Read Mizo Lushai Numbers 19 Bible Online

Numbers 19 - Mizo Lushai bible

Numbers 19

¹ LALPA chuan Mosia leh Arona hnênah,

²“Israel-te hnênah LALPA thupêk hi hrilh rawh u. Bâwngla sen, hmêlhem lo, leileta la chhawr ngai loh, in hnêna rawn kai tûrin hrilh rawh u.

³Puithiam Eleazara pe sela, ani chuan riahhmun pâwn, daiah a kalpui ang a, a hmuh ngeiah a talhtîr tûr a ni.

⁴Puithiam Eleazaran a thisenah chuan a zungṭang a chiah ang a, Inbiakna bûk kawt lam hawiin vawi sarih a theh tûr a ni.

⁵Bâwngla chu a vun te, a sa te, a thisen te leh a ek te nên a hmuh ngeiah a hâltîr tûr a ni.

⁶Puithiam chuan sidar thing te, husop te, la sen te a la ang a, bâwngla hâlna meiah chuan a rawh tûr a ni.

⁷Puithiam chuan a silhfênte chu a su ang a, a inbual tûr a ni; chumi zawhah riahhmunah a lo lût thei ang; mahse, tlai thlengin a bawlhhlawh ang.

⁸Bâwngla hâltu pawh khân a silhfênte chu a su ang a, a inbual tûr a ni: tlai thlengin a bawlhhlawh ang.

⁹Mi thiang, bawlhhlawh lovin, bâwngla vâp chu a rût khâwm ang a, Israel pungkhâwmho tâna hman tûrin hmun serhah chuan a dah ṭha ang; sual tlenfaina tui theh tûrah phul ṭhin tûr a ni.

¹⁰Bâwngla vâp rût khâwmtu pawh chuan a silhfên a su ang a, tlai thlengin a bawlhhlawh ang. Hei hi Israel mite leh an zînga hnam dang chêng vete tân kumkhaw dânah neih tûr a ni.

¹¹“Tu ruang pawh ni se, mitthi ruang rêng rêng khawih chu, ni sarih chhûng an bawlhhlawh ang.

¹²Chu mi chuan a ni thum ni-ah leh a ni sarih ni-ah thenfaina tui khân a inthehtîr tûr a ni; tichuan, a lo thiang tawh ang; a ni thum ni-ah leh a ni sarih ni-ah tuia theh thianghlim a nih loh chuan a bawlhhlawh reng ang.

¹³Tu ruang pawh ni se, mitthi ruang rêng rêng khawih chuan tui hmang hian a intithianghlim tûr a ni; tui hi theh a nih loh chuan a bawlhhlawh a, a bawlhhlawhna chu a la reh lo a ni; LALPA hmun thianghlim chu a tibawrhbâng a, Israel mite zîng ata ensan tûr a ni.

¹⁴“Bûk chhûngah mi a thihin a chhûnga awmte leh a bula lo lût apiang ni sarih chhûng an bawlhhlawh ang.

¹⁵Bungbêl te, tuibêlte pawh chhin loh chu ni sarih chhûng a bawlhhlawh a ni.

¹⁶Indonaa thi ruang te, tâmlaka tlu hlum ruang te, mihring ruh te, thlân te khawih apiang chu ni sarih chhûng an bawlhhlawh ang.

¹⁷“Chutiang bawlhhlawh chu hetianga then fai tûr a ni: Novin tui luang lai an suak ang a, sual thenna tûr bâwngla vâp kha phul tûr a ni.

¹⁸Mi thiangin tuiah chuan husop a chiah ang a, chu chuan bûk te, a chhûnga thil awm zawng zawng te, a chhûnga mi zawng zawng te a theh ang a; chutiang bawkin râl thi ruang te, tlu hlum ruang te, mihring ruh leh thlân khawihtute chu a theh tûr a ni.

¹⁹Mi thiang chuan mi bawlhhlawh chu a ni thum ni leh a ni sarih ni-in tui chuan a theh tûr a ni; ani chuan a silhfên a su ang a, a inbual bawk ang a, tlaiah a lo thianghlim tawh ang.

²⁰Chutianga bawlhhlawh chu a inthen fai duh lohva, thenfaina tuia theh a nih loh chuan a bawlhhlawhna chu a reh lo va, LALPA Hmun Thianghlim a tibawrhbâng a ni a, Israel miten an ensan tûr a ni.

²¹Tui theh tûr thehtu pawh chuan a silhfên a su tûr a ni, tui theh tûr khawihtute chu tlai thlengin an bawlhhlawh a ni.

²²Mi bawlhhlawhin a khawih apiang a bawlhhlawh ve a, chu mi bawlhhlawh khawihtu pawh chu tlai thlengin a bawlhhlawh a ni.”