Read Mizo Lushai Numbers 20 Bible Online

Numbers 20 - Mizo Lushai bible

Numbers 20

¹Thla khatnaah chuan Israel mite chu an za-in Zin thlalêr an thleng a. Kades-ah chuan an châm a, Miriami chu a thi a, an phûm ta a.

²Israel mite chuan tui an nei lo va, Mosia leh Arona chu an rawn hual a,

³Mipui chuan Arona chu an chhâl a, “Kan unaute thih rual khân Biakbûk kawtah khân lo thi ve ila a ṭha zâwk tûr.

⁴Engtizia nge kan rante nêna thi mai tûra he thlalêra LALPA mite hi min hruai luh le?

⁵Engah nge Aigupta ram ata hetiang ram ro takah hian min hruai le? Buh chîn theihna tûr pawh a nih loh hi, theipui te, grep te, theibuhfaite han ṭha rual a ni hlei nêm, in tûr takngial pawh tui a awm loh hi,” an ti a.

⁶Mosia leh Arona chuan mipui chu an kalsan a, Inbiakna bûk kawngkaah lei siin an kûn a, LALPA ropuina chu an hmuhah a lo lang a,

⁷LALPA chuan an hnênah,

⁸“Tiang kha la la, Israel-te chu i u Arona nên ko khâwm rawh u; an hmaah, saw lungpui saw, tui tichhuak tûrin hrilh ang che u; lung aṭang chuan pungkhâwmho leh an rante in tûr tui a lo chhuak mai ang,” a ti a.

⁹LALPA thupêk angin Mosia chu a kal a, tiang chu a la a,

¹⁰Arona nên Israel pungkhâwmho chu lungpui bulah chuan a ko khâwm a, Mosia chuan, “Hel hmangte u, in in tûr tui lungpui aṭang hian kan lâk chhuahsak dâwn che u em ni?” a ti a.

¹¹Mosia chuan a bân a phar a, tiang chuan lungpui chu vawi hnih a vua a, tui a lo chhuak ta hawk hawk a; pungkhâwmho leh an rante chuan an in ta a.

¹²LALPA chuan Mosia leh Arona hnênah, “Min ring lo va, Israel-te hmaah min chawimawi loh avângin ka pêk tûr ramah chuan hêng mite hruai lûttu in ni dâwn lo ve,” a ti a.

¹³Israel miten LALPA an chhuahchhalhna hmuna tui hi Meriba tui an vuah ta a ni; anmahni avâng chuan a thianghlimzia a tilang ta a.

¹⁴Kades aṭang chuan Edom lal hnênah Mosian palai a tîr a, “In unau Israel-ten hrehawm tam tak an tuar thu in lo hre tawh châwk ang a.

¹⁵Min thlahtute chu Aigupta ramah an pêm lût a, kum tam fe kan awm a, Aigupta mite chuan kan pate nên min tiduhdah hle a.

¹⁶Kan mangangin LALPA kan au va, anin kan aw a lo ngaithla a, Aigupta ram aṭangin min hruai chhuak tûr vântirhkoh a rawn tîr a; ngai teh, in ram chhim tâwp Kades kan lo thleng ta.

¹⁷Kan ngên a che, in ram hi kalkawngah ka rawn hmang ang e; lovah te, grep hmunahte kan kal lo vang a, in tuikhur pawh kan rawn ṭâwm lo vang che u. Lamlianpuiah kan kal ang a, in ram kan kal pelh hma chu ding lamah emaw, vei lamah emaw kan pêng hauh lo vang,” tiin thu a chah a.

¹⁸Edom lal chuan, “Ka rama in lo luh vaih chuan khandaihin ka bei ang che u,” a lo ti a.

¹⁹Israel mite chuan, “Lamlianpuiah kein kan kal ang, kan rante nên in tui kan in chuan a man kan pe ang che u, in pawi kan khawih hauh lo vang,” an tih pawhin

²⁰Edom lal chuan, “In kal ka phal lo,” a ti tlat a. Anni lo dang tûrin Edom lal chu mi tam fe nên a lo thawk chhuak a.

²¹Edom lal chuan an rama an kal tlang a phal tâk loh avâng chuan Israel-te chu an kîr ta a.

²²Israel fate chu an vaiin an kal leh ta a, Hor tlâng an va thleng a.

²³Edom ramri bul a la ni a, tah chuan Mosia leh Arona hnênah LALPA chuan,

²⁴“Israel mite hnêna pêk ka tiam ramah chuan Arona hi a lût ve dâwn lo, in pahnihin Meriba-ah khân ka thupêk in awih loh avâng khân.

²⁵Arona leh a fapa Eleazara chu Hor tlângah hruai la,

²⁶chutah chuan Arona puithiam kawr chu hlihsak la, Eleazara hâktîr ang che, Arona chu a thi mai dâwn a ni,” a ti a.

²⁷LALPA thupêk ang chuan Mosia chuan a ti a, mipui hmuhah tlângah chuan an chho va.

²⁸Mosia chuan Arona puithiam kawr chu a hlihsak a, Eleazara chu a hâktîr a. Tlângchhîpah chuan Arona chu a thi ta a; Mosia leh Eleazara chu an lo chhuk a.

²⁹Israel pungkhâwmho chuan Arona thih thu chu an hria a, ni sawmthum an sûn a.