Read Mizo Lushai Numbers 14 Bible Online

Numbers 14 - Mizo Lushai bible

Numbers 14

¹Israel pungkhâwmho chu mangangin an ṭap zânkhua a.

²Mosia leh Arona chu an dem a, “Aigupta ramah khân lo thi ta zâwk ila a ṭha tûr, he thlalêrah pawh hian thi mai ila a ziaawm zâwk ang.

³Engtizia nge LALPA hian indonaa thi tûr leka he rama min hruai le? Kan nupui fanau tê tê pawh hian an tuar ngei dâwn; Aigupta ramah kîr leh zâwk mai ila a ṭha ang,” an ti a.

⁴An inrâwn tlâng a, “Aigupta ramah min kîrpui thei tûr hruaitu i ruat ang u,” an ti a.

⁵Mosia leh Arona chu Israel pungkhâwmho hmaah chuan hmaia lei siin an kûn a.

⁶Ram en thlithlaitute zînga mi Nuna fapa Josua leh Jefunea fapa Kaleba pawh chuan pawi an ti a, an puan an pawtthlêr a,

⁷Israel pungkhâwmho hmaah chuan, “Kan ram en chu ram ṭha tak asin.

⁸Kan chungah LALPA a lungnih phawt chuan min hruai ang a, khawizu leh hnutetui luanna ram chu min pe ngei ang.

⁹LALPA lakah nuar lo hrâm rawh u: chûng ram mite chu hlau hek suh u, LALPA chuan an rinchhan pathian lemte chu a hneh tawh a, bêl chhûnga sa ang mai an ni; hlau suh u,” an ti a.

¹⁰Mahse, pungkhâwmho chuan lunga den hlum an tum a, chutih lai chuan Israel mi zawng zawng hmuh tûrin LALPA êng chu Inbiakna bûk chungah chuan a êng ta pum a.

¹¹ LALPA chuan Mosia hnênah, “Eng chen nge maw hêng mite hian min hmuhsit reng dâwn le? Thil mak heti zozai ka tihsak hnu pawhin min la ring lo fo em ni?

¹²Hri ka lêntîr ang a, ka tiboral vek mai dâwn e; i fate aṭangin an aia tam zâwk leh thil ti thei zâwk ka din mai teh ang,” a ti a.

¹³Mosia chuan LALPA hnênah, “Aigupta ram aṭangin ropui takin i hruai chhuak a, Aigupta miten an chunga thil tih i tum chu an hriat chuan,

¹⁴he rama awmte hi heti hian an hrilh ngei ang. Hêng mite hian nang, LALPA hi kan zîngah i tel ve zêl a, chhûma bûk i rawn khuh apiangin nang pawh an hmu ṭhîn che a, chhûnah chhûm dingin i hruai a, zânah pawh mei dingin an hma i hruai ṭhîn tih an lo hre daih tawh a ni.

¹⁵I mite hi i tihhlum vek mai chuan, i hming ṭhatzia hretute chuan,

¹⁶‘Pêk a tum ramah a hruai thleng thei lo va, an thi zo ta a ni,’ an ti ngei ang le!

¹⁷Tichuan, aw LALPA, i thiltihtheihzia han tilang la, i thutiam angin han ti teh.

¹⁸‘Kei, LALPA hi thinnel tak ka ni a, ngilnei tak, an sualna leh bawhchhiatna ngaidam ṭhîntu ka ni; amaherawhchu, thil tisual ngeite chu ka chhuah lo vang, an pate sualna avângin an fate, an tûte, chhuan thum chhuan li thleng thlengin ka hrem ang,’ i tih kha.

¹⁹I ngilneih avâng leh hêng mite hi Aigupta ram ata tawh i ngaihdam ṭhîn ang khân tûnah pawh ngaidam leh tûrin ka ngên a che,” a ti a.

