Read Mizo Lushai Numbers 22 Bible Online

Numbers 22 - Mizo Lushai bible

Numbers 22

¹Israel mite chu an insawn zêl a, Moab ram phai, Jordan lui chhak lam Jeriko zâwnah bûk an khuar ta a.

²Zipora fapa Balaka chuan Amor mite chunga Israel-te thil tih chu a hmu a.

³Israel mite chu an tam êm avângin Moab mite chuan an hlau hle a.

⁴Moab-ho chuan Midian hotute hnênah, “Bâwngin hnim a pet duak duak ang hian hêng mite hian kan chhehvêl mi zawng zawng hi min ei zo vek dâwn alâwm,” an ti a.

⁵Chutih laia Moab lal chu Zipora fapa Balaka a ni. Eufretis lui kama Pethor khua, a laichînte awmna rama awm, Beora fapa Balaama ko tûrin mi a tîr a.

⁶“Aigupta ram aṭangin mi tam deuh an lo chhuak a, ram an dâp a ni ngawt mai. Kan ram min chhuhsak vek dâwn alâwm; khawngaih takin lo kal la, hêng mite hi ngam rual an ni si lo va, ânchhia min lawhsak teh, kan ngamin kan ram ata kan ûm bo thei mial mahna, mal i sâwmsakte chu an nihlawh ṭhîn a, ânchhia i lawhte chu an chan a chhe ṭhîn tih ka hre si a,” ti tûrin a tîr a.

⁷Moab upate leh Midian upate chu aien man tûr kengin an kal ta a. Balaama hnên an thleng a, Balaka thu chu an hrilh a.

⁸Ani chuan an hnênah, “Zânin chu riak ula, LALPA thu ka dawng mahna, ka hrilh ang che u,” a ti a. Moab miliante chu Balaama inah chuan an riak ta a.

⁹Balaama hnênah Pathian a lo kal a, “I mikhualte khu tute nge ni?” a rawn ti a.

¹⁰Balaaman Pathian hnênah chuan, “Moab lal Zipora fapa Balaka mi tirhte an ni.

¹¹‘Aigupta ram aṭangin mi tam deuh an lo chhuak a, ram an dâp a ni ngawt mai; lo kal la, ânchhia mi han lawhsak teh, kan hneh theiin kan ram ata kan ûm bo thei mahna, an rawn ti,” a ti a.

¹²Pathian chuan Balaama hnênah, “Kal suh, chûng mite chu ânchhia i lawh tûr a ni lo, ka mi duhsakte an ni e,” a ti a.

¹³Zînga an thawh chuan Balaaman Balaka miliante hnênah, “In ramah haw leh mai rawh u, LALPA chuan ka kal a phal lo ve,” a ti a.

¹⁴Moab miliante chu an tho va, Balaka hnênah an kîr a, “Balaama chu a lo kal duh lo,” an ti a.

¹⁵Balaka chuan mi zahawm zâwk mi dang a tirh belh leh a.

¹⁶Balaama hnên an lo thleng a, “Zipora fapa Balaka chuan heti hian a ti.

¹⁷‘Eng mahin ka hnêna i lo kal dâl suh se. Nasa takin ka chawimawi ang chia, i sawi apiang ka ti zêl ang, hêng mite hi ânchhia min lawhsak phawt mai teh’ a ti,” an ti a.

¹⁸Balaka ṭhuihruaite chu Balaama chuan a chhâng a, “Balaka chuan a in khat tangka leh rangkachak mi pe mah sela, ka Pathian LALPA thu chu, a tê emaw, a lian emaw, ka bawhchhe thei lo.

¹⁹Zânin chu riak phawt mai teh u, LALPA chuan eng nge a sawi ka han ngaichâng ang e,” a ti a.

²⁰Zânah chuan Pathian chu Balaama hnênah a lo kal a, “Hêng mite hi ko tûr che-a lo kal an nih chuan, zui mai rawh; mahse, ka hrilh che chauh i ti tûr a ni,” a ti a.

²¹Zîngah Balaama chu a tho va, a sabengtung a siam a, Moab miliante chu a zui ta a.

