Read Mizo Lushai Jona 2 Bible Online

Jona 2 - Mizo Lushai bible

Jona 2

¹Jona chu sangha kawchhûng aṭang chuan a Pathian, LALPA hnênah heti hian a ṭawngṭai a:

²“Ka mangan tâwpah LALPA ka ko va, Anin min chhâng a, Seol aṭangin ka au va, Nangin ka aw i lo hre ta.

³Tuifinriat mawng, a thûk laiah Nangin min paih lût a, Tuite chuan min khuh hlup hlup a, I tuifâwnte leh tui inchhawkte chuan min vûr ta.

⁴Kei chuan, ‘I hnên ata min hnawt chhuak a, I in thianghlim ka hmu dâwn tawh lo a nih hi,’ Ka lo ti a.

⁵Tuite chuan min chîm pil a, Ka vêlin tuithûkpui chuan min hual a, Tuifinriat hnimte chuan ka lu a phuar a.

⁶Tlâng innghahnaahte ka tla lût a, Lei hnuai khura tâng reng tûrin. Mahse, aw LALPA, ka Pathian, Nangin khur thûk ata chu min la chhuak ta.

⁷Thi mai dâwna ka inhriat lai khân LALPA chu ka hre reng a, Ka ṭawngṭaina chu i biak in thianghlimah I hnên a lo thleng ta.

⁸Eng mah ni lo milem betute chu I lakah an rinawm ta lo va ni.

⁹Kei erawh chuan fak hla sa-in Inthawina ka hlân ang che, Ka thutiam chu ka hlen ang, Chhandamtu chu LALPA a ni si a,” tiin.

¹⁰Tichuan, LALPA chuan sangha chu thu a pe a, khawmualah Jona chu a law chhuak ta a.