²⁰LALPA chuan, “Mi dîl angin ka ngaidam ang e,

²¹Kei, LALPA hi mi nung ka nih hi, ka ropuina leiah a khat a ni.

²²Ka ropuina hmutu, Aigupta ramah leh thlalêra ka thiltih mak hmututen vawi sâwm chuang min fiah a, ka thu ngaithla duh lotute leh

²³min pawisa lotute hian an pate hnêna pêk ka tiam ram chu an lût ve tawp lo vang.

²⁴Ka chhiahhlawh Kaleba hi chuan rilru dang a pu a, ka thu a awih êm avângin a va en thlithlai ramah chuan ka hruai ang a, a thlahte chuan chu ram chu an nei ang.

²⁵Chu ram phaiah chuan Amalek leh Kanan mite an awm avângin naktûkah chuan Tuipui Sen panin kîr rawh u,” a ti a.

²⁶ LALPA chuan Mosia leh Arona hnênah,

²⁷“Hêng mi sual tak tak, phunchiar êm êmte hi eng chen nge ka dawh theih ang? Ka laka an phunchiarzia ka hria.

²⁸An hnênah, ‘Mi nung ka nih hi, in duh ang chu ka tihsak ang che u, kei LALPA hian ka sawi tawh hi,

²⁹in thi ang a, in ruang chu thlalêrah hian a let pheng phung ang.

³⁰In phunchiar êm avângin Nuna fapa Josua leh Jefunea fapa Kaleba te chauh lo hi chuan, kum sawmhnih a chin chung lam rêng rêng chu in hnêna pêk ka tiam ramah chuan in lût tawp lo vang.

³¹‘Kan fanau tê tê hian an tuar ang a’ in tihte hi chu ka hruai lût ang a, a chanchin chauh in hriat ram chu an luah ang.

³²Nangni erawh hi zawng thlalêrah in ruang a thal rem rum dâwn a ni.

³³In fate chu thlalêrah kum sawmli an vâkvai ang a, in thih zawh hma chu in suahsual man in tuar dâwn a ni.

³⁴Ram en thlithlai tûrin ni sawmli an thang a, ni khat aiah kum khat, a vaiin kum sawmli an vâkvai dâwn a ni, ka lâwm lo a ni tih in hria ang.

³⁵Nangni mi sual pungkhâwmho, min kalh min kalh vei ṭhînte u, thlalêrah hian in thi phiar ang; kei, LALPA hian ṭawng ka thlah tâk hi,” a ti a.

³⁶Ram en thlithlai tûra tirh an lo kîra a ṭha lo zawnga ram chanchin sawia, mipui tilunghnûrtute chu,

³⁷LALPA hmaah hri veiin an thi ta a.

³⁸Ram en thlithlaitute zîngah Nuna fapa Josua leh Jefunea fapa Kaleba chauh chu a dam chhun an ni ta a.

³⁹Mosian chûng thu chu Israel mite a hrilh a; an lungawi lo hle a.

⁴⁰A tûk zîngah chuan an tho va, tlângram lam pan an tum a, “Heti thleng hi kan lo kal tawh a, tûnah zawng LALPA sawi rama luh kan inpeih ta, kan lo tisual a ni,” an ti a.

⁴¹Mosia chuan, “In hlawhtling dâwn lo tih hre reng chungin engtizia nge LALPA thupêk in awih loh?

⁴²LALPA chuan a awmpui lo vang che u; in hmêlmate lo thah mai mai tûrah chho duh ting suh u.

⁴³Amalek mite leh Kanan mite in beih ni chuan an khawlaiah in thi ngei ang, LALPA in zui duh si lo va, a pui lo vang che u,” a ti a.

⁴⁴Mahse, tlângram chu bei tûrin an pan lui hrâm a. Thuthlung Bâwm leh Mosia erawh chu an kal ve lo.

⁴⁵Amalek leh Kanan mi, chu laia awmte chuan an rawn bei a, an hneh a, Horma thlengin an ûm a.