Read Mizo Lushai Numbers 15 Bible Online

Numbers 15 - Mizo Lushai bible

Numbers 15

¹ LALPA chuan Mosia hnênah,

²“Israel mite chu hrilh rawh. In awmna atân ka pêk tûr che u ram ka hruai thlen hunah che u chuan,

³bâwngpa te, berâmchal te, berâmpui te, kêl te, LALPA hnênah hâlral thilhlan atân te, mahni duh thu-a thilhlanah te, kût nikhuaa thilhlanah te in hmang tûr a ni, hêng thil hlan rim hi LALPA lâwmzâwng tak chu a ni.

⁴Hâlral thilhlan atân berâm emaw kêl emaw in rawn hlan chuan pakhat zêlah buhbâl thilhlan atân chhangphut ṭha chi kg. khat leh oliv hriak litar khat in rawn keng tûr a ni, in tûr thilhlanah uain litar khat nên.

⁶Berâmchal in hlan dâwn chuan buhbâl thilhlan atân chhangphut ṭha chi kg. hnih leh Oliv hriak litar khat leh a chanve in rawn keng tel tûr a ni.

⁷In tûr thilhlanah uain litar khat leh a chanve han keng tel bawk ang che u. Hêng thilhlan hâl hi LALPA lâwmzâwng tak chu a ni.

⁸Hâlral thilhlan atân LALPA hnêna bâwngpa in rawn hlanin emaw, tiamkam tlâkna thilhlan atân emaw, remna thilhlan atân emaw inhlan rualin

⁹chhangphut ṭha chi kg. thum, oliv hriak litar hnih in rawn keng tel tûr a ni.

¹⁰Uain litar hnih pawh in rawn keng tel tûr a ni. Hêng thilhlan rim hi LALPA lâwmzâwng tak chu a ni.

¹¹“Bâwngpa te, berâmchal te, berâmpui te leh kêlte in rawn hlan rualin pakhat hisâp zêla in rawn hlan tel tûr chu hêng zât hi a ni.

¹²In ran hlan a tam dân azirin hêng thil dang pawh hi in telh tam tûr a ni.

¹³Israel mi tawh phawt chuan ei tûr thilhlan LALPA lawmzâwng hâl tûr a rawn lâk chuan khitiang khian tih tûr a ni.

¹⁴Hnam dang, in zînga piangin emaw, lo awm ve zawkin emaw ei tûr thilhlan LALPA lawmzâwng an hlan chuan khitiang bawk khian an ti tûr a ni.

¹⁵Mikhual leh khawtual pawhin in thlahte thleng pawhin tih dân thuhmun in hmang tûr a ni. LALPA hmaah in thuhmun vek si a.

¹⁶Nangni leh in zînga hnam dangte pawhin chûng chu kumkhuain in zâwm tûr a ni,” a ti a.

¹⁷ LALPA chuan Mosia hnênah,

¹⁸“Israel mite chu hrilh rawh: ram ka pêk tûr che u in lo thlena,

¹⁹in buh thar hmasa in ei hunah chuan LALPA hnêna hlan tûr a ṭhen in dah hrang tûr a ni.

²⁰In barli thar aṭanga in chhang siam hmasak ber tlang khat pawh LALPA hnênah in hlân tûr a ni; in buh vuak hmasa LALPA hnêna in pêk ang bawk khân pêk tûr a ni.

²¹Kumkhuain in chhang siam hmasak tlang khat chu LALPA hnênah in pe ziah tûr a ni.

²²“Mosia hnêna LALPA thil tuk hi tuin emaw ti lo palh se emaw,

²³hnam pum puiin Mosia hnêna thupêk zawng zawng hi an tih loh palhin emaw,

²⁴an thil tihsual palh chu chinchâng an hriat loh vâng a nih chuan hâlral thilhlan atân bâwngpa an hlân tûr a ni; a telh tûr bituk zât buhbâl thilhlan leh in tûr thilhlan uain nên; chu chu LALPA lâwmzâwng chu a ni si a. Sual thawina thilhlan atân kêlpa an hlân tel bawk tûr a ni.

²⁵Puithiam chuan hnam pum sual chu a thawi ang a, an thil tihsual chu an tih palh tak tak a ni si a; sual thawina thilhlan LALPA hnêna an hlan tawh avângin ngaihdam an ni tawh ang.

²⁶Israel hnam pum pui chu, an zînga hnam dang awm vete nên lam ngaihdam an ni ang, an za-in thil an tisual palh a ni.

²⁷Mi mal pawhin hre lova thil sual a tihpalh chuan, sual thawina thilhlan atân kêlno, a nu, kum khat vêla upa, a hlân tûr a ni.

²⁸Puithiam chuan maichâmah chu mi sual thawina thilhlan chu a tihsak ang a, ngaihdam a ni tawh ang.

²⁹Mi malin emaw, a hnam pumin emaw thil tihsual palh thu-ah Israel-te zîngah chuan a khual a tualin he dân hi an zâwm tûr a ni.

³⁰“Tu pawh, hre reng chunga thil tisual chu khawtual pawh, mikhual pawh, LALPA sawichhia a ni: in tihlum ngei tûr a ni.

³¹LALPA thu chu a pawisak lova, a thupêkte a bawhchhiat luih avângin tihhlum daih tûr a ni, a sual mawh chu a phur ang.”

³²Vawi khat chu Israel-te thlalêra an awm lai khân mi pakhatin sabat ni-ah thing a fawm a.

³³Mosia te, Arona te leh pungkhâwmho hnênah chuan an hruai a.

³⁴Engtia tih tûr nge tih a chian mai loh avângin ripah an khung a.

³⁵LALPA chuan Mosia hnênah, “Tihhlum tûr a ni, vântlângin daipâwnah lunga den hlum tûr a ni,” a ti a.

³⁶LALPA thupêk angin vântlâng chuan daipâwnah an hruai a, lungin an dêng hlum ta a.

³⁷ LALPA chuan Mosia hnênah,

³⁸“Israel-te chu hrilh rawh: In silhfên tlâng kilah pehbuk siam ṭhîn rawh u, la dumpâwlin siam ula, thil chîn kumkhuaah in neih dâwn nia.

³⁹Chu pehbuk chuan ka thupêkte a hriat chhuahtîr ang che u a, in zâwm ṭhîn ang; tichuan, min hawisan lo vang a, mahni duh thu leh mahni châk zâwng angin in khawsa dâwn lo nia.

⁴⁰Pehbuk chuan ka thupêk zawng zawng zâwm tûr in ni tih te, ka tâna invawng thianghlim tlat tûr in nih te a hriat chhuahtîr ṭhîn ang che u.

⁴¹In Pathian ni tûrin, kei, LALPA in Pathian hi Aigupta ram aṭanga hruai chhuaktu che u kha ka ni. LALPA in Pathian ka nih hi,” a ti a.