Read Mizo Lushai Numbers 2 Bible Online

Numbers 2 - Mizo Lushai bible

Numbers 2

¹ LALPA chuan Mosia leh Arona hnênah chuan,

²Israel mite chu a pâwl leh chhûngkaw chhinchhiahna puanzâr târin Inbiakna bûk hawia bûk rem tûrin a hrilh a.

³Khawchhak lamah chuan Juda pâwl an awm ang: Juda thlahten an chhûngkaw puanzâr an târ ang a, a bulah an bûk an rem ang; an hruaitu chu Aminadaba fapa Nasona a ni,

⁴mi sîngsarih leh sângli leh zaruk an tling.

⁵An dawta bûk rem tûr chu Isakar thlahte an ni; an hruaitu chu Zuara fapa Nathanela a ni.

⁶Mi sîngnga leh sângli leh zali an tling.

⁷Anni dawt leha bûk rem tûr chu Zebulun thlahte an ni, an hruaitu chu Helona fapa Eliaba a ni.

⁸Mi sîngnga leh sângsarih leh zali an tling.

⁹Anni pâwl hi Juda pâwla chhiar an ni, mi nuaikhat leh sîngriat leh sângruk leh zali an tling. Anniho hi kal hmasa zêl tûr an ni.

¹⁰Chhim lamah chuan Reubena pâwlho an awm ang. Reubena thlahte chuan an chhûngkua leh an pâwl puanzâr zârnaah bûk an rem ang, an hotu chu Sedeura fapa Elizura a ni.

¹¹Mi sîngli leh sângruk leh zanga an tling.

¹²An dawta bûk rem tûr chu Simeona thlahte an ni, an hotu chu Zurisadaia fapa Selumiela a ni.

¹³Mi sîngnga leh sângkua leh zathum an tling.

¹⁴An dawta bûk rem tûrte chu Gada thlahte an ni, an hotu chu Reuela fapa Eliasafa a ni;

¹⁵mi sîngli leh sângnga zaruk leh sawmnga an tling.

¹⁶Anniho hi Reubena pâwla chhiar an ni; mi nuaikhat leh sîngnga leh sâng khat leh zali leh sawmnga an ni. Anni hi Juda pâwl dawta kal ṭhîn tûr an ni.

¹⁷Inbiakna bûk chu zâwn a hunah Levia chite chu a laiah an kal ang a, an awmna zir zêlin pâwl dangte chu an kal ṭhîn tûr a ni.

¹⁸Khawthlang lam pangah Efraim pâwlho an awm ang a, an pâwl chhinchhiahna puanzâr an zâr ang a, a bulah Efraim-ho chuan bûk an rem ang; an hruaitu chu Amihuda fapa Elisama a ni,

¹⁹mi sîngli leh zanga an tling.

²⁰An dawta bûk rem tûrte chu Manasea thlahte an ni, an hruaitu chu Pedazura fapa Gamaliela a ni;

²¹mi sîngthum leh sânghnih leh zahnih an tling.

²²Anni dawta bûk rem tûr chu Benjamina thlahte an ni, an hruaitu chu Gideona fapa Abidana a ni;

²³sîngthum leh sângnga leh zali an tling.

²⁴Anniho hi Efraim pâwla chhiar an ni, mi nuaikhat leh sângriat leh za an ni.

²⁵Hmâr lam pangah Dan pâwlho an awm ang. An pâwl chhinchhiahna puanzâr an zâr ang a, a bulah Dan-ho chuan bûk an rem ang. An hotu chu Amisadaia fapa Ahiezera a ni;

²⁶mi sîngruk leh sânghnih leh zasarih an tling.

²⁷An dawta bûk rem tûr chu Asera thlahte an ni, an hruaitu chu Okrana fapa Pagiela a ni;

²⁸mi sîngli leh sângkhat leh zanga an tling.

²⁹A dawt leha bûk rem tûr chu Naftalia thlahte an ni; an hruaitu chu Enana fapa Ahira a ni,

³⁰mi sîngnga leh sângthum leh zali an tling.

³¹Anniho hi Dan pâwla chhiar an ni, mi nuaikhat leh sîngnga leh sângsarih leh zaruk an ni. Anni hi hnu dâla kal tûr an ni.

³²Hêng hi Israel mi, a chhûngkuaa thliara hming an ziakte chu an ni, an zaa fin khâwmin mi nuairuk leh sângthum leh zanga leh sawmnga an tling.

³³Mosia hnêna LALPA thupêk angin Levia thlahte chu Israel-te chhiarnaah an telh ve lo.

³⁴Mosia hnêna LALPA thupêk angin Israel-te chuan an ti a, a pâwl pâwlin bûk an rem a, chhûngkaw indawtin an kal ṭhîn.