Read Mizo Lushai Numbers 21 Bible Online

Numbers 21 - Mizo Lushai bible

Numbers 21

¹Kanan ram chhim lama Kanan mi Arad lal chuan Israel-te chu Atharim lamah an lo kal tih a hriatin a lo bei a, mi ṭhenkhat chu a man a.

²Israel-ho chuan LALPA hnênah thu an intiamkam a. “Hêng mite hi min hnehtîr chuan i tân an khuate lamin kan hlân vek ang a, kan tiboral vek ang,” an ti a.

³LALPA chuan a lo hria a, chûng Kanan mite chu a hnehtîr a. Israel-te chuan an that vek a, an khuate pawh chu an tichhe vek a, a hmun hmingah Horma an vuah a.

⁴Hor tlâng aṭang chuan an kal zêl a, Edom ram hêlna, Tuipui Sen kawng lamah chuan an kal a, a kawng a kual avângin an ning a.

⁵Mipui chu Pathian leh Mosia lakah an vui a, “Engah kher nge Aigupta ram ata he thlalêra thi mai tûra min hruai chhuah? Chaw a awm si lo, tui lah a awm hek lo, he mana chhang teivet lah hi kan ning hlui tawh si,” an ti a.

⁶LALPA chuan rûl chuk na tak a tipuang a, Israel mi tam tak chu an chu hlum a.

⁷Mipui chu Mosia hnênah an lo kal a, “Thil sual kan ti a ni, LALPA chungah leh i chungah kan vai hian thil dik lo kan ti a ni; rûl tirêm tûr hian LALPA min ngensak rawh,” an ti a. Mosian mipui chu a ṭawngṭaisak a.

⁸LALPA chuan Mosia hnênah, “Dârin rûl lem siam la, mi tin hmuh theih tûrin thingtlâwn lêrah khai rawh; rûl chuk apiangin chu chu an en chuan an dam zêl ang,” a ti a.

⁹Mosia chuan dârin rûl lem a siam a, thingtlâwn lêrah a khai a, rûl chuk apiangin dâr rûl chu an en phawt chuan an dam ta zêl a.

¹⁰Israel-te chu an kal zêl a. Obot-ah bûk an khuar a; chu hmun chu an chhuahsan a,

¹¹Moab ram chhak lam thlalêrah Abarim khaw ramah bûk an khuar leh a.

¹²Zered ruamah bûk an khuar leh a,

¹³chuta ṭang chuan an insawn leh a, Arnon lui hmâr lamah bûk an khuar leh a; Arnon lui chu Amor ram dep thlenga awm a ni, Amor leh Moab ramri lui a ni.

¹⁴He lai ram hi ‘LALPA indona’ tih lehkhabu-ah chuan ‘Sufa ruama Vahep khua Arnon ruam te,

¹⁵Ar khaw lama thluang, Moab ri dep ram awihtlân pangpêr,’ tih a ni.

¹⁶Chuta ṭang chuan Beer an tih chu an thleng a; chu hmun chu tuichhunchhuah awmna a ni. LALPA chuan, “Mipui ko khâwm rawh, tui ka pe dâwn,” a ti a, chu tuichhunchhuah chu a pe a nih kha.

¹⁷Israel-te chuan he hla hi an sa a, ‘Aw tuichhunchhuah, lo chik chhuak teh, Zaiin kan lo awi ang che.

¹⁸Mi lian leh hnam hruaitute laih Lal tiang leh talhfiak leka an laih chu,’ tiin. Thlalêr aṭang chuan Matana-ah an insawn a.

¹⁹Nahaliel-ah an kal zêl a, Bamot an thleng a.

²⁰Bamot aṭang chuan Moab ram phai, Pisga tlâng ṭhut an thleng a. Chu tlângchhîp aṭang chuan thlalêr chu a lang vek a ni.

²¹Israel fate chuan Amor lal Sihona hnênah palai an tîr a.

²²“I ramah kan kal tlang ang e, kan rante nên in lovah te, in grep hmunahte kawngpui ata kan pêng lo vang a, in tuichhunchhuah tui pawh kan chawi lo vang, in ram kan pelh hma chu Lamlianpuiah chauh kan kal ang,” an ti a.

²³Sihona chuan Israel-ten an ram an kal tlang chu a lo phal bîk awzâwng lo va, lo dang tûrin a mite a khâwm a, thlalêr Jahaz hmunah a lo kal a, Israel-te chu a lo bei a.

²⁴Israel-te chuan an lo that ṭeuh va, an ram hmâr lam, Arnon lui aṭanga Jabok lui thlengin an neihsak ta a. Jabok hmâr lam chu Amon mite ram a ni; anni chuan an ramri chu an lo vêng hneh hle a ni.

²⁵Israel-te chuan Amor-ho khawpuite chu an la vek a; khawpuiahte chuan Israel-te chu an awm ta a. Hesbon leh a chhehvêl khuate pawh an luahsak vek a.

²⁶Hesbon chu Amor lal Sihona khawpui a ni. Tûn hmain Moab lal nên an inbei a, Arnon lui thlengin Moab ram chu a lo chhuhsak tawh a ni.

²⁷Chuvângin, hetiangin hla an phuah a: Sihona khawpui Hesbon-ah lo kal ula, I din ṭhain i sa ṭha leh ang u;

²⁸Hesbon aṭangin mei a chhuak a, Sihona khawpui chu a kâng a, Moab ram Ar khua a kai a, Arnon lui hmârthlang ramte chu a kâng fai e.

²⁹Moab mite tak chu aw! Khemosa betute chu an chhe zo ta, A betute chu an râltlân a; A fanute chu salah an man, Amor lal Sihona hote chuan.

³⁰Hesbon chu a chhe ta, Dibon thlengin thalin kan kâp; Nofa thlengin kan tiram, Medeba bula awm chu.

³¹Israel-te chu Amor ramah chuan an awm ta a.

³²Jazer khaw beih dân tûr en thlithlai tûrin Mosian mi a tîr a. Israel-te chuan a chhehvêl khuate nên an la a, chûng khuaa awm Amor mite chu an hnawt chhuak vek a.

³³An lo kual a, Basan lal Oga chuan lo dan a tum a, a mite a pun ṭeuh va. Edrei hmunah Israel-te chu a va bei a.

³⁴LALPA chuan Mosia hnênah, “Ani chu hlau suh, a mi zawng zawngte leh a ram chu i kutah ka pe tawh a che; Hesbon khaw lal Sihona chunga i tih ang khân a chungah pawh ti ang che,” a ti a.

³⁵Tichuan, ani chu a fate nên an that a, a mite pawh bâng awm miah lovin an tihlum a, a ram chu an neihsak ta a.