Read Mizo Lushai Obadia 1 Bible Online

Obadia 1 - Mizo Lushai bible

Obadia 1

¹Obadia inlârna hmuh. Edom chungchângah LALPA chuan heti hian a ti: LALPAN hnamte hnênah palai a tîr a, A thuchah chu kan lo hria, “Tho teh u, Edom do tûrin i thawk chhuak ang,” tiin.

²“Ngai teh, hnamte zîngah ka titlâwm ang che a, An hmusit ang che.

³Lungpui kulh chhûngah i awm a, Tlângchhîpah i chêng a, ‘Tu-in nge min tichhe thei ang?’ i ti rilru a. I chapopui hian a bum che a ni.

⁴Mu anga sâng taka thlâwkin, Arsi zîngah bu khuar mah la, Chuta ta chu ka la thla ang che,” Tih hi LALPA thuchhuak a ni.

⁵Zâna rûkru leh suamhmang lo kalten Lâk chin tâwk an nei a, Grep lotute pawhin lawh hmaih tâwk an nei ṭhîn. Nang erawh chu an lâksak vek ang che.

⁶Esauva chu an va rawk nasa êm; A ro thuhrûkte pawh an dap chhuak e.

⁷I thuthlunpuite chuan an bum che a, I ram ata an ûm chhuak che, Râlmuang taka i awmpuite leh i ṭhian rinte chuan I awh nân thang an kam a, An ei chhia che, Chu chu i hre si lo.

⁸“Chûng ni-ah chuan Edom rama mi fing te, Esauva tlânga mi thiamte ka tiboral ang,” LALPA thuchhuak chuan a ti.

⁹Aw, Teman, i mi huaite an zâm ang a, Tichuan, Esauva tlânga mite chu an that vek ang.

¹⁰I unaupa, Jakoba chu tharum thawhin i bei a, Mualpho takin i la awm ang a, I chhiat phah ang.

¹¹Hnam dangten kulh bang hlun an chhut chhiat ni khân, I inthiarfihlîm a, Hmêlmaten Jerusalem sum an lâk an insem ni khân, Tel ve ang i ni.

¹²I unauten vânduaina an tawh lai khân diriam tûr i ni lo asin, Juda-ten chhiat an tawh khân lâwm tûr i ni bawk lo va. Manganna an tawh khân uankhum tûr i ni hek lo.

¹³Ka miten vânduaina an tawh lai denchhenin i luhkhung tûr a ni lo va, An mangan khân dichim tûr i ni lo, Chhiat an tawh khân an neih la ve tûr i ni hek lo.

¹⁴Râltlân danga pêngṭhuama ding tûr i ni lo va, An mangan ni khân la damte man tûr i ni hek lo.

¹⁵“Hnam tin chunga LALPA rorêlna ni a hnai ta e, Edom, i tih angin i chungah tih a ni ang, I thiltih chu i lu chungah a la tla ang.

¹⁶Ka tlâng thianghlima chhiatna no, ka mite in ang kha, Hnam zawng zawngin an in ve ang. An in fai kêlh ang a, Piang lo ang hlauh an ni ang.”

¹⁷“Zion tlângah tlan chhuahte chu an awm ang a, Hmun Thianghlim a ni ang. Jakoba chhûngte chuan an ram ngai kha an nei leh ang.

¹⁸Jakoba chhûngte chu mei an ni a, Josefa chhûngte pawh meialh an ni. Esauva chhûngte erawh chu buhpâwl an ni a, Esauva chhûngte chu an kâng ang a, An ral vek ang, dam chhuak an awm lo vang,” Tiin LALPAN a sawi e.

¹⁹Judai ram tlâng thlang lam zâwla awmte chuan Filistia ram an nei ang a, Israel chuan Efraim leh Samaria ram a nei ngei ang, Benjamin-ho pawhin Gilead ram an nei ang.

²⁰Israel mi, hmâr lama saltângte an lo kîr ang a, Foiniki aṭanga Zarefat thlengin an rawn la ang, Jerusalem mi, Sefarada saltângte chuan chhim lam ram khawpuite an rawn la ang.

²¹Hnehtute chu Zion tlângah an chho vang a, Edom ramah ro an rêl ang. Ram chu LALPA ram a ni si a.