngên a.

³ LALPA chuan a khawngaih ta êm êm a, “A nih leh chu thil chu thlenglo vang hmiang,” a ti a.

⁴Lalpa PATHIAN chuan hei hi mi hmuhtîr leh a: Ngai teh, Lalpa PATHIAN chuan a mite hrem nân mei a ko va; Tuithûkpui chu a kâng ral a, Ram pawh a kâng ṭan ta a.

⁵Kei chuan, “Lalpa PATHIAN, titâwp teh, Jakoba chu engtin nge a din chhuah theih ang, Amah lah a nêp hle si a,” tiin ka ngên a.

⁶Lalpa PATHIAN chuan a khawngaih ta êm êm a, “A nih leh chu thil pawh chu thleng lo vang hmiang,” a ti a.

⁷ LALPA chuan hei hi mi hmuhtîr leh a: Ngai teh, bang ngîl tak bulah a ding a, sahal a khai a.

⁸LALPA chuan ka hnênah, ‘Amosa, eng nge i hmuh?” a ti a. Kei chuan, “Sahâl khai,” ka ti a. LALPA chuan: “En teh, ka mi Israel-te en dik nân Sahal ka khai ta a ni, Ka ngaizam dâwn tawh lo.

⁹Isaka hmunsângte chu tihram a ni ang a, Israel Hmun Thianghlimte chu tihchhiat a ni ang. Jeroboama chhûngte lalna chu ka titâwp ang,” a ti a.

¹⁰Bethel puithiam Amazia chuan heti hian Israel lal Jeroboama chu a hrilh a: “Amosa hian Israel mite zîngah a sawichhe chiam che a, mipui a hmin zo dâwn.

¹¹Amosa chuan heti hian a ti ṭhîn. ‘Jeroboama chu khandaiha thah a ni ang a, Israel-te chu an ram ata salah an hruai ang,’ tiin.”

¹²Tin, Amazia chuan Amosa hnênah, “Aw zâwlnei, kal la, Judai ramah tlân la, chutah chuan i ei hmuh nân thu va hril rawh. Bethel-ah hi chuan thu hril tawh suh.

¹³Lalin Pathian a biakna, hnam pum inthawina hmun a ni si a,” a ti a.

¹⁴Tichuan, Amosa chuan Amazia chu a chhâng a, “Ei zawn nâna zâwlnei ka ni ve lo, berâmvêngtu leh theipui enkawltu mai ka ni a.

¹⁵Mahse, LALPA chuan ka berâm vêng lai min la a, ‘Kal la, ka mi Israel-te hnênah thu va hril rawh,’ ” min ti a ni.

¹⁶Tûnah LALPA thu hi ngaithla teh, “Nangin, ‘Israel-te do zâwngin thu hril suh, Isaka thlahte demin thu puang hek suh,’ min ti a,

¹⁷Chuvângin, LALPA chuan heti hian a ti: I nupui chu khawpuiah nawhchizuar a ni ang a, I fanu te, i fapate khandaihin an that ang. I hmunhma chu an insem darh vek ang a, Nang pawh hnam dang ramah i thi ang. Israel-te pawh an ram ata sala hruai bo an ni ngei ang,” a ti a.