Read Mizo Lushai Numbers 10 Bible Online

Numbers 10 - Mizo Lushai bible

Numbers 10

¹ LALPA chuan Mosia hnênah,

²‘Tangkaraw tawtawrâwt pahnih chher rawh; mipui koh khâwm nân leh kal chhuah a hunah in hâm dâwn nia.

³A ruala an ham chuan Israel-ho chu Inbiakna bûkah, i bulah an lo pung khâwm ang a,

⁴pakhat chauh an ham erawh chuan hruaituho, sâng chunga hotute chauh khân an rawn pan tûr che a ni.

⁵Rang taka an ham sek sek chuan khawchhak lama bûk neiho kha tawlh chhuak rawh se.

⁶Rang taka an ham nawn leh hunah chhim lama bûk neiho kha an tawlh chhuak tûr a ni. An ham sek sek chuan tawlh chhuah tûr tihna a ni.

⁷Rei tak thlûka an ham chuan kal khâwm tûr tihna a ni.

⁸Arona leh a thlahte hi tawtawrâwt hâmtu tûrte chu an ni. Hetiang hi kumkhaw tih dân tûr a ni.

⁹“In ramah indona a awma, in hmêlma rawn beitute laka lo ṭang zâwk in nih chuan, tawtawrâwt chu hâm sek sek ula, kei LALPA hian ka lo hria ang a, in hmêlmate lak ata ka rawn chhan ang che u.

¹⁰In lâwmna nikhuaah, thla thar kûtahte leh hun serh in hman ṭuma hâlral thilhlan in hlantein hâm bawk ang che u, chu chu ka lo hria ang a, ka ngaihven ang che u, LALPA, in Pathian ka nih hi.

¹¹Aigupta an chhuahsan kum hnihna, thla hnih, ni sawmhnih ni chuan Inbiakna bûk chunga LALPA chhûm chu a kiang a,

¹²Sinai aṭang chuan zawi zawiin an inchhawp sawn a; Paran thlalêr an thlen chuan chhûm chu a ding leh ta a.

¹³Mosia hnêna LALPA thupêk angin a pâwl indawtin an chhuak a.

¹⁴Juda pâwla chhiarho chu an puanzâr nên an chhuak hmasa ber a, Juda thlahte chu Aminadaba fapa Nasonan a ho va.

¹⁵Isakara thlahte chu Zuara fapa Nethanelan a ho va.

¹⁶Zebuluna thlahte chu Helona fapa Eliaban a ho va.

¹⁷Biakbûk chu an ṭhiat a, Gersona fate leh Meraria faten an zâwn a, an zui a.

¹⁸Reubena pâwla chhiarte pawh chu an puanzâr nên an chhuak a, Reubena thlahte chu Sedeura fapa Elizuran a ho va.

¹⁹Simeona thlahte chu Zurisadaia fapa Selumielan a ho va.

²⁰Gada thlahte chu Deuela fapa Elisafan a ho va.

²¹Kohata thlahte chuan bûk chhûnga thil thianghlimte an zâwn a, a dawtah an kal a, an bûk khuarna tûr hmun an va thlen ve chuan bûk chu an lo zâr zo tawh ṭhîn.

²²Efraim pâwlhova chhiarte chuan an puanzâr nên an zui a. Efraima thlahte chu Amihuda fapa Elisaman a ho va.

²³Manasea thlahte chu Pedazura fapa Gamalielan a ho va.

²⁴Benjamina thlahte chu Gideonia fapa Abidanan a ho va.

²⁵Dana pâwla chhiarte chu an puanzâr nên an chhuak hnuhnûng ber a. Dana thlahte chu Amisadaia fapa Abiezeran a ho va.

²⁶Asera thlahte chu Okrana fapa Pagielan a ho va.

²⁷Naftalia thlahte chu Enana fapa Ahiran a ho va.

²⁸Chutianga pâwl indawt thliah chuan Israel fate chu awmhmun an insawnin an kal ṭhîn.

²⁹Mosia puzawn, Midian mi, Reuela fa Hobaba hnênah Mosia chuan, ‘LALPA chuan ram min pêk a tiam a; chu ram chu kan thleng ṭhelh ṭhelh tawh a ni. Israel mite chu tihhmuingîl a tiam a, lo tel ve la, kan zâr i zo dâwn nia,’ a ti a.

³⁰Hobaba chuan, ‘Tel ve lo ve, kan ram lamah ka haw leh dâwn,’ a ti a.

³¹Mosia chuan, ‘Min hâwnsan lo hrâm teh. Nang chuan thlalêra bûk khuarna hmun ṭha i hre vek a.

³²I lo tel ve phawt chuan LALPA malsâwmna kan dawn zawng zawng kan sem ve zêl ang che,’ a ti a.

³³ LALPA tlâng aṭang chuan ni thum an kal a, LALPA Thuthlung Bâwm chu an hmaah, an riahna tûr hmun zawngin a kal zêl a.

³⁴An riahhmun ata an chhuah chuan LALPA chhûm chu an chungah a awm zêl a.

³⁵Thuthlung Bâwm a chêt sawn dâwn apiangin Mosia chuan, ‘Aw LALPA, tho la, i hmêlmate chu ûm darh la, a hawtu che chu tlânchhe rawh se,’ a ti ṭhîn a.

³⁶Bâwm chu an nghah veleh, ‘Aw LALPA, Israel chhûngkaw sâng tam tak zîngah hian lo haw leh rawh,’ a ti ṭhîn.