Read Mizo Lushai Numbers 11 Bible Online

Numbers 11 - Mizo Lushai bible

Numbers 11

¹Mipui chu an hahin an mangang a, LALPA chungah an vui a. LALPA chuan a lo hriatin a thinur hle a, mipui zîngah chuan mei a chhuahtîr a, an riahhmun hmâwrtawng ber thlêr khat chu a kâng chhe vek a.

²Mite chuan Mosia an au va, ani chuan LALPA hnênah a dîl a, mei chu a rêm ta a.

³LALPA mei an zînga a chhuah avângin chu hmun hmingah chuan Tabera an vuah a.

⁴Israel-te zîngah hnam dang tel ve zêl an awm a, chûng chuan sa an châk hle a, Israel mite pawh chuan, “Sa kan va châk ve le:

⁵Aigupta ramah lah khân duh duhin sangha kan ei a, a man sawi tham a ni si lo; fanghma te, dawnfawh te, zo-purûn te, vai-purûnsen te, vai-purûnvâr te tak kha aw:

⁶Kan va râwp ta ve, mana mai lo hi chu thil dang lah a awm si lo,” an ti a.

⁷Mana chu chhibung vâr ang deuh, tuikeplung anga vâr hi a ni.

⁸An chhar khâwm a, râwt lungah te an râwt dip a, sumah te an dêng a, a chângin an chhûm a, a chângin chhangah an siam a, an ur a, a tui dân chu oliv hriaka hmeh chhang kan ang a ni.

⁹Zânah dai tlâk rualin mana chu a lo tla ve ṭhîn.

¹⁰A chhûng chhûngin an phun a, an bûk kawngka bula an âng sup sup chu Mosian a lo hria a. LALPA chu an chungah a thinur viau tih a hriat chuan Mosia chu a mangang ta hle a.

¹¹LALPA hnênah, “Engtizia nge min va timangang ve? Hêng mite mawh hi engtizia nge min phurhtîr, min va khawngaih lo ve?

¹²Hêng mite hi ka fate pawh an ni lo va, engtizia nge nau hnute hne lai nuin a pua ang hrima an pate hnêna pêk i tiam ram paw thleng tûra min tih le?

¹³Khawi lama sa nge kei tehlulin ka pêk ang? ‘Sa kan châk êm mai, min pe rawh,’ tiin ṭap chungin min rawn nawr buai hi?

¹⁴Keimah mai zawngin hêng mite hi ka tuar dâwn lo, a hahthlâk lutuk.

¹⁵Hetianga min tih dâwn zawngin min khawngaih la, min tihlum zâwk mai teh, heti taka tihretheih hi zawng ka peih ta lo,” a ti a.

¹⁶ LALPA chuan Mosia hnênah, “Mipui zînga hruaitu deuh deuh mi sawmsarih han khâwm la, Inbiakna bûkah rawn hruai la, i bulah lo ding teh se.

¹⁷Ka lo chhuk ang a, ka rawn be dâwn che nia. I chunga thlarau awm kha ka sem ve ang, mipui enkawlna mawh chu nangmah maiin i phur tawh lo vang a, an phurhpui tawh ang che.

¹⁸Mipui hnênah, ‘Naktûk atân inserh thianghlim rawh u, sa in ei dâwn e; ‘sa ei tûr nei teh ila aw, Aigupta rama a tam ṭhin vei nên,’ tia in sa châk ṭap thâwm chu LALPA beng a thleng a ni; LALPA chuan sa a pe ngei dâwn a che u, in ei mawlh ang.

¹⁹Ni hnih khat mai ni lo, ni nga emaw, ni sâwm emaw, ni sawmhnih emaw mai pawh ni lo,

²⁰a thlaa thla khat pumhlûm, luakchhuak hlui khawpin in ei ang a, a ngei hluah hluah ang che u, ‘Engtiziaa Aigupta ram chhuahsan ta mai nge maw kan nih le?’ tiin in zînga awm LALPA chu in hnâwl a, ṭapin in nawr buai si a,’ ti ang che,” a ti a.

²¹Mosia chuan, “Ka mi hruaite hi, mahni kea kal thei ngawt pawh, mi nuairuk zet an ni a, ‘thla khat pumhlûm an ei tûr sa ka pe dâwn’ i ti a,

²²berâm leh ran rual zawng zawng pawh talh ila, an ei khawp a tling dâwn em ni? Tuifinriat sangha zawng zawng pawh man ila, an kham dâwn em ni?” a ti a.

²³LALPA chuan Mosia hnênah, “Tih theih loh ka nei ta em ni? Ka sawi anga thil a awm dâwn leh dâwn loh i hre mai ang,” a ti a.

²⁴Mosia chu a chhuak a, LALPA thu chu mipuite a hrilh a, an upa sawmsarihte chu a hruai a, Biakbûk vêlah chuan a dintîr a.

²⁵LALPA chu chhûmah a lo chhuk a, a rawn bia a; a chunga thlarau dah ṭhenkhat chu a la a, mi sawmsarihte chungah chuan a dah a; chutia an chunga thlarau a lo awm veleh chuan zâwlnei angin thu an sawi ta a, rei erawh chu an sawi lo.

²⁶Sawmsarih zînga tel mi pahnih Eldada leh Medada chu Biakbûk kal ve lovin an riahhmunah an awm a, anni pawh chuan zâwlnei angin thu an sawi ve bawk a.

²⁷Tlangvâl pakhat hi Mosia hnênah a lo tlân a, “Eldada leh Medadan riahhmunah thu an sawi bual bual mai,” a rawn ti a.

²⁸Mosia puitu Josua, Nuna fapa chuan, “Ka pu, khap teh,” a ti a.

²⁹Mosia chuan, “Ngaimawh viauvin mi ring a ni maw? LALPA chuan a thlarau chu mi zawng zawng pe se, zâwlnei ni vek se tih nâk alai a,” a ti a.

³⁰Mosia leh upa sawmsarihte chu riahbûk lamah an haw a.

³¹ LALPA chuan thli a tlehtîr a, tuifinriat aṭang chuan vahmîm a rawn lên a, tawng hnih vêl leka sânga thlâwkin an bûkah leh a vêl ni khat kal hual chhûngah chuan an ṭum a.

³²Chumi ni leh a tûkah chuan nilêng zânkhuain vahmîm chu an man khâwm a, a man tlêm ber pawhin kuintal sâwm vêl an man a ni; an bûk vêlah chuan ni sa-ah an rêp a.

³³A sa an ei mêk lai chuan LALPA thin an tiur a, an zîngah hri na tak a lêng ta a.

³⁴Mi râwp tak takte chu chutah chuan an phûm avângin chu hmun chu Kibrot-hatava an vuah a.

³⁵Kibrot-hatava aṭang chuan Hazaroth-ah an insawn a, chutah chuan an châm rei ta deuh va.