²²A kal ve tâk mai avâng chuan Pathian chu a thinur hle a, lo dang tûrin LALPA vântirhkoh chu kawngah a lo ding a. Sabengtung chunga chuang a ni a, a chhiahhlawh pahnihin an zui bawk a.

²³Sabengtung chuan LALPA vântirhkoh khandaih kenga kawnga a ding chu a hmu a; rampalailêngah hêl a tum a; kawnga kîr leh tûrin Balaama chuan a vua a.

²⁴LALPA vântirhkoh chu grep huanpal leh pal inkârah, kawng laiah a lo ding a.

²⁵Sabengtung chuan LALPA vântirhkoh chu a hmu a, pal nêkin a kal a, Balaama ke chu palah chuan a nghêng bet a, Balaama chuan a vaw leh a.

²⁶LALPA vântirhkoh chu a insawn a, kawng zîm lai, inpelh theih hauh lohna laiah chuan a lo ding leh a.

²⁷Sabengtung chuan LALPA vântirhkoh chu a hmu a, Balaama chu a bawhpui ta ngawt a. Balaama chu a thinur hle a, sabengtung chu a vaw ta ṭhuai ṭhuai a.

²⁸LALPA chuan sabengtung chu a ṭawngtîr a, “Thil sual eng nge ka tih vawi thum tlawng mi vuak tâk le?” a ti a.

²⁹Balaama chuan sabengtung hnênah, “Min pawisa lo êm alâwm, khandaih phei chu keng ila, ka sât hlum hial tawh ang che,” a ti a.

³⁰Sabengtung chuan Balaama hnênah, “I sabengtung, tûn thleng pawha i chuanna reng ṭhin ka ni a, hetiang hian ka ti ngai em ni?” a ti a. Ani chuan, “Ti ngai lo ve,” a ti a.

³¹LALPA chuan Balaama mit chu a tihvârsak a, khandaih kenga LALPA vântirhkoh kawnga ding chu a hmu ve ta a, a kûn a, lei siin a bawkkhup ta a.

³² LALPA vântirhkoh chuan, “Engtizia nge ṭum thum ngawt i sabengtung i vuak le: Ka duh loh anga i kal luih avângin kawnga dang tûr chein ka lo thawk chhuak a ni.

³³Sabengtung chuan min hmu a, ṭum thum min pelh a tum a, pêng ṭhîn lo se ka lo that mai ang che, ani erawh chu ka zuah ang,” a ti a.

³⁴Balaama chuan LALPA vântirhkoh hnênah, “Thil ka tisual a ni e, mi lo dang tûrin kawngah i ding tih ka hre lo a ni; chuvângin, i lâwm loh zâwng ti ka nih chuan ka kîr leh mai ang,” a ti a.

³⁵LALPA vântirhkoh chuan Balaama hnênah, “Hêng mite hi zui rawh, i hnêna ka sawi chauh i sawi chhâwng tûr a ni,” a ti a. Tichuan, Balaama chu Balaka miliante rual chuan a kal ve ta zêl a.

³⁶Balaama a lo kal tih a hriat chuan Balakan an ramri tâwp, Arnon lui kama Ir-Moab khuaah hmuak tûrin a kal a.

³⁷Balaka chuan, “Ṭhahnemngai takin ka rawn kohtîr che a, engtizia nge i lo kal duh mai loh le? Mi ropui takah ka siam thei lo che em ni?” a ti a.

³⁸Balaama chuan Balaka hnênah, “Ngai teh, ka lo kal na a, thu dang sawi thei em ka nih? Pathian min sawitîr chauh ka sawi ang,” a ti a.

³⁹Balaama chu Balaka rual chuan a kal ve ta a, Kiriat-huzot an thleng a.

⁴⁰Balaka chu bâwngpate leh berâmtein a inthawi a. Balaama leh a kalpui miliante chu a sa ei atân a sâwm a.

⁴¹A tûkah chuan Balaka chuan Balaama chu a hruai a, Bamot-baal-ah a kalpui a; chuta ṭang chuan Israel mite chu an hmu thei a.