Read Mizo Lushai Numbers 23 Bible Online

Numbers 23 - Mizo Lushai bible

Numbers 23

¹Balaama chuan Balaka hnênah, “Maichâm pasarih mi siamsak teh, bâwngchal pasarih leh berâmchal pasarih han la bawk ang che,” a ti a.

²Balaama sawi ang chuan Balaka chuan a ti a; an pahnih chuan maichâm tinah bâwngchal leh berâmchal pakhat zêl an hlân a.

³Balaama chuan Balaka hnênah, “Mi be tûrin LALPA a lo kal dâwn nge dâwn lo ka va ngaichâng ang e. Hâlral thilhlan hi in lo vil dâwn nia, min hrilh apiang ka hrilh leh ang che,” a ti a.

⁴Pathian chu a lo kal a, Balaama chuan a hnênah, “Maichâm chu ka siam a, bâwngchal pakhat leh berâmchal pakhat pawh ka hlan ta e,” a ti a.

⁵LALPA chuan Balaka hnêna sawi tûr Balaama chu a hrilh a. Balaka hnênah chuan a kîr a,

⁶a zu thlen chuan Balaka leh Moab miliante chu hâlral thilhlan maichâm bulah chuan an lo la ding reng a.

⁷Balaama chuan hetiang hian thu a chham ta a: “Aram tlângram ata Moab lal Balakan min ko va, ‘Jakoba hi ânchhia min lawhsak teh Israela hi min hausak rawh,’ min ti a.

⁸ LALPA ânchhe lawh loh keiin engtin nge ânchhia ka lawh theih ang? LALPA huat loh, engtin nge ka huat theih ang?

⁹Anni chu lungpui aṭangin ka hmu pha a, Tlângchhîp aṭangin an lang vek a ni. A hlanga awm tûr hnam an ni a, Hnam dang ang mai an ni lo.

¹⁰Israel thlahte chu ṭiauvaivut anga tam an ni a, Chhiar sên rual an ni lo; Thil dik tih vânga thi ka nih chuan Thlamuang takin a ni ka thih dâwn ni,” a ti a.

¹¹Balaka chuan Balaama hnênah, “Engtizia nge chutianga min tih le? Ka hmêlmate ânchhia lawh tûrin ka pun che a, mal i sâwmsak tâk hlauh mai le?” a ti a.

¹²Ani chuan, “LALPA min hrilh ang chiah ka sawi tûr a ni dâwn lâwm ni?” a ti a.

¹³Balaka chuan, “Ti rawh, hmun dangah i kal teh ang, an vaia i hmuh vek theih lohna hmun, a ṭhen chauh i hmuh theihna tûrah i kal ang; tichuan, ânchhia i lawh ngam ang,” a ti a.

¹⁴Pisga tlângchhîpa Zofim hmunah chuan a hruai a; maichâm pasarih a siam a, bâwngchal leh berâmchal maichâmah chuan a hlân ṭheuh va.

¹⁵Balaka hnênah chuan, “Hâlral thilhlan hi lo vil la, saw laiah sâwn Pathian ka va hmu tâng e,” a ti a.

¹⁶LALPA chuan Balaama chu a rawn tâwk a, sawi tûr a hrilh a, “Balaka hnênah kîr la, ka hrilh che kha hrilh rawh,” a ti a.

¹⁷A hnên a lo thleng a, Moab miliante nên chuan maichâm bulah an la ding reng a.

¹⁸Balaka chuan, “LALPAN eng nge a lo sawi?” a ti a.

¹⁹Balaama chuan hetiang hian a chham a: “Balak, tho la, ngaithla teh, Zipora fapa, ka thu hi bengkhawn teh: Pathian hi daw mai mai ṭhîn mihring ang a ni lo va, Lamlêt leh hni hne hringfa ang a ni hek lo. A sawi tawh chu a ti dâwn lâwm ni? A ṭawng tawh chuan a hlen dâwn lâwm ni?

²⁰Mal sâwmsak tûrin min tîr a, Mal a sâwm tawh chu keia sût rual em ni?

²¹Jakoba hian thil ṭha lo a tawng dâwn lo, Israelan harsatna a tâwk lo vang. LALPA, an Pathian chuan a awmpui a, Lalah an neih tlat si a.

²²Aigupta ram aṭanga hruai chhuaktu Pathian chu An tân vêngtu ṭha tak, selechal ang a ni.

²³Jakoba chu dawi hneh rual a ni lo va, Israela chu ânchhe ngam loh a ni. Miten Israel mite an hmuhin, ‘Pathian hian a va ti mak em!’ an ti ang.

²⁴Sakeibaknei zîng tho, Sapêl tûra thawk chhuak, Sa a seh a ei zawha, A thisen a liah fai hma chu Bawk leh ngai lo ang hi a ni,” a ti a.

²⁵Balaka chuan Balaama hnênah, “Ânchhia i lawh ngam loh pawhin mal chu sâwmsak lul teh suh,” a ti a.

²⁶Balaama chuan Balaka chu a chhâng a, “LALPA min hrilh ang chiah ka sawi ang tih ka hrilh che kha,” a ti a.

²⁷Balaka chuan Balaama hnênah, “Ngawi teh, hmun dangah i kal teh ang, chuta ṭang chuan Pathianin hêng mite hi ânchhia i lawh a remti mahna,” a ti a.

²⁸Peor tlângchhîpah Balaka chuan Balaama chu a hruai a, chuta ṭang chuan thlalêr chu a lang thei vek a.

²⁹Balaama chuan, “Maichâm pasarih mi siamsak leh rawh, bâwngchal pasarih leh berâmchal pasarih pawh han la leh bawk ang che,” a ti a.

³⁰Balaka chuan Balaama thu ang chuan a ti a, maichâmah chuan bâwngchal pakhat leh berâmchal pakhat a hlan ta ṭheuh va.