Read Mizo Lushai Amosa 8 Bible Online

Amosa 8 - Mizo Lushai bible

Amosa 8

¹Lalpa PATHIAN chuan hei hi mi hmuhtîr a: Ngai teh, nipui thei hmin ṭuah bâwma awm hi a lo ni.

²“Amosa, eng nge i hmuh?” a ti a. Kei chuan, “Nipui thei hmin ṭuah, bâwma awm,” ka ti a. LALPA chuan ka hnênah, “Ka mi Israel-te tâwpna tûr chu a ṭuah ta, Ka pêl mai mai dâwn tawh lo,” a ti a.

³Lalpa PATHIAN thuchhuak chuan heti hian a ti: “Chumi ni-ah chuan lal ina hlim taka zai ṭhînte chu Lungchhe takin an ṭap ang. Hmun tinah mitthi ruang a awm pheng phung ang a, Ngawi rengin an paih ang.”

⁴“Nangni, tlachhamte rapbeta, Ram chhûnga retheite ei zawh duh hialte u, Hei hi hre rawh u,

⁵‘Thla thar kût ral thuai thuai se, Buh hralh a nghahhlelhawm mang e, Sabat ni ral thuai thuai sela, Chhangphut zawrh a châkawm mang e, Efa kan titê ang a, sekel kan tirit ang a, Bûkna dik lo kan hmang ang.

⁶Buh nawi ruh khâwm lam kan hralh ang a, Tangka chuan mi rethei kan lei ang a, Pheikhawk bun khatin pachhia kan lei ang,’ in ti thîn.

⁷Jakoba chhuan LALPA chuan mahni inchhâlin thu a tiam a, A thil sual tih pakhat mah ka theihnghilh lo vang,

⁸Chuvângin, an ramah lîr ka nghîntîr ang a, A chhûnga awm zawng zawng pawh an mangang hle ang, Aigupta ram Nail luipui a liana a kâm leh ṭhîn angin, Ram pum chu a sângin a hniam ang.

⁹Ni ka tithim ang a, Chhûnah khua a thim vek ang.

¹⁰In kût nite chu invuina ni-ah ka chantîr ang a, In hlimna hlate chu khawhar hlaah, In za-in saiip puan ka ventîr ang che u a, In lu pawh ka tikawlh vek ang. Fapa mal sûn angin ka siam ang che u a, A tâwp thlengin a hrehawm tluanchhuak ang.

¹¹Ngai teh, ni chu a lo thleng e, Chumi hun chuan ram chhûngah ṭâm ka tlâktîr dâwn, Tui leh chaw ṭâmin an ṭâm lo vang a, LALPA thu ṭâmin an ṭâm ang.

¹² LALPA thu hriat châkin chhak leh thlang, Chhim leh hmâr an fang ang a, An hmu zo chuang lo vang.

¹³Nula tlangvâl chak laite pawh Tuihâlin an chau vang.

¹⁴Samari khuaa milem betute, Dan khuaa pathian lem chibai bûktute leh Beer-seba milem pantute chu an tlu ang a, An tho leh tawh lo vang.