Read Mizo Lushai Numbers 18 Bible Online

Numbers 18 - Mizo Lushai bible

Numbers 18

¹ LALPA chuan Arona hnênah, “Nang leh i fate leh Levia chite hian Inbiakna bûka rawngbâwl hna tihdik lohvah mawh in phur ang; puithiam rawngbâwlna bîka tihsual mawh chu nang leh i fate chauhvin an phur ang.

²In laichîn, Levia chite chu, bûka in rawngbâwl hna thawh ṭanpui tûr che uin pun rawh u.

³An puibâwm ang che u a, bûk enkawl hna hi an mawhphurhna a ni ang; amaherawhchu, hmun thianghlim leh maichâm thil serh chu an khawih ve tûr a ni lo, an khawih hlauh chuan nangni pawh, anni pawh in thi mai ang.

⁴Bûka rawngbâwl hna zawng zawngah an pui ang che u a, an hna chu anmahni ngeiin an tifel tûr a ni; mi dang mi narânin an pui tûr che u a ni lo.

⁵Nang leh i fate chauhvin Hmun Thianghlim leh maichâm chu in enkawl tûr a ni, Israel-te chungah ka thinur leh thut loh nân.

⁶I laichîn Levia chite hi nangmah ṭanpui tûra Israel-te zîng ata ka thlang chhuak a, thilpêka petu che kei hi ka ni.

⁷Inbiakna bûka thawk tûrin ka tâna serh hran an ni tawh, Hmun Thianghlim Bera awm leh maichâma puithiam rawngbâwl hna erawh hi chu nang leh i fate chauhvin in ti tûr a ni. Puithiam hna hi ka pe che u a; chuvângin, hêng hi in mawhphurhna a ni, mi narânin an tih ve chuan tihhlum tûr an ni,” a ti a.

⁸ LALPA chuan Arona hnênah, “Israel miten ka hnênah thên thilhlan an rawn hlan, serh hran tawh rêng rêng chu nang leh i fate hnênah puithiam sa atân kumkhuain ka pe a che u.

⁹Buhbâl thilhlan te, sual thawina thilhlan te, bawhchhiat man thilhlan te an rawn hlân a, maichâma hâl bâng zawng zawng chu in chan tûr a ni.

¹⁰Hmun Thianghlimah ngei chûng sa chu in ei tûr a ni, mipa chauhvin ei tûr a ni: thil serh a ni e.

¹¹“Israel mite thilhlan chi hrang hrang, thêna hlan rêng rêng chu, in fapate in fanute nêna kumkhuaa in chanpual atân ka pe a che u, in chhûng zînga mi thiang apiang chuan in ei thei ang.

¹²“Oliv hriak fîm ber te, uain thlum ber te, vaimîm ṭha ber te Israel miten min pêk ṭhin tûr chu ka pe a che u, in ta tûr a ni;

¹³An ram chhûnga an theirah hmin hmasa LALPA hnêna an rawn hlante pawh in chan tûr a ni. In chhûng zînga a thiang apiangin in ei thei ang.

¹⁴Israel-te zînga kawh bîk nei thilhlan tih loh chu in ta vek tûr a ni.

¹⁵“Mihring pawh, ran pawh, a piang hmasa ber, chhûl keutu, Israel-ten LALPA an pêk ṭhin chu, in ta tûr a ni; mihring leh ei thiang lo ran chu, tlan theih a ni ang.

¹⁶Naupang thla khat chin tlanna tûr chu biakbûka an hman lai mêk tangkaraw sekel nga bûk a ni ang.

¹⁷Bâwng no te, berâmno te, kêlno te, hrin hmasak chu tlan theih a ni lo vang, serh hran an ni. Talh tûr a ni a, a thisen chu maichâma theh tûr a ni a, a thau pawh maichâma hâl ral tûr a ni: chu chu LALPA lâwmzâwng tak chu a ni.

¹⁸Thên thilhlan angin a irno leh a bawp chu in ei ve tûr a ni.

¹⁹“Israel-ten ka hnêna thên thilhlan an rawn ken chu in fanu leh in fapate nêna in chan kumkhua atâna ka ruat a ni. Hei hi nang leh i thlahte nêna ka kumkhaw thuthlung bawhchhiat loh tûr chu a ni.”

²⁰Arona hnênah LALPA chuan, “Ro atân ram i nei ve tûr a ni lo va, Israel miten ram an sem ve tûr che a ni hek lo. Kei hi i ro, Israel-te zînga i chanvo chu ka ni.

²¹“Levia chite chu Inbiakna bûk an enkawl hah manah Israel miten sâwma pakhat an pêk hi an chanvo atân ka ruatsak a ni.

²²Tûn chinah chuan Israel-te hi Inbiakna bûk bulah an lo kal tûr a ni tawh lo, thil sual an tipalh ang a, an thi dah ang e. He dân hi in thlahte tân pawh a ni.

²³Israel ramah Levia chite hian in-lo-ram nghet an nei ve tûr a ni lo. Israel miten sâwma pakhat ka hnêna an pêk chu,

²⁴an tân dah hran a ni; chuvângin alâwm, ‘ram insemnaah chan in nei ve tûr a ni lo’ tia ka sawi ni,” a ti a.

²⁵ LALPA chuan Mosia hnênah,

²⁶“Levia chite chu hrilh rawh: Israel mite hnên aṭanga in dawn, in chan atâna LALPA ruat aṭanga sâwma pakhat chu LALPA tân in pe ve tûr a ni.

²⁷Chu chu hruiha an buh vuakte leh uain khura an uain tling an pe ṭhîn ang bawkin in pe ve ang a, pawmsak in ni ang.

²⁸Israel mite hnên aṭanga sâwma pakhat in dawn, LALPA hnêna sâwma pakhat in pêk ve chu, puithiam Arona hnênah in pe ve tûr a ni.

²⁹In thil dawn zînga a ṭha berte chu LALPA tân hlân ve leh zêl rawh u; buh thar leh uain thar anga ngaih a ni ang.

³⁰Lo neituin a ṭhen a nei ta angin nangni pawhin in pêk bâng chu in nei ve dâwn nia.

³¹Chûng chu Biakbûk enkawl hna in thawh hlawh a ni a, in chhûngte nên in duh duhnaah in ei thei ang.

³²A ṭha ber LALPA hnêna in hlan tawh chuan a bâng chu ei mah ula, in tisual lo ve; in hlan loh erawh chuan Israel-te thilpêk thianghlim tibawrhbâng in ni ang a, in thi mai ang,” a ti a.