Read Mizo Lushai Jona 4 Bible Online

Jona 4 - Mizo Lushai bible

Jona 4

¹Jona erawh chu a lâwm lo hle a, a thin a rim ta a.

²LALPA hnênah hetiang hian a ṭawngṭai a: “Aw LALPA, hetiang hian i ti leh si ang tih ka rama ka awm lai pawh khân ka sawi lo vem ni? Chuvâng alâwm Tarsis lamah ka tlân vat ni. Nang hi zawng khawngaihna leh lainatnaa khat, Pathian thinnel leh hmangaiha khat, chhiatna thlentîr duh lo i ni miau tih ka hre si a.

³Aw LALPA, tûnah ka nun hi la mai teh, ka tân thih hi dam aiin a ṭha zâwk si a,” tiin.

⁴LALPA chuan, “I thinrim hi dik i ti maw?” a ti a.

⁵Jona chu khawpui aṭang chuan a chhuak a, khawpui chhak lamah a ṭhu a. Tah chuan bûk a sa a, a hlim aṭang chuan khawpuiah thil eng nge lo thleng dâwn tih hmuh a tum a.

⁶Pathian, LALPA chuan ûm a ṭotîr a, Jona lu zâr hliaha amah tihahdam tûrin a zâmtîr a. Chu ûm hlim avâng chuan Jona chu a lâwm ta hle a.

⁷A tûk khua a lo vâr chuan Pathianin sûlrûl a tîr a, ûm chu a ei a, a vuai ta vek a.

⁸Ni a lo chhuak a, Pathianin khawchhak thli lum a tlehtîr a, ni chuan Jona chhîpah a em a, luhaiin a chau ta a. Thih a dîl leh ta a, “Ka tân dam aiin thih a ṭha zâwk e,” tiin.

⁹Nimahsela, Pathian chuan Jona hnênah, “Ûm chungchânga i thinur hi a dik em ni?” a ti a. Ani chuan, “Thih ngam meuhva ka thinur hi ka tidik a ni,” a ti a.

¹⁰LALPA chuan a hnênah, “He ûm, i tuh pawh ni lo, i ṭhantîr pawh ni lo, zânkhat thil thu-a lo ṭhang liana, a tûka thi leh ta mai mah hi i lainat a.

¹¹Ninevi khaw ropui takah hian mihring nuaikhat leh sînghnih lai, an ding leh vei pawh hre lo, ran rual tam tak nên an awm a, chûng chu ka khawngaih lo vang em ni?” a ti a.