Read Mizo Lushai Numbers 17 Bible Online

Numbers 17 - Mizo Lushai bible

Numbers 17

¹ LALPA chuan Mosia hnênah,

²“Israel mite hrilh rawh: tiang sâwm leh pahnih, hnam tin hruaitu tân pakhat zêl rawn la teh se.

³Levia chite tiangah chuan Arona hming ziak ang che; hnam khat hruaitu hming an tiangah chuan a chuang zêl tûr a ni.

⁴Inbiakna bûkah, Thuthlung Bâwm hma, kan inbiakna ṭhinah, i dah dâwn nia.

⁵Ka mi thlan chu tu ber hi nge in hriata, tu mah in vui tawh loh nân ka mi thlan tiang chu ka chawrtîr dâwn a ni,” a ti a.

⁶Mosia chuan Israel-te chu a hrilh a, hnam hruaitute chuan tiang pakhat ṭheuh an rawn pe a, a vaiin sâwm leh pahnih a ni; Arona tiang pawh a tel ve.

⁷Mosia chuan bûk chhûng Thuthlung Bâwm hmaah chuan a dah a.

⁸A tûk zîngah chuan Mosia chu Inbiakna bûkah chuan a lût a, Arona tiang Levia thlahte hminga dah chu a lo chawr a, a kuhmûm a, a pâr a, theitê a lo rah a.

⁹Mosia chuan tiang zawng zawng chu LALPA hma ata chu a la chhuak a, Israel-te chu a entîr a, mahni tiang tiang an la ta sang sang a.

¹⁰ LALPA chuan Mosia hnênah, “Thuthlung Bâwm hmaah Arona tiang chu dah leh rawh; Israel mi, hel chîngho hi an vui leh chuan an thi mai ang tih hriatna tûrin dah reng ang che,” a ti a.

¹¹LALPA thupêk ang chuan Mosia chuan a ti ta a.

¹²Israel mite chuan Mosia hnênah: “Chuti chu kan va thi rem rum mai âwm ve?

¹³LALPA Biakbûk bul hnaihtu ngawt pawh an thih chuan kan va mang mai âwm ve!” an ti a.