Read Mizo Lushai Jona 1 Bible Online

Jona 1 - Mizo Lushai bible

Jona 1

¹ LALPA thu chu Amitaia fapa Jona hnênah a lo thleng a.

²“Tho la, khawpui ropui tak, Ninevi-ah chuan kal la, an sualna chuan ka hma a lo thleng ta tih hrilh rawh,” tiin.

³Jona chu a tho va, LALPA tlân bosan tumin Tarsis lam a pan ta a. Joppa khuaah a chhuk a, Tarsis pan tûr lawng a hmu a, chuan man a pe a, LALPA tlân bosan tumin Tarsis-a kal tûrte zîngah lawngah chuan a lût a.

⁴ LALPA chuan tuifinriatah thlipui na tak a tlehtîr a, thli a nat êm avângin lawng chu a keh dâwn ta a.

⁵Lawngpute chuan an hlau va, mahni pathian an au ta ṭheuh va. Lawng tizâng tûrin bungruate chu tuiah an paih a. Jona erawh chu lawng pindan chhûngrilah a lût thla a, tah chuan tui takin a muhîl a.

⁶Lawng hotupa chu a hnênah a lo kal a, “Engtiziaa lo muhîl reng nge i nih? Tho la, i Pathian au ve rawh, ani chuan kan boral loh nân min ngaihtuah mahna,” a ti a.

⁷An za chuan an inrâwn a, “Hawh u, he thil ṭha lo kan chunga lo thleng hi tu vâng nge tih hriat nân ṭhum i vâwr ang u,” an ti a. Tichuan, ṭhum an vâwr a, an ṭhumvâwr chu Jona chungah a tla ta a.

⁸Tichuan, Jona hnênah, “Kan chunga thil ṭha lo lo thleng hi tu vâng nge, khawngaih takin min hrilh teh; eng hna thawk mi nge i nih, khawi aṭanga lo kal nge i nih, khawii rama mi nge i nih, eng hnam nge i nih?” an ti a.

⁹Ani chuan an hnênah, “Hebrai mi ka ni a, tuifinriat leh khawmual siamtu, vân Pathian, LALPA betu ka ni,” a ti a.

¹⁰Mite chuan an hlau lehzual a, a hnênah, “Eng pawi nge i khawih?” an ti a. Pathian tlân bosan tum a ni tih a sawi an lo hre tawh si a.

¹¹Anni chuan a hnênah, “Tuifinriat fâwn a reh theih nân engtin nge kan tih ang che?” an ti a. Tuifinriat chu a fâwn nasa tawlh tawlh si a.

¹²Ani chuan, “Mi la kâng ula, tuifinriatah mi paih rawh u; tichuan, tui fâwn a reh mai ang. Keimah avângin he thlipui na tak hian a rawn nuai che u a ni tih ka hre reng a ni,” a ti a.

¹³Lawng mite chuan lawng chu vaukam thlenpui hrâm tuma theihtâwp an chhuah pawhin an thei lo, tuifinriat lah chu a hma aiin a fâwn nasa tawlh tawlh si a.

¹⁴Tichuan, LALPA chu an au va, “Aw LALPA, he mi nunna kan lâk avâng hian min tiboral lul suh ang che. Aw LALPA, nangin ṭha i tih angin thil i ti ṭhîn a, pawi khawih lo thisen mawh hi kan chungah nghat suh ang che,” an ti a.

¹⁵Jona chu an la kâng a, tuifinriatah chuan an paih ta a; tuifinriat fâwn bulh bulh chu a reh ta a.

¹⁶Chûng mite chuan LALPA chu an hlau ta êm êm a, a hnênah an inthawi a, thute an tiam ta a.

¹⁷LALPA erawh chuan Jona dawlh tûr sangha lian pui a lo ruat diam a; tichuan, Jona chu sangha kawchhûngah chuan ni thum leh zân thum a awm a.