Read Mizo Lushai Numbers 16 Bible Online

Numbers 16 - Mizo Lushai bible

Numbers 16

¹Levia chi, Kohata thlah, Izara fapa Kora chuan Mosia luahlan a tum a. Reubena thlah Dathana leh Abirama, Peleta fa, Eliaba leh Ona fate chuan an thlâwp a.

²Israel mi, hruaitua an thlan, pa fel tak tak mi zahnih leh sawmngain an thlâwp bawk a.

³Mosia leh Arona hnênah a rualin an lo thawk a, “I inlek lu ta, mi tin LALPA ta kan ni vek a, LALPA chuan min awmpui ve ṭheuh alâwm. Chuvângin, nang Mosia, eng vangin nge LALPA mite zînga lal bika i indah?” an rawn ti a.

⁴Mosian a lo hriat chuan a bawkkhup a, a ṭawngṭai a.

⁵Kora leh a ṭhiante hnênah chuan, “Naktûk zîngah LALPA chuan ama ta te chu a rawn tifiah mai ang; a mi thlante chauh maichâma an lo kal a phal dâwn a ni.

⁶Kora, i ṭhiante nên hian in meilawh keng ula, meiling dah ula, naktûk zîngah LALPA hmaah rimtui hâl ang che u.

⁷LALPA chuan tu nge a thlan kan hre mai ang. Nangni Levia thlahte hi a ni inlek lu ta chu,” a ti a.

⁸Mosia chuan Kora hnênah, “Levia thlahte u, ngaithla teh u.

⁹Israel mipui zîng ata a bula awma, LALPA Biakbûka rawngbâwl tûr te, thil ṭûl apiang mipui lo tihsak tûr tea a serh hrang che u hi thil nêp tak em ni?

¹⁰Chu chanvo ropui tak chu nang leh Levia thlah dangte hi a chantîr che u a, puithiam nih leh zêl in tum a ni maw?

¹¹Arona chunga i hote nên in vui hi Pathian laka vui in ni asin” a ti a.

¹²Mosia chuan Eliaba fa Dathana leh Abirama chu a ko va, anni chuan, “Kan lo kal lo vang,

¹³khawizu leh hnutetuia luang ram ata hetiang thlalêr hmuna thi mai tûra min hruai chhuak hi thil nêp tak em ni? I intilal hle lehnghâl a.

¹⁴Khawizu leh hnutetuia luang ram awzâwngah min hruai loh hi; lo te, grep hmun te lah kan nei teuh si lo. Meng ve reng si min bum i tum a nih hi, kan lo kal lo vang,” an ti a.

¹⁵Mosia chu a thinur hle a, LALPA hnênah, “An thilhlan eng mah lo pawm suh ang che; an chungah eng mah tihsual ka nei lo va, tu sabengtung mah ka lâksak ngai hlei nêm,” a ti a.

¹⁶Mosia chuan Kora hnênah, “Naktûkah i hote nên, Inbiakna bûkah lo kal ula, Arona pawh a lo kal ang.

¹⁷Mahni meilawh rawn keng ṭheuh ula, meiling dah ula, rimtui hâl tûr chu phul ula, maichâmah han keng ang che u, Arona pawhin a rawn keng ang,” a ti a.

¹⁸Tichuan, mahni meilawhah meiling an dah ṭheuh va, rimtui chu an phul a, Inbiakna bûk luhnaah chuan Mosia leh Arona te nên an ding tlâng a.

¹⁹Kora chuan a hote lo kal khâwm chu Inbiakna bûk kawngkaah chuan Mosia leh Arona te chu a hmachhawntîr a, LALPA ropuina chu mi tin hmuhah a lo lang ta thut a.

²⁰ LALPA chuan Mosia leh Arona hnênah,

²¹“Hêng pungkhâwmho hi inthiar fihlîmsan teh u, ka han tiboral phiar teh ang,” a ti a.

²²Anni chu an bawkkhup a, “Aw Pathian, mi tin nunna hnâr i ni a, mi pakhat sual avângin mi zawng zawng chungah i thinur dâwn em ni?” an ti a.

²³ LALPA chuan Mosia hnênah,

²⁴“Mipui chu Kora te, Dathana te Abirama te bûk aṭanga insaseng tûrin hrilh rawh,” a ti a.

²⁵Mosia chu Israel hruaitute chuan an zui a, Dathana leh Abirama hnênah chuan an kal a.

