Read Mizo Lushai Jona 3 Bible Online

Jona 3 - Mizo Lushai bible

Jona 3

¹ LALPA thu chu Jona hnênah a lo thleng leh a.

²“Tho la, khaw ropui tak Ninevi-ah chuan va kal la, i hnêna ka sawi ang khân va hril rawh,” tiin.

³Tichuan, Jona chu a tho va, LALPA thu angin Ninevi khuaah chuan a kal ta a. Ninevi chu khaw ropui tak, a zau lam pawh ni thum kal laia zau a ni a.

⁴Jona chuan ni khat kal chin khawpui chu a fang ṭan a, heti hian a au va: “Tûn aṭanga ni sawmli-ah Ninevi khua hi tihchhiat vek a ni dâwn,” a ti a.

⁵Ninevi mite chuan Pathian an ring ta a, chaw nghei nân awmni an kham a, a tê ber aṭanga a lian ber thlengin saiip puan an sin ta a.

⁶Ninevi lalin chu chu a lo hriat chuan a lalṭhutthlêng a thawhsan a, a lal thuam a hlîp a, saiip a sin a, vaivutah a ṭhu ta a.

⁷Ninevi khaw lal leh miliante chuan hetiang hian thupêk an chhuah a: “Mihring te, ran te, bâwng rual te, berâm rual te chuan eng mah an tem tûr a ni lo, an eiin an in tûr a ni hek lo.

⁸Mihring leh rante chuan saiip puan sin sela, ṭhahnemngai takin LALPA au rawh se. Mi zawng zawngin an sual hawisan sela, râwng takin che tawh suh se.

⁹Kan boral loh nân Pathianin a thinur nasa tak la kîrin mi khawngaih lo vang tih tu nge hria?” tiin.

¹⁰Pathianin an awm dân chu a hmu a, thil sual tih an sim tih a hria a. Pathian chuan a khawngaih a, an chunga chhiatna thlentîr a tum chu a ṭhulh a, a ti ta lo va.