Read Mizo Lushai Numbers 13 Bible Online

Numbers 13 - Mizo Lushai bible

Numbers 13

¹ LALPA chuan Mosia hnênah,

²“Hnam tin aṭangin mi fel tak pakhat zêl thlang chhuak la, Israel mite ka pêk tûr Kanan en thlithlai tûrin tîr rawh,” a ti a.

³Israel mite zînga hotu deuh deuh chu LALPA thupêk angin hêng mite hi Paran thlalêr aṭang chuan a tîr a.

⁴Reubena thlah aṭangin Zakura fapa Samua;

⁵Simeona thlah aṭangin Horia fapa Safata;

⁶Juda thlah aṭangin Jefunea fapa Kaleba,

⁷Isakara thlah aṭangin Josefa fapa Igala;

⁸Efraima thlah aṭangin Nuna fapa Hosea;

⁹Benjamina thlah aṭangin Rafua fapa Paltia;

¹⁰Zebuluna thlah aṭangin Sodia fapa Gadiela;

¹¹Josefa fa Manasea thlah aṭangin Susia fapa Gadia;

¹²Dana thlah aṭangin Gemalia fapa Amiela;

¹³Asera thlah aṭangin Mikaela fapa Sethura;

¹⁴Naftalia thlah aṭangin Vopsia fapa Nabia;

¹⁵Gada thlah aṭangin Makia fapa Geuela.

¹⁶Hêng mite hi ram en thlithlai tûra a mi tirhte chu an ni. Nuna fapa Hosea hming hi a thlâksak a, Josua a vuah a.

¹⁷Mosia chuan Kanan ram en thlithlai tûrin a tîr a, “Heta ṭangin hmâr lamah kal ula, tlângramah khian chho vang che u,

¹⁸eng ang ram nge en thlithlai ula, mi an tam nge tam lo, an chak nge chak lo tih te,

¹⁹an ram chu a ṭha nge ṭha lo, khawpui kulh neiahte nge an chên bûk mai maiah;

²⁰ram chu a chênghnâwng nge chênghnâwng lo tih te, ngaw a ṭha nge ṭha lo tihte han en thlithlai rawh u, an thei rah ṭhenkhat chu han hâwn ngei ang che u,” a ti a. Grep rah vânglai a ni.

²¹Zin thlalêr aṭangin Hamath kalkhân bul Rehob thlengin an fang a.

²²Chhim lam an tlawh chhuak hmasa a, Hebron-ah an kal a. Hetah hian Anaka thlah Ahiman hnam te, Sesai hnam te, Talmai hnam te an la awm a. Hebron khua hi Aigupta khawpui pakhat Zoan khua aiin kum sariha din hmasak a ni.

²³Eskol phai an thleng a, grep bâwr khat chu a ṭang nên an hlep a, pahnihin an zâwn a, theibuhfai te, theipui rahte pawh an lo va.

²⁴Chu hmun chu an grep rah bâwr chawiin Eskol an vuah a ni.

²⁵Ni sawmli an thang a, ram an en thlithlai hnu chuan an kîr leh ta a.

²⁶Mosia te, Arona te leh Israel mipui awmna hmun Paran thlalêra Kades chu an lo thleng a, an thei lawhte chu an entîr a.

²⁷“Min tirhna ramah chuan kan han kal a, khawizu leh hnutetuia luang ram a lo ni teh meuh mai; thei rahte hi en teh u.

²⁸A mi chêngte erawh chu mi kawlhsen tak tak an ni, khaw lian tak tak, kulh ṭha deuh deuhvah an awm a, Anak thlah miliante pawh kan hmu ṭeuh mai.

²⁹Chhim lamah Amalek-ho an awm a, thlang lam ramah Hit mi te, Jebus mi te, Amor mi te an awm a, Mediteranean tuipui kamah leh Jordan lui ruamah Kanan mite an awm,” an ti a.

³⁰Kaleba chuan Mosia hmaa mipui phun mur mur chu a tingawi ṭhuap a, “I rûn nghâl ang u, an ram chu kan luahlân mai ang, kan tam tâwk a ni,” a ti a.

³¹Kaleba kalpuite chuan, “Keini aiin an tam a, kan ngam hauh lo vang,” an ti a.

³²Israel mite zîngah chuan a ṭha lo lamin ram chanchin chu an sawi a.

³³“Kan ram han en thlithlai chu ei khawp thar theihna pawh a ni lo, kan mi hmuhte lah pa lian pui pui an ni. Milian chi, Anak thlahte pawh kan hmu; an lakah khau ang lek kan ni a, anni pawhin khau ang lekin min hmu âwm e,” an ti a.