²⁶Mosia chuan mipui hnênah, “Hêng mi sualho bûk bulah hian tu mah awm suh u, an thil eng mah khawih hek suh u, an sual avângin nangni pawh in ral mai ang,” a ti a.

²⁷Tichuan, Kora te, Dathana te leh Abirama te bûk aṭang chuan an insaseng a; Dathana leh Abirama pawh an bûk aṭang chuan an lo chhuak a: kawngka bulah chuan an nupui leh an fanau te nên chuan an ding a.

²⁸Mosia chuan mipui hnênah, “Pathianin hêng thil hi ti tûrin min tîr a ni tih in hria ang, ka duh thu-a ti ka ni lo ve.

²⁹Hêng mite hi thih dân pangngaia an thiha, danglam deuhva hrem an nih loh chuan min tîr a ni lo vang.

³⁰LALPA hian thil la hriat ngai loh a rawn tiha, lei a khîk phuka, an thil neih zawng zawng nên a nung chunga mitthi khuaa an chhuk chuan hêng mite hian LALPA chu an hnâwl ngei tihna a ni ang,” a ti a.

³¹A sawi zo hman chiah a, Dathana leh Abirama awmna lei chu a kak phuk a,

³²an chhûngte leh Kora ho mi dangte pawh chu an neih zawng zawng nên an tla pil ta vek a.

³³Tichuan, an neih zawng zawng nên mitthi khuaah an chhuk ta a ni: lei kak chu a ping leh a, anni chu an pil bo ta a.

³⁴Chuta awm ve Israel mi zawng zawng chuan ṭê teng tung thâwm an hriat chuan an tlânchhia a, “Tlân rawh u, kan tla pil ve mai ang e,” an ti a.

³⁵ LALPA chuan mei a rawn tîr a, rimtui hâltu mi zahnih leh sawmngate chu a rawn kâng hlum ta vek a.

³⁶ LALPA chuan Mosia hnênah,

³⁷“Puithiam Arona fapa Eleazara hrilh rawh: Kâng hlum tate dâr meilawh ken kha chhar khâwm sela, a meihawlte chu daipâwnah paih rawh se; dâr meilawh zawng zawng kha serh hran tawh a ni si a.

³⁸LALPA maichâma hlan an nih khân thil thianghlim an lo ni ta si a.

³⁹An sual vânga kâng hlum tate meilawh chu la khâwm la, chhu pêr la, maichâm chhînah siam rawh, Israel mite tân ṭihkhai a ni dâwn nia,” a ti a.

⁴⁰Puithiam Eleazara chuan meilawh chu a la khâwm a, a chher phêktîr a, maichâm chhîn chu a siam ta a. Arona thlahte tih loh chuan maichâmah LALPA tân tu man rimtui an rawn hâl tûr a ni lo tih Israel-ten an hriatna tûr a ni ta a. Kora leh a fate angin an thi ve mai ang. Eleazara hnêna thupêk, Mosia hnêna LALPA sawi ang chuan hêng hi an ti a.

⁴¹A tûkah chuan Israel pungkhâwmho zawng zawng chuan Mosia leh Arona chu an dem a, “LALPA mite in tihlum vei a,” an ti a.

⁴²Mipuiin Mosia leh Arona an zim luai luai lai chuan Inbiakna bûk an han en a, chhûmin a lo khuh a, LALPA ropuina chu an hmu a.

⁴³Mosia leh Arona chu bûk kawtah an kal a.

⁴⁴LALPA chuan Mosia hnênah:

⁴⁵“Mipui zîng ata kha lo kal hrang teh, ka han tihlum phiar teh ang,” a ti a. An pahnih chuan hmai lei siin an kûn a.

⁴⁶Mosia chuan Arona hnênah, “I meilawh kha keng la, maichâm mei saw va rût la, mipui zîngah, an sual thawi nân rimtui va hâl thuai teh; LALPA thinurna chu a lo thleng dêr tawh a nia; hmanhmawh rawh, hri an vei ṭan e,” a ti a.

⁴⁷Arona chuan Mosia thu chu a awih a, mipui zîngah a va kal chuan hri an lo vei nual tawh a; rimtui chu a hâl a, mipui sualna chu a thawi ta a.

⁴⁸A thi leh a la damte inkârah chuan a ding a, hri chu a kiang ta a.

⁴⁹Kora helna avânga thite chu an vaiin mi sîngkhat leh sângli leh zasarih an ni.

⁵⁰Hri a reh hnu chuan Arona chu Inbiakna bûkah Mosia hnênah chuan a kal leh ta a.