Read Mizo Lushai Numbers 12 Bible Online

Numbers 12 - Mizo Lushai bible

Numbers 12

¹Miriami leh Arona chuan Mosian Kus mi nupuia a neih avângin an hmusit a.

²“LALPA hian Mosia hnênah chauh em ni thu a sawi bîk? Keini pawh min be lo vem ni?” an ti a. LALPA chuan chu chu a lo hria a.

³Mosia chu mi inngaitlâwm tak a ni a, khawvêla mi inngaitlâwm thei ber a ni hial ang.

⁴LALPA chuan Mosia te, Arona te leh Miriami te chu a ko va, “Inbiakna bûkah in pathumin lo kal teh u,” a ti ta thut mai a, an kal ta a.

⁵LALPA chu chhûm dingah chuan a lo chhuk a, bûk kawngkaah chuan a ding a. Arona leh Miriami chu a ko va, an va pan a.

⁶An hnênah, “Ka thu hi ngaithla teh u, in zînga zâwlneite chuan zêlin emaw min hmu a, mumangah emaw an hnênah thu ka sawi chauh ṭhîn.

⁷Ka chhiahhlawh Mosia hnênah chuan chutiangin ka ti ve ngai lo, a kutah ka mi Israel-te ka dah a,

⁸inhmatawnin kan inbe ṭhîn a ni, fiah takin thu ka sawi a, tehkhin thu leh thu awmze rûk neiin ka be ngai lo, ka riruang pawh a hmu a ni. Engtizia nge ka chhiahhlawh Mosia hi in hmuhsit ngam le?” a ti a.

⁹An chungah chuan a thinur hle a, a kalsan ta mai a.

¹⁰Biakbûk aṭanga chhûm a kian chuan Miriami chu vûr anga vârin a phâr vâr ta uar a. Arona chuan Miriami chu a han en a, a lo phâr reng mai a.

¹¹Arona chuan Mosia hnênah, “Ka pu, kan ât leh kan sual mawh hi min phurhtîr lo hrâm ang che.

¹²Thi leh dam kâra lêng, piangsual saa piang ang êm chuan awm lul suh se,” tiin a ngên a.

¹³Mosia chuan LALPA a au va, “Aw Pathian, tidam hrâm teh, ka ngên a che,” a ti a.

¹⁴ LALPA chuan Mosia hnênah, “A pain a hmaiah chil chhâk sela, zakin ni sarih chu a biru dâwn lâwm ni? Ni sarih chhûng chu daipâwnah dah rawh, chutah in hruai lût leh dâwn nia,” a ti a.

¹⁵Miriami chu daipâwnah ni sarih an dah a, a lo luh leh hma chu an insawn lo.

¹⁶Hazerot chu an chhuahsan a, Paran thlalêrah bûk an khuar a.