Read Mizo Lushai Numbers 24 Bible Online

Numbers 24 - Mizo Lushai bible

Numbers 24

¹Israel-te chu LALPA chuan mal a sâwm duh tlat a ni tih Balaaman a hriat chuan a hma ang khân aien tûrin a kal hrang duh ta lo va. Thlalêr lam chu a thlîr a,

²Israel-ten a chi chi-a bûk an inzâr dul chu a hmu a, Pathian thlarau chu a chungah a lo thleng a,

³hetiang hian a chham ta a: “Beora fapa Balaama thu: Mit tihvâra thu chu,

⁴Pathian thu ngaithlatua thu Engkimtitheia inlârna dawngtu, Tlua, mit vâr taa thu chu:

⁵Aw Jakob, in puan inte chu a va mawi êm! Aw Israel, in bûkte chu a mawi mang e!

⁶Tûm thing tlar ṭhut ang mai, Lui kama huan hring dup; LALPA phun thingrai hmun chu, Lui kam sidar hmun ang a ni.

⁷Ruahtui tam tâwk an dawng ang a, Tui ṭhatna hmunah thlai an chîng ang. An lal chu Agaga aiin a ropui a, A ram chu a ropui hle ang.

⁸Aigupta ram aṭanga hruaichhuaktu Pathian chu An tân ki ṭha tak nei sele ang a ni. A hmêlma, hnamte chu a phîn darh ang a, A thalte chuan a chhun hlum ang.

⁹Sakeibaknei angin chhûnah a bawk a, Tu nge titho ngam ang? Mal sâwmsaktu che chu an nihlawh e, ânchhe lawhtu che chuan ânchhia an dawng ve ang,” a ti a.

¹⁰Balaka chu Balaama chungah chuan a thinur ta hle a, a inhûm ruh a, “Ka hmêlma ânchhe lawh tûrin ka pun che a, vawi thum lai mal i sâwmsak vei maw?” a ti a.

¹¹“In khaw lamah haw vat rawh, ropui taka chawimawi che ka lo tum a, LALPA chuan a phalsak lo che a nih hi,” a ti a.

¹²Balaama chuan Balaka hnênah, “I mi tirhte hnênah, ‘Balaka chuan a in khat tangka leh rangkachak

¹³min pe mah se, LALPA thu chu a chhia ka tih angin emaw, a ṭha ka tih angin emaw ka tidanglam thei lo, LALPA min hrilh ang chu ka sawi ang,’ ka tih rêng kha. Ka haw tâng e” a ti a.

¹⁴Balaama chuan Balaka hnênah, “En teh, ka chhûngte hnênah ka haw dâwn; ka kal hmain hêng mite hian nakin lawka i mite chunga an thil tih tûr ka hrilh ang che,” a ti a.

¹⁵Heti hian a chham ta a: “Beora fapa Balaama thu: Mit tihvâra thu chu,

¹⁶Pathian thu ngaithlaa thu, Chungnungbera thurûk hriaa thu, Engkimtitheia inlârna dawngtu, Tlua, mit vâr taa thu chu:

¹⁷Ani chu ka hmu, tûnah zawng ni lovin, Ka han en a, a hnaih zawng a hnai lo. Jakoba aṭangin arsi a lo lang ang a, Israela aṭangin lal tiang a lo chawr ang. Moab ram kil tin a hâwl nek ang a, Setha thlahte a vaw hrep ang.

¹⁸Edom ram chu a ta tûr a ni a. A hmêlma, Seir-ho chu, a nei ang, Israel chu tu man an ngam lo vang.

¹⁹Jakoba laka chhuak lal chuan, Khuaa thi bângte chu a nuai bo vang.”

²⁰Amalek lam a hawi a, hetiang hian a chham a: “Amalek chu hnam ropui tak ni ṭhîn mah se, A tâwpah an chhe hlen ang,” tiin.

²¹Ken mite lam a hawi a, hetiang hian a chham a: “In chênna chu him hle mah se, Khâm sângah bu nei mah ula,

²²Ken mite u, in boral ang, Asuria lalin salah a man lawk dâwn a che u,” a ti a.

²³Hetiang hian thu a chham bawk: “Pathian a chêt hunah tu nge dam khawchhuak awm ang?

²⁴Kitim aṭangin lawngin an lo kal ang a, Asuria te, Eber te an tirethei ang, Anmahni pawh an la boral ang,” tiin.

²⁵Balaama chu a tho va, a haw ta a; Balaka pawh a haw ta a.